આહવાથી ૩૮ કિલોમીટર દૂર આવેલું ડોન ગામ સહ્યાદ્રિ પર્વતની ખુશનુમા ઊંચાઈ, હરિયાળા ઢોળાવો, નદી, ઝરણાં બધું જ ધરાવે છે.
ગુજરાતમાં આ હિલ્સ્ટેશન આપે છે આનંદ
આહ્વા પાસે આવેલું છે ડોન હિલ્સ્ટેશન
ભોજન, ટ્રેકિંગ અને પ્રકૃતિનો માણી શકાશે આનંદ
પર્યટન સ્થળોમાં હિલ સ્ટેશન સૌથી લોકપ્રિય રહે છે, કારણ કે ઊંચા પર્વત પર હવામાન મોટા ભાગે ખુશનુમા રહે છે. ગુજરાતમાં સાપુતારા અને ગુજરાતને અડીને આવેલું રાજસ્થાનનું આબુ લોકપ્રિય છે, પરંતુ હવે આ હિલ સ્ટેશનોને ટક્કર આપવા ડોન આવી રહ્યો છે. આહવાથી ૩૮ કિલોમીટર દૂર આવેલું ડોન ગામ સહ્યાદ્રિ પર્વતની ખુશનુમા ઊંચાઈ, હરિયાળા ઢોળાવો, નદી, ઝરણાં બધું જ ધરાવે છે. એટલે પ્રકૃતિની મોજ માણવા ડોન હિલ સ્ટેશને જરૂર જવું જોઈએ.
ડોન નામ દ્રોણ પરથી અપભ્રંશ થયું છે
ગામના લોકો કહે છે કે, અહીં આવેલા અહલ્યા પર્વત પાસે ગુરુ દ્રોણનો આશ્રમ હતો. રામાયણ કાળમાં રામ અને સીતા વનવાસ ભોગવતાં હતાં ત્યારે અહીં આવ્યાં હતાં. ખાસ્સા દિવસો અહીં રહ્યાં હતાં. દ્રોણના આશ્રમના કારણે આ જગ્યા દ્રોણ તરીકે ઓળખાતી હતી. તે અંગ્રેજોના શાસન દરમિયાન અપભ્રંશ થઈને ડોન તરીકે ઓળખાવા લાગી છે.
ખળખળ વહેતાં ઝરણાંની મોજ
ડુંગરના ઢોળાવો ઉપર છવાયેલા ઘટાદાર જંગલોમાં વચ્ચે વચ્ચે અનેક જગ્યાએ ખળખળ વહેતાં ઝરણાંમાં હાથ-પગ બોળવાનો રોમાંચ માણી શકાય. અહલ્યા ડુંગર પરથી વહેતાં ઝરણાં ચોમાસા દરમિયાન તળેટીના ભાગે એકઠા થઈને સરસ મઝાનું સરોવર રચે છે. પછી વળી અનેક પ્રવાહોમાં વહચાઈને પાણી આગળ વધે છે. પથ્થ્થરો અને વૃક્ષોનાં વિશાળ થડ સાથે અથડાતાં અને વળાંક લેતાં ઝરણાં પર બે ઘડી આંખ ઠરી જાય.
સ્વયંભૂ શિવલિંગના કરાય છે દર્શન
ઝરણાં જ્યાં પર્વતની કિનારાથી નીચે સ્વયંભૂ શિવ રૂપે પૂજાતા લિંગ પર અભિષેક કરે છે તો શ્રદ્ધાળુ લોકો આપોઆપ નમન કરી લે છે. આ ખુલ્લા શિવ મંદિરની પાસે હનુમાનજીનું મંદિર પણ આવેલું છે. અહીં સહેલાણીઓ માટેની સગવડ પણ વિકાસ પામી રહી છે.
કુકણાં આદિવાસી બોલી
ગુજરાતની દક્ષિણે આવેલ પર્વત વિસ્તારમાં ડાંગ જિલ્લાનું ડોન ગામ નિરાંત, શાંતિ સાથે નદી-ઝરણાં ઉપરાંત ઘનઘોર જંગલ, હરિયાળા ઢોળાવો, સાવ માથાને અડે એવા વાદળ જેવાં બધાં જ આર્કષણ મનને મોજમાં તરબોળ કરી દે છે. અહીંથી મહારાષ્ટ્ર રાજ્યના સટાણાં અને નાસિક જિલ્લાની હદ અડે છે. અહીં આદિવાસી સમુદાયના ૧,૭૦૦ લોકો વસવાટ કરે છે. તેઓ એકબીજાની સાથે ડાંગી ભાષામાં વાત કરે છે જે કુકણાં બોલી તરીકે પણ ઓળખાય છે. મહુડો, ખાખરા, સાગ, સાલ, સીસમ, ટીમરુ, વાંસ અને કરંજ જેવાં વૃક્ષો મોટા પ્રમાણમાં જોવા મળે છે.
સહેલાણીની ભીડ
સહ્યાદ્રિ પર્વતના ઢોળાવો પર વસેલા ડોન સુધી પહાચવા માટે મસુરી, શિમલા કે નૈનિતાલની જેમ, કોઈ વિશાળ એનાકોન્ડાની જેમ વાંકાચૂંકા વળાંક ધરાવતો રસ્તો છે. આ રસ્તા પર ડોન સુધી પહોંચવા વાહન ચાલે ત્યારે પણ ચારે બાજુ વેરાયેલી વનસંપદા જોઈને જ સહેલાણીઓ ખુશ થઈ જાય છે. જોકે અહીં આવતાં પહેલાં ગરમ કપડાંની વ્યવસ્થા જરૂર કરવી, કારણ કે ઊંચાઈએ હોવાથી અહીં ઉનાળામાં પણ ધાબળા ઓઢીને જ સૂવું પડે છે.
આદિવાસી ભોજનનો મળી રહે છે સ્વાદ
અહીં આદિવાસીઓના ઉત્સવ પ્રસંગે વિવિધ ડાંગી નૃત્યોની રમઝટ જામે છે. અહીં વિવિધ પ્રકારનાં ભોજન આપતી રેસ્ટોરાંની સગવડ થઈ ગઈ છે. છતાં ચેન્જ ખાતર ચાહો તો અહીંના આદિવાસી લોકોનું વિશિષ્ટ ભોજન, નાગલીનો રોટલો અને વાંસનાં શાકની મઝા પણ માણી શકાય છે. અહીં રોકાણ માટે ગ્રામ પંચાયત તરફથી રૂમ અને ટેન્ટની સુવિધા ઊભી કરવામાં આવી છે. આ સગવડ નજીવા ચાર્જ ચૂકવીને મેળવી શકાય છે.
આ છે ગામલોકોનો મુખ્ય વ્યવસાય
ગામ લોકોને હિલ સ્ટેશન સાથે રોજગારી મળી
ડોન ગામના લોકોનો મુખ્ય વ્યવસાય ખેતમજૂરી અને પશુપાલન હતો. સાથે મહુડાનાં ફૂલ અને બી, ખાખરાનાં પાન, ટીમરુનાં પાન, સાગનાં બી, કરંજનાં બી જેવી વિવિધ જંગલ પેદાશો તેમજ વાંસની પેદાશો દ્વારા આવક કરી રહ્યા હતા. હિલ સ્ટેશનની ઓળખ મળવાથી લોકોનું જીવનધોરણ પણ સુધરી રહ્યું છે. આવનાર સહેલાણીઓના કારણે ગામના લોકોને આવકનો એક નવો જ સ્ત્રોત મળી ગયો છે.
ટ્રેકિંગ માટે ઉત્તમ ઉતાર-ચઢાવ
૧૦૦૦ મીટરની ઊંચાઈએ આવેલ આ જગ્યા સાપુતારા કરતાં ૧૦૦ મીટર વધારે ઊંચાઈ ધરાવે છે. એમાંય પર્વતના ઢોળાવ અને ખડકોનો આકાર એવો છે કે ટ્રેકિંગ માટે ઉત્તમ રહે છે. એટલે જ જો તમને ટ્રેકિંગમાં રસ હોય તો એક વખત ડોન જરૂર જવા જેવું છે. હિલ સ્ટેશન તરીકે વિકાસ થઈ રહ્યો હોવાથી અહીં પેરાગ્લાઇડિંગ, પેરાસેઇલિંગ, ઝોર્બિંગ એટલે કે પારદર્શક ગોળામાં ગબડવાની મજા, ઝિપલાઇનિંગ એટલે કે ઊંચા દોરડા પર સરકવાનો રોમાંચ કંઈક અનોખો જ હોય છે. પર્વતાળ વિસ્તારમાં રોમાંચક એક્ટવિટી માટે અહીં સગવડ મળી રહે છે.