VIDEO / નર્સને હાથ લગાવવા ગયો રોમિયો તો લોકોએ જબરો મેથીપાક ચખાડ્યો, પોલીસે કરી અટકાયત

• ભાવેશ ઝરીયા નામના ૪૫ વર્ષીય ઢગાની એ ડિવિઝન પોલીસે કરી અટકાયત 
• આધેડે સરાજાહેર નર્સની કરી હતી છેડતી 
• છેડતી કરનાર આરોપીની અટકાયત

રાજકોટ શહેરમાં એક ચોંકાવનારો અજીબોગરીબ કિસ્સો સામે આવ્યો છે. શહેરના એ ડિવિઝન પોલીસ સ્ટેશન વિસ્તારમાં આવેલા મંગળા રોડ પર એક યુવતી સાથે છેડતી તેમજ મારામારીની ઘટના પ્રકાસમાં આવી છે. રાજકોટ શહેરમાં ધોળા દિવસે નર્સિંગમાં ફરજ બજાવતી યુવતી સાથે એક આધેડે છેડતી કરી હતી. આ ઉપરાંત યુવતીને માર માર્યો હોવાનું પણ સામે આવ્યું છે. આ સમગ્ર ઘટના સીસીટીવી ફુટેજમાં કેદ થયા બાદ સીસીટીવી સોશિયલ મીડિયામાં વાઇરલ થઇ રહ્યા છે. જેના કારણે સમગ્ર મામલો મીડિયામાં પ્રકાશિત થતાં પોલીસે તાત્કાલીક અસરથી આરોપી ભાવેશ બિજલભાઈ ઝરીયા નામના વ્યક્તિને ઝડપી પાડી અટકાયતી પગલા લીધા છે. 

VIDEO: નર્સને હાથ લગાવવા ગયો રોમિયો તો લોકોએ જબરો મેથીપાક ચખાડ્યો, પોલીસે કરી અટકાયત#Rajkot pic.twitter.com/QqJ19VcKsk

— VTV Gujarati News and Beyond (@VtvGujarati) May 10, 2022

શહેરીજનોએ યુવતીને આરોપીની ચુંગલમાંથી બચાવી
તાજેતરમાં જ સુરત કોર્ટ દ્વારા ગ્રીષ્માંના હત્યારા ફેનીલને ફાંસીની સજા સંભળાવી છે. ગ્રીષ્માંની હત્યા સમયના વિડીયો પણ વાયરલ થયા હતા. વાયરલ થયેલા વિડિયો બાદ સૌ કોઈ એક જ વાત કહેતું હતું કે ત્યાં હાજર રહેલા લોકો પૈકી ત્રણ ચાર લોકોએ પણ જો હિંમત દાખવી હોત તો ગ્રીષ્માં જીવીત હોત. ત્યારે રાજકોટ શહેરમાં એ ડિવિઝન પોલીસ સ્ટેશન વિસ્તારમાં આવેલા મંગળા રોડ પર નર્સિંગના વ્યવસાય સાથે જોડાયેલી એક યુવતી જઈ રહી હતી. આ સમયે ત્યાં ભાવેશ જરીયા નામના આધેડે યુવતી સાથે પ્રથમ છેડતી કરી અને ત્યારબાદ તેને માર મારવા લાગ્યો હતો. આ દરમિયાન ત્યાંથી પસાર થઇ રહેલા અન્ય એક આધેડે પોતાના ટુ વ્હીલર ઊભું રાખી યુવતીને ભાવેશના ચુંગલમાંથી બચાવવાનો સતત પ્રયત્ન કર્યો હતો. 

આરોપીને સરાજાહેર મેથીપાક ચખાડ્યો 
ત્યારબાદ એક બાદ એક રસ્તા પરથી નીકળનારા લોકો એકઠા થઇ ગયા હતા અને ભાવેશના સકંજામાંથી યુવતીને છોડવાના પ્રયત્નો કરવામાં આવ્યા હતા. આ સમયે રીક્ષામાંથી પસાર થનાર એક યુવાન રિક્ષામાંથી નીચે ઉતરી આવ્યો હતો અને રીક્ષામાં પડેલી લાકડી વડે આરોપીને સરાજાહેર મેથીપાક ચખાડ્યો હતો. નશામાં આધેડે નર્સ સાથે જાહેરમાં છેડતી કરી હોવાની ચર્ચા જાગી છે. 

પોલીસે ગણતરીની  કલાકોમાં આરોપીને દબોચી લીધો
સમગ્ર મામલાની જાણ પોલીસને થતાં પોલીસ દ્વારા યુવતીને નિવેદન તેમજ ફરિયાદ નોંધાવવા માટે એ ડિવિઝન પોલીસ ખાતે બોલાવવામાં આવી હતી. તેમજ ગણતરીની જ કલાકમાં આરોપી ભાવેશ જરિયાને રાઉન્ડઅપ કરી તેની અટકાયત પણ કરવામાં આવી છે. આમ, રાજકોટની જનતાએ ફરી એક વખત સાબિત કરી દીધું છે કે દીકરીઓ અને બહેનોની લાજ બચાવવા તેઓ કંઈ પણ કરી છૂટશે. તો બીજી તરફ પોલીસે પણ ગણતરીની જ કલાકોમાં આરોપીને ઝડપી પાડી યશસ્વી ફરજ નિભાવી છે.