મહિસાગરના વીરપુરમાં 2 યુવાનો નદીમાં ડૂબ્યા, 1નો મળી આવ્યો મૃતદેહ, 1ની શોધખોળ શરૂ
વીરપુરમાં 2 યુવાનોએ નદીમાં લગાવી છલાંગ
નદીમાં છલાંગ લગાવતો વીડિયો આવ્યો સામે
એક યુવાનનો મળ્યો મૃતદેહ, એક લાપતા
કોણ જાણે શેની હોડ લગાવે છે આ યુવાનિયા કે જીવ ગુમાવવાનો પણ ડર રહેતો નથી. મહિસાગરના વીરપુરમાં નદીમાં બે યુવાનો ડૂબ્યા હોવાનું સામે આવ્યું છે. મહિસાગર નદીમાં બે યુવાનોએ છલાંગ લગાવી હતી. નદી પરના બ્રિજ પરથી યુવાનો છલાંગ લગાવતા હોય તેવો વીડિયો સામે આવ્યો છે. આ વીડિયોમાં કુલ પાંચ લોકો બ્રિજ પર ઉભા હોવાનું જોવા મળી રહ્યું છે.
વીરપુર નદીમાં 2 યુવાનો ડૂબ્યા
નદી પરથી છલાંગ મારતા હોય તેવો વીડિયો સામે આવ્યો છે. બંને યુવકોને નદીમાં તરતા જોઇને એવુ લાગી રહ્યું છે કે જાણે બંને વચ્ચે કોઇ જામી હોય. શા કારણે તેઓએ નદીમાં છલાંગ લગાવી તે સામે આવ્યુ નથી. પરંતુ આ બંને યુવતો વહેતા પાણીમાં તણાઇ ગયા. નદીમાં પાણીનો પ્રવાહ એટલો હતો કે તેઓ સહન કરી શક્યા નહી . જેમાંથી એક યુવાનનો મૃતદેહ તો મળી આવ્યો છે જ્યારે અન્ય એક યુવાન હજુ લાપતા છે. ઘટનાને પગલે પરિવારમાં શોકની લાગણી ફરી વળી છે. જ્યારે અન્ય એક યુવાનને શોધવાની કામગીરી ચાલી રહી છે.
ધુળેટી દરમિયાન 6 યુવાનો ડૂબ્યા
મહીસાગરમાં ધૂળેટી દરમિયાન કુલ 6 લોકો ડૂબી ગયા હોવાનું સામે આવ્યુ હતું. તેઓ ધૂળેટી રમીને નદીમાં ન્હાવા પડ્યા હતા અને ડૂબવાથી મોત નીપજ્યું હતું, મહીસાગર નદીમાં લુણાવાડાના હાડોડ નજીક 2 યુવકોના ડૂબી જતા મૃત્યુ થયા હતા. જ્યારે ઢેસિયા ગામના બે યુવકો હાડોડ નજીક નદીમાં ડૂબ્યા ગયા હતા. જ્યારે વણાંકબોરી નજીક પણ 4 યુવાનો ડૂબ્યા હોવાનું સામે આવ્યુ હતું.