પોપટપરા નાળામાં 7 ફૂટ જેટલા પાણી ભરાતા કોઈ ગરનાળું પાર કરતાં ફસાયું તો કોઈને પ્રવાહ તાણી લઈ ગયો
રાજકોટમાં ધોધમાર વરસાદ
પોપટપરાના નાળામાં મીની બસ ફસાઇ
મીની બસમાં 3 લોકો ફસાયા હોવાની આશંકા
પ્રવાહમાં તણાયો યુવક
ગુજરાત આખામાં ગુલાબ વાવાઝોડું અને શાહીન વાવાઝોડાની અસરનાં કારણે ધોધમાર વરસાદ વરસી રહ્યો છે. સૌરાષ્ટ્રમાં હજુ આગામી દિવસોમાં ભારે વરસાદની આગાહી કરવામાં આવી છે ત્યાં આજે રાજકોટમાં વરસાદનાં કારણે હાલત ખરાબ થઈ ગઇ હતી. ધોધમાર વરસાદનાં કારણે પોપટપરા નાળામાંમાં વરસાદી પાણી ભરાઈ ગયા હતા જેમા ધસમસતા પ્રવાહમાં એક યુવક તણાઇ ગયો હોવાની ઘટના સામે આવી છે. આવા પ્રવાહમાં મોતને હાથતાળી આપતા યુવકનો વીડિયો પણ સોશ્યલ મીડિયામાં વાયરલ થયો છે.
સ્કૂલ બસમાં ફસાઈ ગયા હતા ત્રણ લોકો
આ પહેલા ગરનાળામાં એક સ્કૂલ બસ ફસાઈ ગઈ હતી. બસમાં ડ્રાઇવર અને મહિલા સવાર હતા જોકે બાદમાં સ્થાનિક લોકોએ પાણીમાં કૂદીને બસને બહાર કાઢી હતી. બસમાં કુલ ત્રણ લોકો સવાર હતા અને માંડ માંડ લોકોને બચાવવામાં આવ્યા
શાહીન વાવાઝોડાનો ખતરો
ગુલાબ વાવાઝોડાની અસર તો હાલ રાજ્યભરમાં જોવા મળી રહી છે. પરંતુ ગુલાબ વાવાઝોડું જેમ-જેમ કચ્છ તરફ આગળ વધી રહ્યું છે.તેમ-તેમ ફરી તે વાવાઝોડાનું રૂપ ધારણ કરી રહ્યું છે અને ગુલાબ વાવાઝોડું શાહિન વાવાઝોડાના સ્વરૂપમાં ફરેવાઈ જશે. જેની સૌથી વધુ અસર સૌરાષ્ટ્ર અને કચ્છના મોટા ભાગના વિસ્તારો પર પડશે.
સૌરાષ્ટ્રમાં ભાદરવો ભર'પૂર'
એવું કહેવાય છે કે, ભાદરવામાં ભાગ્યે જ વરસાદ પડે છે પરંતુ જ્યારે પડે ત્યારે તે ભૂક્કા કાઢનારો વરસાદ હોય છે. ભાદરવાના તડકા જેમ ભારે હોય છે તેમ આ વખતે વરસાદ પણ ભારે પડ્યો છે અને હજુ ગુજરાત પર આગામી ત્રણ દિવસ સુધી ભારેથી અતિભારે વરસાદ પડવાની શક્યતા છે. કારણ કે, ગુલાબ વાવાઝોડાની માત્ર હવાએ જ ગુજરાતને તરબોળ કરી નાખ્યું છે. જેની અસર સૌથી વધુ દક્ષિણમાં વરસાદ સ્વરૂપે જોવા મળી. તો સૌરાષ્ટ્રમાં પણ ધોધમાર વરસાદની શરૂઆત જોવા મળી. અને હજુ આગાહી છે.
સૌરાષ્ટ્ર-કચ્છના 6 જિલ્લામાં ઓરેન્જ અલર્ટ
નોંધનીય છે કે હજુ આગામી 48 કલાક શાહીન વાવાઝોડાને જોતાં ભારે વરસાદની આગાહી કરવામાં આવી છે અને સૌરાષ્ટ્ર અને કચ્છ સહિત કુલ છ જિલ્લામાં ભારે વરસાદનું ઓરેન્જ અલર્ટ આપી દેવામાં આવ્યું છે.