ક્રાઈમ / સુરતમાં ભાજપની મહિલા નેતા અને પતિ સાથે સાત લાખની લૂંટ, ટામેટાં ગેંગના ગુંડો જ મુખ્ય સૂત્રધાર

• સુરતના અડાજણ વિસ્તારમાં થઈ હતી લૂંટ
• લૂંટારૂઓએ મહિલા તેમજ તેના પતિને માર મારી સાત લાખની લૂંટ ચલાવી હતી
• પોલીસે લૂંટ કરનાર એક આરોપીને ઝડપી 12 દિવસના રિમાન્ડ મેળવ્યા

સુરત શહેરમાં સૌથી વધુ ભરચક ગણાતા અડાજણ વિસ્તારમાં આવેલ રણછોડનગર સોસાયટીમાં 21 ફેબ્રુઆરીના રોજ સવારે સવા સાત વાગ્યે ભાજપના સિનિયર મહિલા કાર્યકર અને તેના પતિને પાંચ લૂંટારુઓ દ્વારા માર મારી રોકડા સાત લાખની લૂંટ ચલાવવાની ચકચારી ઘટનામાં રાંદેર પોલીસે એક આરોપીને ઝડપી પાડ્યો છે. ઝડપાયેલાં આરોપી ઉબેદ લાલમોહમંદ સિદ્દીકીનાં રાંદેર પોલીસે કોર્ટમાં રજૂ કરી 12 દિવસનાં રિમાન્ડ મેળવ્યા છે. એવી પણ ચર્ચા ચાલી રહી છે કે, આ ગેંગનો મુખ્ય સૂત્રધાર ટામેટાં ગેંગનો સાગરિત અને ગુજસીટોકના ગુનામાં વચગાળાના જામીન ઉપર ફરાર સોયેબ ઉર્ફે સીટી જ મોટેભાગની રોકડ લઇ ફરાર થઇ ગયો છે. સોયેબને કોઇ સ્થાનિકે જ ટીપ આપી હોવાની આશંકા સાથે પોલીસ તપાસ કરી રહી છે.

સવારે ચપ્પુ સાથે પાંચ લૂંટારૂઓ ધસી આવ્યા હતા
અડાજણ પ્રાઇમ આર્કેડ રણછોડનગરમાં રહેતા અને નવયુગ કોલેજમાંથી નિવૃત્ત પ્રોફેસર શિવરામ કાશીરામ પટેલ અને તેમની પત્ની નીતાબેનને મંગળવારે સવારે સવા સાત વાગ્યાના અરસામાં ચપ્પુ સાથે ધસી આવેલા પાંચ લૂંટારુઓ બાંધીને રોકડા સાત લાખ રૂપિયાની લૂંટ કરી ગયા હતા. 

કોર્ટમાં રજૂ કરી તેનાં 12 દિવસના રિમાન્ડ મેળવાયા
રાંદેર પોલીસે આ ગુનામાં લિંબાયતનાં હનુમાન મહોલ્લામાં રહેતાં અને ફતેપુરના વતની ઉબેદ ઉર્ફે લાલમોહમંદ સિદ્દીકને પકડી 32 હજાર રૂપિયા રોકડાં કબજે કર્યા હતા. ત્યારબાદ આરોપીને કોર્ટમાં રજૂ કરી તેનાં 12 દિવસના રિમાન્ડ મેળવાયા હતા. આરોપીની કબુલાતમાં લૂંટમાં સંડોવાયેલાં વધુ ચાર નામો બહાર આવ્યા હતા. તે દિવસે લૂંટ કરવા ઉબેદ સાથે આસિફખાન, ઇર્ષાદ સિદ્દીક ઉર્ફે ઇશાક ટમાટર, મોહમંદ અરમાન અને જીશાન ઉર્ફે માયા આવ્યા હતા. 
એવી પણ ચર્ચાઓ થઇ રહી છે કે, સોયેબ ઉર્ફે સીટીએ જ સ્નેચર્સની ટોળકીને ભેગાં કરી લૂંટ કરાવી હતી અને મોટેભાગનો હિસ્સો પણ તે લઇ ગયો હોવાનું મનાઇ રહ્યું છે. આખી ગેંગ લીંબાયત વિસ્તારમાં રહેતી હતી.