દાદાગીરી! / VIDEO: મહેસાણામાં માસ્કના નામે પોલીસે પિતા-પુત્રને ફટકાર્યા, ઉલ્ટા ચોર કોટવાલ કો દાટે જેવી સ્થિતિ

• મહેસાણામાં માસ્કના નામે પોલીસની દંડાવાળી
• મોઢે માસ્ક પહેરવા મામલે પિતા-પુત્રને માર્યો માર
• એક્ટિવા ઉપર જઈ રહેલા પિતા-પુત્રને દંડાથી ફટકાર્યા 

મહેસાણામાં ઉલ્ટા ચોર કોટવાલનો દાંડે તેવી ઘટના સામે આવી છે. શહેરના મોઢેરા ચાર રસ્તા પર માસ્કના નામે પોલીસે પિતા-પુત્ર પર દંડાવાળી કરી છે. મોઢે માસ્ક પહેરવા મામલે પોલીસ કર્મીએ એક્ટિવા પર જઇ રહેલા પિતા-પુત્ર સાથે રકઝક કરી હતી અને ત્યારબાદ દંડા ફટકાર્યા હતા. આ મારામારીનો વીડિયો પણ સોશિયલ મીડિયામાં વાયરલ થયો છે. જેમાં પોલીસકર્મીએ પણ મોઢા પર માસ્ક નથી પહેર્યું છતાં એક્ટિવા ચાલક પિતા પુત્રને માર માર્યો હતો.

આણંદમાં પણ માસ્કને લઈ પોલીસ સાથે રકઝક

આણંદમાં માસ્કને લઈ પૂર્વ કાઉન્સિલર-પોલીસ વચ્ચે ઘર્ષણ સર્જાયું હતું. ભાજપના પૂર્વ કાઉન્સિલરે મહિલા પોલીસ સાથે બોલાચાલી કરી હતી. ભાજપના પૂર્વ કાઉન્સિલર યોગેશ બાપજીએ બોલાચાલી કરી હોવાનો વીડિયો સામે આવ્યો છે. માસ્ક ન પહેરેલા યુવાનો પાસે દંડ માગતા બબાલ થઈ હતી. ગ્રીડ ચાર રસ્તા પાસેનો બનાવ છે.  

ગઈકાલે પણ તંત્ર અને સામાન્ય પ્રજા વચ્ચે તકરાર પણ વધી રહી છે. મહેસાણાના અનુપ આર્કેડ માર્કેટમાં વેપારી અને પોલીસ વચ્ચે માસ્કને લઈને તકરાર થઈ હતી. માસ્ક પેહેરવા બાબતે પોલીસે વેપારીને ટોક્યો હતો તો બીજી તરફ વેપારીએ પોલીસ પર દુકાનનો દરવાજો તોડી અંદર પ્રવેશ કરી માસ્કનો દંડ ઉઘરાવ્યો હોવાનો આક્ષેપ કર્યો હતો. ઉલ્લેખનીય છે કે સમ્રગ ઘટનાનો વીડિયો સોશિયલ મીડિયામાં વાયરલ પણ થયો હતો.

મહેસાણામાં કોરોનાના કેસોમાં સતત વધારો જોવા મળી રહ્યો છે. ત્યારે શહેરમાં વેપારી એસોસિએશનની બેઠક મળી હતી. બેઠકમાં રવિવારના દિવસે ભરાતા ગુજરી બજારને બંધ રાખવાનો નિર્ણય લેવામાં આવ્યો છે. તથા આવતીકાલથી શહેરના બજારોને સાંજે 6 વાગ્યાથી બંધ રાખવાનો નિર્ણય લેવામાં આવ્યો છે.