રાજકોટ / હોટલમાં રોકાયા હતા, પછી અચાનક એવું તો શું થયું કે યુવતીની હત્યા કરીને યુવક પોતે પી ગયો એસિડ

• રાજકોટમાં યુવતીની હત્યા બાદ યુવકનો આપઘાતનો પ્રયાસ
• યુવતીની હત્યા બાદ યુવકે પીધું એસિડ
• યુવકે યુવતીની હત્યા કર્યા પહેલા પરિવારને ફોન પર કરી હતી જાણ
• યુવતીએ પણ માતા-પિતા પાસે માગી હતી મદદ

કચ્છનો યુવક અને જામનગરની યુવતી રાજકોટની એક હોટલના રોકાયા હતા. દરમિયાન યુવક અને યુવતી વચ્ચે કંઈક અઘટિત ઘટતાં યુવકે યુવતીની હત્યા કરી દીધી હતી. 

યુવતીએ પણ માતા-પિતા પાસે માગી હતી મદદ

આ અંગે પોલીસ સુત્રોના જણાવ્યા અનુસાર કચ્છનો જેમિશ દેવાયતકા અને જામનગરની એક યુવતી રાજકોટના કરપરામાં નોવા હોટલમાં રૂમ નંબર 301 રોકાયા હતાં. તે દરમિયાન બંન્ને વચ્ચે કંઈક અઘટિત ઘટના બનતા યુવકે યુવતીની હત્યા કરી દીઘી હતી. મહત્વનું છે કે, યુવકે યુવતીની હત્યા કર્યા પહેલા પરિવારને ફોન પર આ અંગે જાણ કરી હતી. બીજી તરફ યુવતીએ પણ પોતાના માતા-પિતા પાસેથી જીવ બચાવવા મદદ માંગી હતી.જો કે, યુવતીના માતા-પિતા રાજકોટ પહોંચે તે પહેલા યુવતીની હત્યા થઈ ગઈ હતી.

યુવકે યુવતીની હત્યા કર્યા પહેલા પરિવારને ફોન પર કરી હતી જાણ

બીજી તરફ યુવતીની હત્યા કર્યા બાદ યુવક જેમિશ દેવાયતકાએ પોતાના ઘરે ફોન કરીને જાણ કરી હતી કે યુવતીએ આપઘાત કરી લીધો છે અને મેં એસિડ પી લીધું છે. જેથી જલ્દી હોટલ પહોંચો.. જેમિશના પરિવારજનો હોટલ પહોંચ્યા જ્યાં યુવતી મૃત હાલતમાં હતી. જ્યારે જેમિશને ગંભીર હાલતમાં હોસ્પિટલ ખસેડવામાં આવ્યો હતો.. યુવતીના ગળાના ભાગે લોક સ્ટ્રીપ બાંધેલું હતું.. આ મામલે પોલીસે યુવતીના પરિવારજનોને જાણ કરતાં પરિવાર પણ ત્યાં દોડી આવ્યો હતો.. યુવકે યુવતીની હત્યા બાદ આત્મહત્યાનો પ્રયાસ કર્યો છે કે કેમ તે મામલે પોલીસે તપાસ હાથ ધરી છે. સાથે જ બન્ને યુવક યુવતીના ફોન તપાસ માટે જપ્ત કર્યા છે.