તમારા કામનું / રેલ યાત્રીઓ માટે ખુશખબર! હવે મુસાફરી દરમિયાન નહીં આપવો પડે આ ચાર્જ, ચા-પાણીનાં રૂપિયા બચી જશે

• રેલવે બોર્ડે IRCTCને પરિપત્ર જાહેર કરવા કહ્યું 
• રાજધાની, શતાબ્દી, વંદે ભારતમાં નહીં વસુલાય આ ચાર્જ 
• નાસ્તા અને રાત્રીભોજન પર લાગશે 50 રૂપિયા

જો તમે ટ્રેન  (Indian Railway) દ્વારા મુસાફરી કરો છો, તો તમારા માટે એક સારા સમાચાર છે. રાજધાની, શતાબ્દી, દુરંતો અને વંદે ભારત જેવી ટ્રેનોમાં હવે ચા-પાણી વ્યાજબી દરે મળશે. હવે તમારે આ ટ્રેનોમાં ચા-પાણીનો ઓર્ડર આપવા માટે 70 રૂપિયા ચૂકવવા પડશે નહીં. જો કે, પ્રીમિયમ ટ્રેનોમાં (Service charge in premium trains) નાસ્તો અને ભોજનનો ઓર્ડર આપવા પર સર્વિસ ચાર્જ ચૂકવવો પડશે. 

IRCTCને લેખિતમાં આપવામાં આવી સુચના 
આ અંગે IRCTCને લેખિત સૂચના આપવામાં આવી છે. હાલમાં આ ટ્રેનોમાં ખાવા-પીવાનો ઓર્ડર આપવા માટે સર્વિસ ચાર્જ તરીકે 50 રૂપિયા અલગથી વસૂલવામાં આવે છે. રેલ્વે બોર્ડે કહ્યું કે વર્તમાન નિયમો અનુસાર જો આ ટ્રેનોમાં ટિકિટ બુકિંગ દરમિયાન કેટરિંગ સર્વિસનો વિકલ્પ પસંદ કરવામાં આવ્યો નથી અને જો પ્રવાસી મુસાફરી દરમિયાન કંઈક ઓર્ડર કરે છે તો 50 રૂપિયા સર્વિસ ચાર્જ તરીકે લેવામાં આવે છે. જે મુસાફરો ટિકિટ બુક કરાવતી વખતે કેટરિંગ સર્વિસનો ચાર્જ ચૂકવે છે, તેમણે મુસાફરી દરમિયાન કોઈપણ પ્રકારનો ચાર્જ ચૂકવવો પડતો નથી.

માત્ર ચા-પાણી પર સર્વિસ ચાર્જ માફ 
રેલવે બોર્ડે કહ્યું કે માત્ર ચા-પાણી પર સર્વિસ ચાર્જ માફ કરવામાં આવ્યો છે. જો ટિકિટ બુકિંગ દરમિયાન કેટરિંગ સેવાનો લાભ લેવામાં ન આવે તો નાસ્તો, લંચ અને ડિનર ઓર્ડર કરવા પર 50 રૂપિયાનો અલગ સર્વિસ ચાર્જ વસૂલવામાં આવશે. જે મુસાફરો ટિકિટ બુકિંગ દરમિયાન આ સેવા પસંદ કરશે તેઓ આ ચાર્જમાંથી બચી જશે. સવારની ચાના ચાર્જ હવે બંને શ્રેણીના મુસાફરો માટે સમાન હશે.

જો ટ્રેન લેટ થશે તો ચાર્જ સમાન રહેશે
રેલવે બોર્ડ દ્વારા IRCTCને જારી કરાયેલા પરિપત્રમાં સ્પષ્ટપણે કહેવામાં આવ્યું છે કે રાજધાની, દુરંતો, શતાબ્દી અને વંદે ભારત જેવી ટ્રેનોમાં ચા, નાસ્તો, લંચ અને ડિનરનો સર્વિસ ચાર્જ અલગથી વસૂલવામાં આવે છે. તે GST સાથે સામેલ છે. જો કોઈ ટ્રેન મોડી ચાલી રહી છે, તો બંને શ્રેણીના મુસાફરો માટે તમામ પ્રકારના ખાદ્યપદાર્થોના ચાર્જ સમાન હશે.