દેશવાસીઓના ઘરે ઘરે પહેલી પસંદ બનેલા નવસારીના પૌંઆ ઉનાળા દરમ્યાન સ્વાદ રસિયાઓના સ્વાદ પર બ્રેક મારે એવી પરિસ્થિતિ ઊભી થઇ છે. ઉકાઈ ડેમથી આવતું પાણી બંધ કરાતાં ઉનાળામાં ડાંગરનું વાવેતર ઓછું થવાનો ભય સતાવી રહ્યો છે. જો પિયત નહીં મળે તો તેના કારણે પૌવા ઉદ્યોગ આવનાર દિવસોમાં મંદીમાં સપડાશે અને પૌંઆ મિલોને તાળાંઓ લાગશે એવી દહેશત ઊભી થઈ રહી છે.
દક્ષિણ ગુજરાતમાં 'જયા' અને 'ગુજરી' નામની ચોખાની જાત પૌંઆ માટે ઉત્તમ માનવામાં આવે છે જેનો સ્વાદ અન્ય રાજ્યના ચોખા કરતાં મીઠાશવાળો હોવાને કારણે અહીંના પૌંઆ સ્વાદ રસિયાઓની પ્રથમ પસંદ બન્યા છે. જેના કારણે દક્ષિણ ગુજરાતમાં ખાસ કરીને નવસારી જિલ્લામાં પૌંઆ ઉદ્યોગ ફૂલ્યો ફાલ્યો છે. 70 જેટલી પૌંઆ મિલો અને 4000 જેટલા કર્મચારીઓ સાથે સંકળાયેલો આ ઉદ્યોગ હાલ 10 000 લોકોને પેટિયું રળી આપે છે પરંતુ આ ઉદ્યોગ વર્તમાન સમયમાં કપરા ચઢાણો ચઢી રહ્યો છે.
ઉકાઈ ડેમમાં પાણીની સપાટી નીચી જતાં કેનાલ દ્વારા આપવામાં આવતો પાણી પુરવઠો બંધ કરવામાં આવ્યો છે. જેની સીધી અસર ડાંગરના વાવેતર પર પડી છે. પૂરતાં પિયતના અભાવે આ વર્ષે ચોખાનું ઉત્પાદન 60 ટકા ઓછું થશે તેવો ભય સેવાઈ રહ્યો છે. વર્તમાન સમયમાં ડાંગરના પાકને પિયત ઓછું મળતાં પૌંઆ મિલોના માલિકો અને કર્મચારીઓ આફતમાં મૂકે એવા સમીકરણો રચાતાં ઉદ્યોગકારો ચિંતામાં મુકાયા છે.
હાલ સમગ્ર ગુજરાતમાં 8 લાખ હેક્ટરમાં ડાંગરનું વાવેતર થયું છે. જેમાં નવસારી જિલ્લામાં 49 હજાર બસો પચાસ હેક્ટરમાં 'જયા' અને 'ગુજરી' નામના ડાંગરનું વાવેતર થાય છે. જિલ્લાના 122 ગામોમાં કેનાલ આધારિત પિયત વાળી ડાંગરનું વાવેતર થાય છે. ડાંગરના આ પાકને ઉકાઈ ડેમ મારફતે પાણીનો જથો આપવામાં આવે છે. પરંતુ હાલ આપવામાં આવતો પિયત પાણીનો પુરવઠો બંધ થતા ખેડૂતો માથે પાક બચાવવા સંકટના વાદળો ઘેરાયા છે. સાથે પૌવા મિલો પણ મંદીમાં સપડાઈ છે.
ડાંગરનો પાક ઓછો ઉતરવાના ભય હેઠળ પૌંઆ ઉદ્યોગ સાથે સંકળાયેલા શ્રમજીવીઓની આવક પર અસર થઇ રહી છે. કેમ કે આખો મહિનો ચાલતી પૌંઆ મીલો હાલ મહિનાના 12 દિવસ'જ ચાલુ રહી શકે છે. જેમાં કામ કરતાં કર્મચારી પર રોજગારીને લઈને ચિંતાનું મોજું ફરી વળ્યું છે.
નવસારી જિલ્લાની શાન હીરા ઉદ્યોગ બાદ પૌંઆ ઉદ્યોગ પર આધારિત હતી પરંતુ હીરાની ચમક ઓછી થઇ છે અને સાથે સાથે પૌંઆ ઉદ્યોગ પણ ડચકા ખાઈ રહ્યો છે. ત્યારે ઉપરથી હવે પાણી પુરવઠો ખોરવાતાં આગામી દિવસોમાં ખેડૂતો સાથે મિલ માલિકો અને પૌંઆ ઉદ્યોગમાં રોજગારી મેળવી રહેલા તમામ લોકો માટે નવી મુસીબતના ચિહ્નો દેખાઈ રહ્યા છે. પાણીની ઘટ હાલ ખતરાની ઘંટડી વગાડી રહી છે ત્યારે ખેડૂતો અને ઉદ્યોગકારો સરકાર પાસે મદદની આશા રાખી રહ્યા છે.