સુરતના વેસુ વિસ્તારમાં યોજાયેલા યુ-ટર્ન કાર્યક્રમમાં ગૃહ રાજ્યમંત્રી હર્ષ સંઘવીએ બાળકો સાથે વિવિધ રમત રમી હતી.
સુરતમાં યુ-ટર્ન કાર્યક્રમ યોજાયો
ગૃહ રાજ્યમંત્રી હર્ષ સંઘવી હાજર રહ્યા
હર્ષ સંઘવીએ બાળપણની યાદ તાજા કરી
સુરતમાં દર રવિવારે યુ-ટર્ન કાર્યક્રમનું આયોજન હાથ ધરવામાં આવે છે. જેમાં આજરોજ રવિવારે વહેલી સવારે ગૃહ રાજ્યમંત્રી હર્ષ સંઘવી આવી પહોંચ્યા હતા. અહીં તેઓએ બાળકો સાથે વિવિધ રમતો રમી ભમરડો ફેરવીને બાળપણની યાદો તાજી કરી હતી.
લોકોનો ઉત્સાહ વધાર્યો
સુરતના વેસુ વિસ્તારમાં યુ-ટર્ન કાર્યક્રમમાં બાળપણની રમતો રમાડવામાં આવી હતી. આ કાર્યક્રમમાં અચાનક જ રાજ્યના ગૃહમંત્રી હર્ષ સંઘવી આવી પહોંચ્યા હતા. હર્ષ સંઘવીએ યુ-ટર્ન કાર્યક્રમમાં હાજર લોકોનો ઉત્સાહ વધાર્યો હતો. આ ઉપરાંત અહીં ઉપસ્થિત લોકો સાથે સંવાદ કરીને વિકાસના કાર્યોની સમીક્ષા કરી હતી. મહત્વનું છે કે, ગૃહ રાજ્યપ્રધાન હર્ષ સંઘવીની સુરત મુલાકાત દર વખતે કંઈક અલગ અંદાજમાં જ રહેતી હોય છે. ત્યારે આ વખતે પણ તેમની મુલાકાત અલગ રહી હતી.
મ્યુનિસિપલ કમિશનર સાથે સાયકલ પણ ચલાવી
વેસુ વિસ્તારમાં યોજાયેલા યુ-ટર્ન કાર્યક્રમમાં કોથળા કુદ, ભમરડો, સાત ઠિકરી, લીંબુ ચમચી જેવી રમતો રમાડાઈ હતી. જેમાં હર્ષ સંઘવીએ ભમરડો ફેરવીને બાળપણની યાદો તાજી કરી હતી. આ ઉપરાંત તેમણે મ્યુનિસિપલ કમિશનર સાથે સાયકલ પણ ચલાવી હતી.
વડની વડવાઈ પર લટકીને કાર્યકરો સાથે કરી હતી મસ્તી
નોંધનીય છે કે, ગત જૂન મહિનામાં પોતાના મતવિસ્તાર મજૂરા વિધાનસભા વિસ્તારની મુલાકાત લીધી હતી. જ્યાં લોકોની વચ્ચે બેસીને તેમની સાથે સંવાદ કર્યો હતો. આ અવસરે સુરતમાં બનેલા નવા વોક-વે અને જોગર્સ પાર્કની મુલાકાત દરમિયાન ગૃહ રાજ્યમંત્રી હર્ષ સંઘવીએ વડની વડવાઈ પર હીંચકા ખાઈ મન મૂકીને આનંદ માણ્યો હતો અને બાળપણની યાદ તાજી કરી હતી. આ તકે પણ તેઓ પોતાના આગવા અંદાજમાં જોવા મળ્યા હતા.