મોડી રાત્રે નોકરીથી છુટીને ઘરે જતા સમયે તેમણે રીક્ષા કરી મુસાફર માણેકબાગ ગયો, બાદમાં વધુ ભાડાની માંગ કરી યુવકને લૂટી લીધો
મોડી રાત્રે રીક્ષામાં મુસાફરી કરવી જોખમી સાબિત થઈ
માણેકબાગ ઉતારી 2 શખ્સોએ યુવકને લૂંટી લીધો
પોલીસ સીસીટીવીના આધારે ઝડપી ઈસમોને ઝડપી પાડયા
અમદાવાદમાં રીક્ષામાં મુસાફરી કરવી દિવસેને દિવસે જોખમી બનતી જાય છે. એક તરફ જ્યાં વસ્ત્રાપુરમાં રીક્ષામાં બેસાડી મુસાફરના રોકડ 8.50 લાખની ચોરીની ધટના સામે આવી હતી જેના ગણતરીના દિવસો જ થયા છે તેવામાં પાલડીમાં રીક્ષામાં મુસાફરી કરી રહેલા યુવકને રાતનાં સમયે એકલતાનો લાભ લઈને લૂંટી લેવામાં આવતા ચકચાર મચી છે.
રીક્ષા ચાલકે લૂટી લીધો
પાલડી પોલીસની ગીરફ્તમાં દેખાતા આ આરોપીઓના નામ છે રવી સલાટ અને વિજય ઉર્ફે અજ્જુ દંતાણી. બન્ને આરોપીઓએ અન્ય એક આરોપી સાથે મળીને એક યુવકને લૂંટ્યો હોવાથી જેલના સળીયા ગણવાનો વારો આવ્યો છે. વાસણા વિસ્તારમાં રહેતા આકાશ બુલાણી નવરંગપુરા વિસ્તારમાં ટેલીસેલ્સમાં નોકરી કરે છે. ત્યારે મોડી રાત્રે નોકરીથી છુટીને ઘરે જતા સમયે તેમણે રીક્ષા કરી માણેકબાગ જવાનું જણાવ્યું હતું. જ્યાં આરોપીઓેએ યુવકને રીક્ષામાં ઉતાર્યા બાદ તેનો પીછો કરી તેની પાસે રહેલા મોબાઈલ અને રોકડ રકમની લૂંટ ચલાવી હતી.
સીસીટીવીમાં રીક્ષા દેખાતા દબોચ્યો
લૂંટની ઘટના બનતા આ મામલે પાલડી પોલીસ મથકે ફરિયાદ નોંધાઈ હતી. માણેકબાગ ઉતરીને ફરિયાદી ચાલતા જઈ રહ્યા હતા ત્યારે ત્રણેય આરોપીઓએ વધુ ભાડાની માંગ કરી બે આરોપીઓએ યુવકને પકડી રાખી અન્યએ મોબાઈલ, રોકડ અને પાકિટની લૂંટ ચલાવી હતી અને તમામ આરોપીઓ ફરાર થઈ ગયા હતા. જે મામલે પાલડી પોલીસે તપાસ કરતા સીસીટીવીમાં રીક્ષા દેખાતા તેનાં આધારે રાણીપમાં રહેતા બન્ને આરોપીઓને ઝડપી ગુનાનો ભેદ ઉકેલ્યો છે.
આરોપીનો ગુનાહિત ઈતિહાસ
મહત્વનું છે કે આરોપીઓને ઝડપી તપાસ કરતા સામે આવ્યું કે આરોપી રવી સલાટ 2020માં રાણીપમાં 10 લાખની લૂંટના ગુનામાં ઝડપાયો હતો. જેથી પાલડી પોલીસે આરોપીઓને કોર્ટમાં રજૂ કરી રિમાન્ડ મેળવી આરોપીઓનાં ગુનાહિત ઈતિહાસ અંગે પુછપરછ કરતા કવાયત હાથ ધરી છે.