રાજકીય લેબોરેટરી ગણાતી મહેસાણા લોકસભા બેઠક ઉપર કોંગ્રેસ માટે ઉમેદવાર પસંદગીનું કાર્ય માથાનો દુખાવો બની શકે છે. લોકસભા બેઠક માટે કોંગ્રેસ દ્વારા હાલમાં પ્રક્રિયા હાથ ધરાઈ છે. ત્યારે 32 લોકોએ આગામી લોકસભાના ઉમેદવાર બનવા તૈયારી દર્શવતા કોંગ્રેસ માટે કોને ઉમેદવાર બનાવવા તે એક સવાલ ઉભો થયો છે. તો બીજી તરફ પાટીદાર અને ઠાકોર સમાજનું પ્રભુત્વ ધરાવતી આ બેઠક ઉપર બે મહિલાઓ પણ કોંગ્રેસના ઉમેદવાર બનવા ઇચ્છુક છે. જેમાં પ્રદેશ કોંગ્રેસના મંત્રી વંદનાબેન પટેલ અને ઊંઝાના ધારાસભ્ય આશાબેન પટેલનો સમાવેશ થાય છે.
મહેસાણા એટલે પાટીદાર અને ઠાકોર સમાજનું પ્રભુત્વ ધરાવતી લોકસભા બેઠક. આ બેઠક વડાપ્રધાન મોદીના હોમ ટાઉનને કારણે મહેસાણા બેઠક ઉપર સૌ કોઈની નજર હોય તે સ્વાભાવિક છે. આમ તો આ બેઠક ભાજપનો ગઢ ગણાય છે અને છેલ્લી બે ટર્મથી આ બેઠક ઉપર ભાજપના જયશ્રીબેન પટેલ ચૂંટણી જીતી રહ્યા છે. જો કે પાટીદાર અનામત આંદોલન બાદ મહેસાણામાં સ્થાનિક સ્વરાજની સંસ્થાઓમાં કોંગ્રેસ મજબૂત બની છે. આ કારણે એક જમાનામાં જે બેઠક ઉપર કોંગ્રેસને ઉમેદવાર શોધવા પડતા હતા ત્યાં 32 લોકો કોંગ્રેસના ઉમેદવાર બનવા ઇચ્છુક છે.
આ 32 લોકોમાં બે મહિલાનો પણ સમાવેશ થાય છે. જેમાં હાલ પ્રદેશ કોંગ્રેસના મંત્રી વંદનાબેન પટેલ અને ઊંઝાના કોંગ્રેસના ધારાસભ્ય આશાબેન પટેલનો સમાવેશ થાય છે. આ બંને મહિલા અગ્રણી પાટીદાર સમાજમાંથી આવે છે. તો વળી વંદનાબેન પટેલ ગત લોકસભાની ચૂંટણીમાં આપ પાર્ટીના ઉમેદવાર તરીકે ચૂંટણી લડી પણ ચુક્યા છે. જેને લઈને વંદનાબેન પટેલ આ બેઠક માટે વધુ કોન્ફિડેટ જોવા મળી રહ્યા છે. મહેસાણા બેઠક ઉપર કોંગ્રેસની ટિકિટ માગનાર વંદનાબેન પટેલે મહિલા કાર્ડને આધારે કોંગ્રેસ પાસે ટિકિટ માંગી છે. તો બીજી બાજુ ઠાકોર સમાજના 14 લોકોએ પણ ટિકિટ માટે દાવેદારી કરી છે.
મહેસાણા લોકસભા બેઠકની વાત કરવામાં આવે તો આ બેઠક પાટીદાર અને ઠાકોર મતદારનું પ્રભુત્વ રહ્યું છે અને છેલ્લી ચૂંટણીના ઇતિહાસને જોવામાં આવે તો આ બેઠક ઉપર બે પાટીદાર ઉમેદવાર વચ્ચેના જંગમાં ઠાકોર સમાજ જે તરફ જાય તે જ પાટીદાર ઉમેદવાર ચૂંટણી જીતી શકે છે.
ત્યારે કોંગ્રેસની પરંપરાગત વોટબેંક ગણાતા ઠાકોર સમાજના 14 લોકો આ વખતે લોકસભાના ઉમેદવાર બનવા ઇચ્છુક છે. જેમાં પ્રદેશ કોંગ્રેસના મંત્રી કિર્તિસિંહ ઝાલા અને ભોપાજી ઠાકોરનો પણ સમાવેશ થાય છે. તો બીજી પાટીદાર સમાજમાં નિવૃત્ત આરટીઓ ઓફિસર જી એમ પટેલ વંદનાબેન પટેલ અને આશાબેન પટેલ જેવા અગ્રણી નેતાઓનો સમાવેશ થાય છે.
જોકે વંદનાબેન પટેલ સહિત મહિલા અગ્રણીઓની સ્પષ્ટ રજુઆત છે કે જો ભાજપ મહેસાણામાં બે ટર્મ માટે મહિલાને ટિકિટ આપી શકતું હોય તો કોંગ્રેસ કેમ નહીં? મહિલાઓને રાજનીતિમાં પ્રાધાન્ય આપવાની વાત છે તો તેને પાર્ટીએ સાચા અર્થમાં સાર્થક કરવું જોઈએ. આમ વંદનાબેન પટેલ મહિલા કાર્ડ આધારે ટિકિટ માંગી રહ્યા છે. તો અન્ય ઠાકોર સમાજના અગ્રણીઓ મતદારોની સંખ્યાને લઈને ટિકિટ માંગી રહ્યા છે. ત્યારે આવા સંજોગોમાં કોંગ્રેસને કોઈ એક વ્યક્તિ ઉપર પસંદગીનો કળશ ઢોળવો કપરું સાબિત થશે.
જો મહિલાને પ્રાધાન્ય આપવાની વાત આવે તો કોંગ્રેસ પાસે બે મજબૂત વિકલ્પ છે. આશાબેન ચૂંટાયેલા ધારાસભ્ય છે. તો વંદનાબેન પટેલ સ્થાનિક પાટીદાર સમાજ ઉપર પ્રભુત્વ ધરાવે છે. જોકે હવે એ જોવું રહ્યું કે ભાજપની જેમ કોંગ્રેસ મહેસાણામાં મહિલાને ટિકિટ આપવાનો પ્રયોગ કરી શકે છે કેમ?
જોકે લોકસભાની ચૂંટણી હવે નજીક આવી રહી છે ત્યારે કોંગ્રેસમાંથી દિગજ્જ નેતાઓ ભાજપના શરણે આવી રહ્યા છે. ત્યારે મહેસાણાના પુર્વ સાંસદ જીવાભાઈ પટેલ પણ થોડા સમય પહેલાં કોંગ્રેસને અલવિદા કહી ભાજપના શરણે આવ્યા છે. ત્યારે જીવાભાઈના ભાજપમાં જોડાવા થી અનેક તર્ક વિતર્ક શરૂ થયાં છે. જોકે જીવા ભાઇ પટેલના ભાજપમાં જોડાવાને લઇ મહેસાણા સહિત રાજ્યના રાજકારણમાં અનેક ચર્ચાઓ શરૂ થઈ છે.
અત્રે ઉલ્લેખનીય છે કે 2004માં નીતિન પટેલ જીવાભાઈ પટેલ સામે મહેસાણા લોકસભા બેઠક હાર્યા હતા. જ્યારે 2017માં એ જ નીતિન પટેલે જીવાભાઇ પટેલને મહેસાણા બેઠક પરથી ચૂંટણીમાં લોક સભાની સીટ પર હરાવ્યા હતાં ત્યારે BJPના રાષ્ટ્રીય અધ્યક્ષ અમિત શાહની ઉપસ્થિતમાં ભાજપ કાર્યાલયમાં કોંગ્રેસના પૂર્વ સાંસદ જીવાભાઈ પટેલે સમર્થકો સાથે ભારતીય જનતા પાર્ટીની સદસ્યતા ગ્રહણ કરી હતી.