સુરેન્દ્રનગરના થાન શહેરમાં જાહેરમાં ગંદકીની સમસ્યાઓનો ઉકેલ ન આવતાં લોકોમાં ભારે રોષ પ્રવર્તી રહ્યો છે. રોષે ભરાયેલા સ્થાનિકોએ પાલિકામાં હોબાળો મચાવ્યો હતો. તેમજ સ્થાનિકોએ મહિલા પ્રમુખનો જાહેરમાં ઉધડો લીધો હતો.
જાહેરમાં ગંદકીનું સામ્રાજ્ય વધતા સ્થાનિકોએ પ્રમુખનો ઘેરાવો કર્યો
મહત્વનું છે કે, થાન શહેર સમસ્યાઓનો ઉકેલ ન આવતા લોકોમાં ભારે રોષ જોવા મળી રહ્યો છે. જેને લઈને નગરજનોએ પાલિકામાં ભારે હોબાળો મચાવ્યો હતો. બીજી તરફ થાન પાલિકા પ્રમુખ અને શહેરીજનો આ મુદ્દે જીભાજોડીની સાથે સામે આવતાં મામલો ગરમાયો હતો. જેને લઈને થાન નગરપાલિકામાં લોકોનાં ટોળે-ટોળાં ઉમટી પડ્યાં હતાં .
વારંવાર રજુઆત છતાં કામગીરી ન થતી હોવાનો આક્ષેપ
ઉલ્લેખનીય છે કે, થાન શહેરમાં છેલ્લા કેટલાંક દિવસોથી થાનગઢમાં રોડ, રસ્તા, પાણી, ગંદકી અને ગટરની સમસ્યાઓ વધતાં નગરજનોમાં રોષની લાગણી ફેલાવા પામી છે. ત્યારે આજે શનિવારે થાનગઢ શહેરમાં સમસ્યાઓનો ઉકેલ ન આવતા લોકોમાં રોષ ભભૂકી ઉઠતા રોષે ભરાયેલા નગરજનોએ પાલિકામાં હલ્લાબોલ મચાવ્યો હતો.