ઘર કંકાસથી કંટાળેલી મહિલાએ સંયુક્ત પરિવારથી અલગ રહેવાની પકડી હતી હઠ
ભાવનગર સિહોરના નેસડા ગામઘટના
મહિલાએ 2 બાળકો સાથે એસિડ ગટગટાવ્યું
સંયુકત પરિવારમાંથી જુદા રહેવાની હતી જીદ
એક કહેવત છે કે ઘર હોય ત્યાં વાસણ ખખડે.. અને આ જ કહેવતને આપણા વડીલો હસતે મોઢે સ્વીકારી લેતા. પહેલા એવો જમાનો હતો કે સંયુક્ત પરિવારમાં જ લોકો રહેતા હતા અને આખુંય જીવન એમ જ હસતાં ખેલતા કાઢી નાખતા હતા. પણ હાલના સમયની કહાની કઈક અલગ જ છે, સંયુક્ત પરિવાર તો છોડો હવે સંતાન માં બાપને સાથે રાખવા તૈયાર નથી. પત્ની સંયુક્ત પરિવારમાં રહેવા તૈયાર નથી. ભાવનગરના સિહોરનો પણ કઈક આવો જ કિસ્સો સામ આવ્યો છે સંયુક્ત પરિવારથી જુદા રહેવાની જીદે એક પત્નીએ તેના 2 બાળકો સાથે એસિડ ગટગટાવી લીધું છે.
હઠ હતી કે પરિવારથી જુદા રહેવું
ભાવનગર સિહોરના નેસડા ગામ આ ઘટનાએ સૌ કોઈને ચોંકાવી દીધા છે. એક સંયુક્ત મોટા કુંટુંબમાં રહેતા પતિ પત્ની અને બે સંતાનો જીદનો ભોગ બન્યા છે. પરિણીતાએ એવી જીદ પકડી હતી કે તે સયુક્ત પરિવારથી અલગ રહેવા માંગે છે, તેની જીદ પર પતિ પત્ની વચ્ચે રોજ કકળાટ થતો હતો. પતિનું કહેવું હતું કે બાળકો મોટા થશે પછી જ અલગ રહેવા જશે. આખરે ઘર કંકાસ વધી જતાં અને પોતાની હઠ મનાવવા પત્નીએ પોતાના 2 બાળકો સાથે એસિડ પી લીધું.
મહિલા અને બાળકો હોસ્પિટલમાં દાખલ
આવેશમાં આવી પત્નીએ 2 વર્ષના દિકરા અને 4 વર્ષની દિકરીને ઘરે પડેલા બાટલામાંથી પહેલા એસિડ પીવડાવી બાદમાં પોતે ગટગટાવ્યુ હતું. આસપાસના લોકોને જાણ થતાં જ તાત્કાલિક બાળકો સહિત માતાને સારવાર અર્થે હોસ્પિટલમાં ખસેડવામાં આવી હતી. મહિલાને એસિડની અસર થઈ છે પણ બાળકોને એસિડથી વધુ ગંભીર ઈજાઓ પહોંચી છે.
પતિએ પત્ની વિરુદ્ધ પોલીસ ફરિયાદ કરી
પોતાના નાના બાળકોને આવી રીતે મારી નાખવાની કોશિશ કરનાર મહિલા વિરુદ્ધ તેના પતિએ જ હવે ફરિયાદ કરી છે. ભાવનગરના સિહોર પોલીસ સ્ટેશનમાં અંગે ફરિયાદ નોંધાવવામાં આવી છે. પોલીસ આત્મહત્યા કરવાનો પ્રયાસ તેમજ બે બાળકોને મારવાના પ્રયાસનો ગુનો નોંધી તપાસ શરૂ કરી છે. પતિ આ બનાવને લઈને ગંભીર છે બાળકોને ન્યાય મળે તે ઈચ્છી રહ્યો છે
સમગ્ર ઘટના એ વાતની સાબિતી પૂરે છે કે કોઈ પણ નાની મોટી જીદ અને આવેશ તમારા પરિવારને વધુ નુકસાન પહોંચાડી શકે છે. પરિવાર ઝઘડો હોય કે સામાજિક તેનો શાંતિથી બેસીને ઉકેલ મેળવી શકાય છે. આત્મહત્યા કે તેનો પ્રયાસ કરવોએ ગુનો છે. જિંદગીથી હારી જવાની નહીં પણ લડવાની જરૂર છે.