સુરતમાં ગ્રીષ્મા વેકરીયા હત્યા જેવો વધુ એક કેસ થતા અટક્યો.
સુરતના વરાછામાં યુવતીએ પ્રેમસંબંધ તોડી નાખતા ઉશ્કેરાયેલા પ્રેમીએ યુવતીના પિતા-ભાઈને જાહેરમાં માર માર્યો હતો. બાદમાં પ્રેમીએ યુવતીના ઘરે જઈ તેને જાનથી મારવાની ધમકી આપી હતી.
પિતા ના પાડતા યુવતીએ યુવક સાથે સંબંધ તોડી નાખ્યો
સુરતમાં બનેલી ગીષ્મા વેકરિયા હત્યા કેસ ભુલાયું નથી ત્યાં તો સુરતમાં પુન: ઘટનાનું પુનરાવર્તન થતા રહી ગયું છે. આ અંગે પોલીસ સુત્રોના જણાવ્યા અનુસાર, સુરતના વરાછા વિસ્તારમાં રહેતી એક યુવતીને થોડા મહિના પહેલા દિનેશ ચૌધરી સાથે પ્રેમ સંબંધ હતો. જે વાતની જાણ યુવતીના પિતાને થઈ જતાં યુવતીએ દિનેશ સાથે સંબંધો તોડી નાખ્યા હતાં. તેમ છતાં દિનેશ યુવતીનો પીછો કરી તેની સાથે લગ્ન કરવા માટે દબાણ કરતો હતો.
સંબંધ નહીં રાખે તો આખા ઘરને જીવતા નહીં રહેવા દેવાની ધમકી
આ દરમિયાન રવિવારે યુવતીના પિતા અને ભાઈ કામ પર જતા હતા ત્યારે રસ્તામાં આરોપી દિનેશે તેમને આંતરી ઝઘડો કરી જાહેરમાં માર માર્યો હતો. ઉપરાંત પ્રેમી દિનેશે યુવતીના ઘરે જઈ ‘તું મારી સાથે લગ્ન નહીં કરે તો તને અને તારા પરિવારને જીવતા નહીં રહેવા દઇશ’ તેવી ધમકી આપી હતી. બનાવની ગંભીરતા જોઈને ઇન્સ્પેક્ટર એ. એન. ગાબાણીએ આરોપી દિનેશ વિરુદ્ધ ગુનો દાખલ કરીને તેની ધરપકડ કરી લીધી હતી.