ભૂખમરો / એટમ બોમ્બ વાળા પાકિસ્તાનમાં લોટનો દુકાળ, 10 હજારનો ગેસ સિલિન્ડર, બસ હવે 21 દિવસ..

• પાકિસ્તાનમાં આર્થિક મંદીનો એટેક
• પાકિસ્તાનમાં સરકાર પાસે નથી પૈસા, નથી અનાજ
• પાકિસ્તાનમાં રાશનની ગાડી પર લોકો તુટી પડે

પરમાણુ બોમ્બની વાત કરતુ પાકિસ્તાન હાલમાં મોંઘવારી અને બેકારીનો માર સહન કરી રહ્યું છે. આર્થિક મંદીથી પસ્ત થયેલું પાકિસ્તાન લાચાર દેખાઈ રહ્યું છે. આ પાકિસ્તાનના દ્રશ્યો છે. જ્યાં એક નવી જંગ ચાલી રહી છે. એક બોરી લોટ માટે લોકો મરવા, મારવા પર ઉતરી આવ્યા છે. બલુચિસ્તચાન જેવા વિસ્તારમાં તો સ્થિતિ અત્યંત દયનીય બની ગઈ છે. અહીં બંદુકથી લોટની રખવાળી થઈ રહી છે. લોકોને લોટ લેવા જવું એક જંગના મેદાનમાં જવા જેટલુ ખતરનાક બની ગયું છે. જેવી રાશનની ગાડી આવે છે કે લોકો તેની આસપાસ તુટી પડે છે.

પાકિસ્તાનમાં આર્થિક મંદીનો એટેક
બરબાદી, અફરાતફરી, ભાગદોળ, લૂંટ, કંગાળી, અને બેહાલી આ છે પાકિસ્તાનની હાલત. પાકિસ્તાન પાસે પોતાની ભુખી જનતાને ખવડાવવા માટે લોટ પણ નથી. અહીં સરકારી અનાજની ટ્રક જઈ રહી છે અને લોકો પોતાનો જીવ હથેળી પર લઈને લોટ ખરીદવા માટે નીકળ્યા છે. ટ્રક વાળો કહે છે કે લોટ પુરો થઈ ગયો, પાકિસ્તાનના ગામે ગામમાં આવી જ સ્થિતી છે. સવારથી સાંજ થઈ જાય છે પરંતુ એક થેલી લોટ નથી મળતો. પાકિસ્તાનીઓ સામે હવે માત્ર આત્મહત્યાનો વિકલ્પ બચ્યો છે.

પાકિસ્તાનમાં ફાટ્યો મોંઘવારી બોમ્બ
દેશ તો પહેલાથી જ બરબાદ હતો. શહબાજ શરીફે વધારે બરબાદ કરી દીધો. આ પાકિસ્તાનનું પંજાબ છે જ્યાં સૌથી વધુ ઘઉં થાય છે તેમ છતાં અહીં લોકો લોટ માટે લાઈનમાં ઉભા છે. પાકિસ્તાનમાં સ્થિતી એવી છે કે લોટ માટે ગૃહ યુધ્ધ થઈ જાય. સરકાર સસ્તા લોટનું વિતરણ કરી રહી છે પરંતુ તે ફક્ત શહેરી વિસ્તારમાં. નાના ગામડાઓમાં સ્થિતી ખુબ જ કફોડી છે. લોકોને એક બોરી લોટ લેવા માટે સવારથી સાંજ સુધી લાઈનમાં ઉભા રહેવું પડે છે. અને એક બોરી લોટ મળ્યા પછી તે પણ ઘરે પહોંચશે કે કેમ તે સવાલ હોય છે. કારણ કે ઘર સુધી પહોંચતા પહોંચતા લુંટાઈ જવાનો ડર રહે છે.

સરકાર પાસે નથી પૈસા, નથી અનાજ
ઘઉંનો લોટ 200 રૂપિયે કિલો, ચિકન 700 રૂપિયે કિલો તેમજ એલપીજી ગેસ 10 હજાર રૂપિયાનો સિલિન્ડર તો ડુંગળી 280 રૂપિયે કિલો છે. સરસવનું તેલ 600 રૂપિયે લીટર, દૂધ 200 રૂપિયે લીટર અને તુવેર દાળ 500 રૂપિયે કિલો છે. શું બિરિયાની શું બટર ચિકન માનો કે ન માનો પરંતુ પાકિસ્તાનના લોકો માટે આ બધું જ હવે સપનું બની ગયું છે. મોંઘવારી બોમ્બનો એવો સિરિયલ બ્લાસ્ટ પાકિસ્તાનમાં થયો છે કે દાળ રોટી માટે ખુનામરકી થઈ જાય તેવી સ્થિતી છે. કલાકો સુધી લાઈનમાં ઉભા રહીને કદાચ લોટ મળી પણ જાય. સોનું ચાંદી ગીરવે મુકીને દાળ અને તેલની વ્યવસ્થા કદાચ થઈ પણ જાય તો પણ તેને પકાવવું કઈ રીતે તેની ચિંતા પણ પાકિસ્તાનીઓને અંદરથી સતાવી રહી છે. કારણ કે રસોઈ ગેસની કિંમત સાંભળશો તો પગ નીચેથી જમીન સરકી જશે. પાકિસ્તાનમાં ગેસનો એક સિલિન્ડર લેવા માટે 10 હજાર રૂપિયા લાગે છે.

મોંઘવારીથી પસ્ત થયું પાકિસ્તાન
પાકિસ્તાનમાં હાલત એવી છે કે ગેસના સિલિન્ડરની પણ અછત સર્જાઈ છે જેને લઈ લોકો પ્લાસ્ટિક બેગમાં ગેસ ભરીને ઉપયોગ કરી રહ્યા છે. વધતી મોંઘવારીના કારણે લોકો માટે ગેસ સિલિન્ડર ખરીદવાનું મુશ્કેલ બન્યું છે. એટલે લોકો પ્લાસ્ટિક બેગમાં ગેસ ભરી લઈ જઈ રહ્યા છે. પાકિસ્તાનનો એક વીડિયો સોશિયલ મીડિયા પર જોરદાર વાઈરલ થઈ રહ્યો છે જેમાં એક બાળક પ્લાસ્ટિક બેગમાં રસોઈ ગેસ ભરાવીને લઈ જઈ રહ્યો છે.

પાકિસ્તાનમાં મોંઘવારી આસમાને
સામાન્ય જનતા રસ્તા પર બે ટંકનું જમવાનું મેળવવા સંઘર્ષ કરી રહી છે તો પાકિસ્તાનના સરકારી કર્મચારીઓ પોતાનો પગાર મેળવવા માટે લડી રહ્યા છે. પાકિસ્તાનની સરકારી તિજોરી તળીયાઝાટક થઈ ગઈ છે ત્યારે સરકારી કર્મચારીઓને પગાર માટે 20થી 25 દિવસ સુધી રાહ જોવી પડી રહી છે. વર્ષ 2022માં પાકિસ્તાને જેમ તેમ કરી ભુખમરા અને ગરીબી સામે લડી તો લીધું પરંતુ 2023માં પાકિસ્તાન આર્થિક કંગાળીની એવી ભીંસમાં આવ્યું છે જ્યાં ગમે ત્યારે વિદ્રોહનો ધમાકો થઈ શકે. પાકિસ્તાનના સત્તાધિશો પાસે હવે જનતાને આપવા માટે દિલાસા સિવાય બીજુ કશું જ નથી. સેનાનો સાથ લઈ શાહબાજ શરીફે ઈમરાન ખાન પાસેથી સત્તા તો મેળવી લીધી છે પરંતુ ખાલી ખજાનાના બાદશાહને હવે સમજાતું નથી કે દેશને કેવી રીતે બચાવવો અને જનતાને શું ખવડાવવું? 

આર્થિક તંગીની પોલ ખોલી
પાકિસ્તાનથી આવેલી અન્ય એક ખબરે તેની આર્થિક તંગીની પોલ ખોલી દીધી. આર્થિક સંકટ સામે લડી રહેલા પાકિસ્તાનમાં હવે બજાર, મરેજ હોલ, રેસ્ટોરન્ટ, મોલ વગેરે વહેલા બંધ કરી દેવાનો આદેશ આપવામા આવ્યો છે. સરકારી કર્મચારીઓને વર્ક ફ્રોમ હોમ કરવાનો આદેશ આપવામાં આવ્યો છે. પાકિસ્તાનના રક્ષામંત્રી ખ્વાજા આસિફે એક પ્રેસ કોન્ફરન્સ કરી આ નવા નિયમોની જાણકારી આપી. સરકારે તેને નવી ઉર્જાનીતિનું નામ આપ્યું છે. પરંતુ તેનું સાચુ કારણ તો પાકિસ્તાનની ખરાબ આર્થિક સ્થિતી છે. પાકિસ્તાનમા બજાર અને મોલ સાડા આઠ વાગ્યા સુધીમાં બંધ કરી દેવાનો આદેશ આપવામાં આવ્યો છે. સરકારનો દાવો છે કે તેનાથી 273.4 મિલિયન ડોલરની બચત થશે. મેરેજ હોલ પણ સાડા આઠ વાગ્યા સુધીમાં બંધ કરી દેવામાં આવશે એટલું જ નહીં વીજળીથી ચાલતા પંખા બનાવનારી કંપનીને પણ બંધ કરી દેવામાં આવશે.

કરજામાં ડુબેલા પાકિસ્તાનનું દેવાળુ નીકળી ગયું
પાકિસ્તાની સ્થિતી હવે દુનિયાથી અજાણ નથી. પાકિસ્તાનથી વધુ એક ખબર આવી છે જેમાં સામે આવ્યું કે પાકિસ્તાનમાં ટ્રેન ચલાવવા માટે હવે ગણતરીના દિવસો ચાલે તેટલું જ તેલ બચ્યું છે. એટલે પાકિસ્તાનમાં થોડા દિવસોમાં ટ્રેન પણ થંભી જાય તો નવાઈ નહીં. વર્ષ 2023માં પાકિસ્તાનને દેશ ચલાવવા માટે જેટલા પૈસા જોઈએ તેના કરતા અનેક ગણી વધારે તેની પાસેથી કર્જની વસુલી થશે. કરજામાં ડુબેલા પાકિસ્તાનનું દેવાળુ નીકળી ગયું છે. અર્થવ્યવસ્થા ICUમાં છે અને આયાત નિકાસના રસ્તાઓ બંધ થઈ ગયા છે. એવામાં પાકિસ્તાનમાં હવે એવો કોહરામ મચવાનો છે જેમાં ન તો ઈસ્લામાબાદ બચશે કે ન કરાંચી.

પાકિસ્તાનને કોઈ જ રીલીફ પેકેજ મળી રહ્યું નથી
પાકિસ્તાન પર આઈએમએ, વર્લ્ડ બેન્ક, ચીન અને અન્ય દેશોનું મળીને જે દેવું છે તે તેની કુલ જીડીપીના 70 ટકા સુધી પહોંચી ચુક્યું છે. એટલે કે પાકિસ્તાન જેટલું કમાશે તેના કરતા અનેક ગણા તેને પરત આપવાના છે. ખુદ પાકિસ્તાન સેન્ટ્રલ બેંક અને સ્ટેટ બેંક ઓફ પાકિસ્તાને સરઅંડર કરી દીધું છે અને પોતાના રીપોર્ટમાં જણાવ્યું છે કે તેમની પાસે માત્ર ત્રણ સપ્તાહ ચાલે તેટલો જ મુદ્રા ભંડાર બચ્યો છે. દેવામાં ડુબેલા પાકિસ્તાનને હવે ફરી કરજાનો જ સહારો છે. આ માટે પાકિસ્તાનના પીએમ શહબાઝ શરીફ છેલ્લા આઠ મહિનાથી દુનિયાના ચક્કર લગાડી રહ્યા છે. ચીન અને સાઉદી અરબ જેવા દેશ પાસેથી મદદ માંગી રહ્યા છે. પરંતુ પાકિસ્તાનને કોઈ જ રીલીફ પેકેજ મળી રહ્યું નથી.