અહેવાલો અનુસાર, તાલિબાનમાં સરકારની રચના પૂર્વે સંયુક્ત રાષ્ટ્રસંઘના માનવીય બાબતોના પ્રમુખ અને મહામંત્રી માર્ટિન ગ્રિફિથ્સ તાલિબાનના ટોચના નેતા મુલ્લા બરાદરને મળ્યા હતા અને આ મુલાકાત બાદ સંયુક્ત રાષ્ટ્રસંઘે કોઈ પણ જાતની શરત વગર તાલિબાન રાજને માનવીય મદદ અને સહયોગ આપવાની પૂરી ખાતરી આપી છે.
આખરે સંયુક્ત રાષ્ટ્ર સંઘ તાલિબાન સામે ઝૂક્યુ
સૌ પહેલાં સંયુક્ત રાષ્ટ્ર સુરક્ષા પરિષદે (યુએનએસસી) ભારતના નેતૃત્વમાં અફઘાન મુદ્દે જારી કરવામાં આવેલા નિવેદનમાંથી તાલિબાનનું નામ હટાવી દીધું છે. આમ હવે સંયુક્ત રાષ્ટ્ર સંઘ તાલિબાન સામે ઝૂકી ગયું છે અને તાલિબાનને સમર્થન અને સહયોગ જારી રાખવાની જાહેરાત કરી છે. યુએનના માનવીય બાબતોની એજન્સીના પ્રમુખ માર્ટિન ગ્રિફિથ્સે કાબુલના વિદેશ મંત્રાલયમાં તાલિબાનના ટોચના નેતા મુલ્લા બરાદર સાથે મુલાકાત કરીને આ પ્રકારની ખાતરી આપી હતી.
સંયુક્ત રાષ્ટ્ર અફઘાનિસ્તાન સાથે પોતાનું સમર્થન યથાવત રાખશે
આ મુલાકાત બાદ માર્ટિન ગ્રિફિથ્સે ટ્વિટ કરીને જણાવ્યું હતું કે, મેં અફઘાનિસ્તાનમાં લાખો જરૂરિયાતમંદ લોકોને નિષ્પક્ષ માનવીય સહાયતા અને સુરક્ષા પ્રદાન કરવા માટે સંયુક્ત રાષ્ટ્રની પ્રતિબદ્ધતાને સમર્થન આપવા તાલિબાનના નેતૃત્વ સાથે મુલાકાત કરી હતી. આ મુલાકાત બાદ તાલિબાનના પ્રવક્તા મોહમ્મદ નઈમે પણ ટ્વિટ કરીને જણાવ્યું હતું કે, માર્ટિન ગ્રિફિથ્સે અમને હૈયાધારણ આપી છે કે સંયુક્ત રાષ્ટ્ર અફઘાનિસ્તાન સાથે પોતાનું સમર્થન અને સહયોગ જારી જ રાખશે. દરમિયાન, તાલિબાને અફઘાનિસ્તાનમાં નવી સરકારની રચના આગામી સપ્તાહ સુધી મોકૂફ રાખી છે. તાલિબાનના પ્રવક્તા જબીઉલ્લાહ મુજાહિદે આ અંગે જાણકારી આપી હતી.