શેર બજારમાં ઘટાડો થવા લાગ્યો છે તો એવી સ્થિતિમાં કઈ ભૂલોથી દૂર રહેવું જોઈએ જાણો..
શેરબજારમાં મંદી આવે ત્યારે આ વાતોનું રાખો ધ્યાન
પૈસા ડૂબી જવાનો ડર અને વધુ કમાઈ લેવાના લોભમાં લોકો ખોટ નિર્ણય લઈ લે
સમજદારીપૂર્વક રોકાણ કરવાની સલાહ આપવામાં આવે છે.
વિદેશી બજારોના નકારાત્મક સંકેતોને કારણે ભારતીય શેરબજારમાં પણ મોટો ઘટાડો જોવા મળી રહ્યો છે. ગઈકાલે એટલે કે શુક્રવારે જ બજારમાં રોકાણકારોને 6 લાખ કરોડનું નુકસાન થયું હતું. આવા ઘટાડાની સ્થિતિમાં સામાન્ય લોકોમાં ભય અને લોભ બંને વધવાની શક્યતાઓ ઉભી થાય છે. બજારના મોટાભાગના નિષ્ણાતો રોકાણકારોને દરેક પરિસ્થિતિમાં સમજી વિચારીને નિર્ણય લેવા માટે કહેતા હોય છે પરંતુ આવી સ્થિતિમાં પૈસા ડૂબી જવાનો ડર અને વધુ કમાઈ લેવાના લોભમાં એવો નિર્ણય લે છે કે તેઓ નુકશાન કરી બેસે છે. જો બજારમાં ઘટાડો થવા લાગ્યો છે તો એવી સ્થિતિમાં કઈ ભૂલોથી દૂર રહેવું જોઈએ જાણો..
ડરીને શેર વંહેચી કાઢવા
શેરબજારમાં ઘટાડો થાય ત્યારે વિચાર્યા વિના ડરીને શેર વેચવાથી મોટી કોઈ ભૂલ નથી. જો કે આવા સમયે હાથ પર હાથ દઈને બેસી રહેવું પણ યોગ્ય નથી. જો તમે ફક્ત સ્ટોકનું પર્ફોમન્સ જોઈને શોર્ટ ટર્મ માટે પૈસા કમાવવાના હેતુમાં ક્યાંક રોકાણ કર્યું હોય તો તરત જ રોકાણની સમીક્ષા કરીને સાચો નિર્ણય લેવો જોઈએ પણ જો તમે સ્ટોક નહીં પણ કંપનીની કામગીરીના આધારે સમજદારીપૂર્વક રોકાણ કર્યું હોય, તો શાંત રહેવું જોઈએ. એટલા માટે જ સમજદારીપૂર્વક રોકાણ કરવાની સલાહ આપવામાં આવે છે.
બજારમાં રોકાણ કરતાં અટકાવી દેવું
નાના રોકાણકારોની સૌથી મોટી સમસ્યા એ છે કે તે બજારમાં ઘટાડો આવતાની સાથે જ તેની નકારાત્મક છબી બનાવે છે પણ આ વાત ધ્યાનમાં રાખવી જોઈએ કે બજાર એક એવી જગ્યા છે જ્યાં બજારમાં ઘટાડો થતો હોય ત્યારે પણ ઘણા લોકો કમાણી કરતા હોય છે જો કે આ માટે બજારની ખૂબ સારી જાણકારી હોવી જોઈએ. નાના રોકાણકારોએ વિશ્વાસપાત્ર બજાર નિષ્ણાત પાસેથી સલાહ લેવી જોઈએ અને એ મુજબ સમજી વિચારીને રોકાણ કરતાં રહેવું જોઈએ.
મોટા પ્રમાણમાં રોકાણ કરવા લાગવું
શેરબજારમાં મંદી દરમિયાન એક શબ્દ તદ્દન ટ્રેન્ડમાં આવે છે અને એ છે buying at dip એટલે કે ઘટાડામાં ખરીદી કરવી. મોટાભાગના નાના રોકાણકારો પણ આવું જ કરે છે કારણ કે તેમને પણ આ ગણિત સરળ અને સીધું લાગે છે. આવી સ્થિતિમાં ઓછા ભાવે ખરીદી અને ઊંચા ભાવે વેચાણ કરવાનો વિચાર માનવામાં આવે છે. પરંતુ આ વસ્તુ કહેવામાં જેટલી સરળ છે એટલી કરવામાં નથી. એટલા માટે સમજી વિચારીને રોકાણ કરવું જોઈએ.