હાલમાં કમલમ ફ્રૂટની સિઝન ન હોવાથી બોક્સમાં કેળા મુક્યા? નેતાઓએ હસતાં મોઢે ફોટા પણ પડાવ્યા કાર્યક્રમ બાદ બોક્સ ખૂલ્યા તો બોલતી બંધ
ભુજમાં CM ભૂપેન્દ્ર પટેલની કરાઇ તુલા
કમલમ ફ્રૂટના નામે કેળાથી તુલા કરાઇ
સમગ્ર ઘટનાનો વીડિયો થયો વાયરલ
ભુજમાં કચ્છ ભાજપ દ્વારા સ્નેહમિલન કાર્યક્રમ યોજાયો હતો. ત્યારે આ દરમિયાન CM ભૂપેન્દ્ર પટેલની તુલા કરાઇ હતી. CM ભૂપેન્દ્ર પટેલની કમલમ ફ્રૂટ દ્વારા અગ્રણી સમૂહ દ્વારા તુલા કરવામાં આવી હતી. જો કે કાર્યક્રમ પૂર્ણ થયા બાદ બોક્સ ખોલીને જોતા બોક્સમાં કમલમ ફ્રૂટ નહીં પરંતુ કેળા નીકળ્યા હતા. એક બોક્સ સિવાય અન્ય તમામ બોક્સમાં કેળા નીકળ્યા. ત્યારે આ સમગ્ર ઘટનાનો વીડિયો વાયરલ થઇ રહ્યો છે.
એક જ બોક્સમાં કમલમ ફ્રૂટ બાકીનામાં કેળા
ફ્રૂટમા મોઘું અને શરીર માટે ગુણકારી એવા ડ્રેગન ફ્રૂટને તત્કાલીન રૂપાણી સરકારે કમલમ ફ્રૂટ નામ આપ્યું છે. ત્યારે બુધવારના સુમારે કચ્છ ભાજપ પ્રેરિત સ્નેહમિલન કાર્યક્રમમાં સીએમ ભૂપેન્દ્ર પટેલે હાજરી આપી હતી. જેમાં તેમનું સ્વાગત વિધીમાં જાહેર મંચ પર કીમતી કમલમ ફ્રૂટ દ્વારા તુલા કરવામાં આવી હતી. જેમાં ભાજપના મોટા ગજાના નેતાઓએ ખિલખિલાટ ચહેરે સીએમની કમલમ ફ્રૂટથી કરવામાં આવી રહેલી તુલામાં ફોટો પડાવ્યા હતા . પણ કાર્યક્રમ બાદ જાણે કમલમનાં બોક્સ ઉત્સાહભેર ખોલ્યા તો એમાંથી કીમતી કમલમ ફ્રૂટની જગ્યાએ સસ્તા ભાવના કેળા નીકળતા કુતૂહલ સર્જાયુ છે.
કચ્છ ભાજપના નેતાઓએ મૌન સેવ્યું
100થી 120 રૂપિયે કિલો ભાવે વેચાતા કમલમ ફ્રૂટના સ્થાને ઉપરના એક બોક્સ સિવાયનાં બાકીના બધા જ બોક્સમાંથી કેળા જ નીકળ્યા હતા. બોક્સ પર કમલમ ફ્રૂટનું હતું પણ કોઈએ બેદરકારીથી બોક્સ બદલાણા કે પછી જાણી જોઈએને કમલમ ફ્રૂટના નામે કેળાથી તુલા કરવામાં આવી તે તપાસનો વિષય છે. સવાલ એ છે કે CMના કાર્યક્રમથી બાજ નજરે તમામ વસ્તુઓ પર નજર રાખતી હોય છે પણ કમલમના સ્થાને કેળાં આવી જવા પણ મોટી લાપરવાહી કહી શકાય. સમગ્ર મામલે હાલ તો કચ્છ ભાજપના નેતાઓએ મૌન સેવ્યું છે.