પાલડીમાં રહેતા પરિવાર અને તેમના સગાંસંબંધીના ર૮ સભ્યને અબુધાબી લગ્ન પ્રસંગમાં જવા માટે રહેવા તેમજ જમવા અને ફરવાની તમામ વ્યવસ્થા કરી આપવાનું કહીને કર્મા ટ્રાવેલ્સના સંચાલકે છેતરપિંડી કરી હોવાની ઘટના પ્રકાશમાં આવી છે. હાલ પોલીસે ગુનો નોંધી આગળની તપાસ હાથ ધરી છે.
ટુરના નામે એજેંટ બની એક શખ્સે કરી છેતરપીંડી
કલાઈન્ટ ઓફિસે પેમેન્ટ લેવા ગયા તો ઓફિસ બંધ હતી
પોલીસ સ્ટેશનમાં વિરુદ્ધમાં છેતરપિંડીની ફરિયાદ દાખલ કરવામાં આવી
પાલડી વિસ્તારમાં આવેલ સર્વમંગલ કોમ્પ્લેક્સમાં રહેતા અને બ્યૂગલ કોમ્યુનિકેશન નામથી કમિશનનો ધંધો કરતા નીરવભાઈ શાહે પાલડી પોલીસ સ્ટેશનમાં ફરિયાદ કરી છે. નીરવભાઈના કાકા સસરાના દીકરાનાં લગ્ન અબુધાબીમાં હોઇ પરિવાર સાથે લગ્નમાં જવાનું હોવાથી ટ્રાવેલ્સ એજન્ટની શોધ કરતા હતા, જેથી તેમના સાઢુ કેવલ પરીખે કહ્યું હતું કે તેમની ઓફિસમાં કામ કરતા ચિરાગ પંડ્યાના રિલેટિવ મયંક પંડ્યા કર્મા ટ્રાવેલ્સનું કામકાજ કરે છે અને આ મયંક હોટલ બુકિંગનું કામકાજ કરતો હોવાથી તે તમને સારી ફેસિલિટી ંતથા ટિકિટમાં સારું ડિસ્કાઉન્ટ આપશે તેવી વાત કરી હતી.
ત્યારબાદ એજન્ટ મયંકે નીરવભાઈન અબુધાબી અને દુબઇ ખાતે રહેવા-ફરવાની તમામ વ્યવસ્થા કરી દઇશ એમ કહીને વિશ્વાસ આપવ્યો હતો. ત્યારબાદ નીરવભાઈનો પરિવાર અને તેમનાં સગાંસંબંધીઓ એમ કુલ ર૮ વ્યક્તિને અબુધાબી ખાતે લગ્ન પ્રસંગમાં લઈ જવાનું નક્કી થયું હતું.
અબુધાબી જવા માટે નીરવભાઈએ અને તેમનાં સગાંસંબંધીઓએ મયંકના ખાતામાં ટિકિટ અને હોટલ તથા ફરવા માટેની તમામ સુવિધા માટે એડ્વાન્સમાં ૬.૯૪ લાખ રૂપિયા જમા કરાવ્યા હતા. તા. ૧ ડિસેમ્બર, ર૦૧૯ના રોજ અમદાવાદ એરપોર્ટથી જવાનું નક્કી કરાયું હતું. મયંકે નીરવભાઈના મોબાઈલમાં મેસેજ કરી જાણ કરી હતી કે અબુધાબીમાં ગોલ્ડન સેન્ડ-૩માં રહેવા-ફરવા તથા જમવાની વ્યવસ્થા કરી છે.
ત્યારબાદ નીરવના સાઢુએ ગોલ્ડન સેન્ડ-૩માં તપાસ કરતાં મયંકે કોઈ જ વ્યવસ્થા કરી ન હતી. ત્યારબાદ નીરવભાઇ અને તેમના સંબંધીઓ અન્ય એજન્ટ મારફતે અબુધાબી લગ્નપ્રસંગમાં ગયા બાદ નીરવભાઇ પરત આવતા મયંક પાસે પૈસા પાછા માગ્યા તો તે ગલ્લાં-તલ્લાં કરવા લાગયો હતો અને કોઈ સંતોષકારણ જવાબ આપતો ન હતો, જયારે નીરવભાઈ મયંકની ઓફિસ પર પેમેન્ટ લેવા માટે ગયા તો ઓફિસ બંધ થઇ ગઈ હતી.
નીરવભાઈએ મયંકનો સંપર્ક કરતાં તેણે ફોન સ્વિચ ઓફ કરી દીધો હતો. રૂપિયા લઈ કોઈ વ્યવસ્થા ન કરતાં છેતરપિંડી થઈ હોવાની જાણ થતાં પાલડી પોલીસ સ્ટેશનમાં મયંક પંડ્યા વિરુદ્ધમાં છેતરપિંડીની ફરિયાદ દાખલ કરવામાં આવી હતી. પોલીસે ગુનો નોંધી આગળની તપાસ હાથ ધરી છે.