માથાકૂટ / જુનાગઢ સિવિલમાં મૃતક દર્દીના સગા વિફર્યા, સિક્યુરીટી ગાર્ડ પર લોખંડના સ્ટેન્ડ વડે જીવલેણ હુમલાનો વીડિયો વાયરલ

• સિક્યુરીટી ગાર્ડ પર હુમલો
• દર્દીના સગાઓએ મચાવ્યો હોબાળો
• જૂનાગઢ સિવિલ હોસ્પિટલની ઘટના

જૂનાગઢ સિવિલ હોસ્પિટલમાં મારામારીની ઘટના સામે આવી છે. દર્દીના સગાઓએ સિક્યુરીટી ગાર્ડ પર લોખંડના સ્ટેન્ડ વડે હુમલો કરતાં હોસ્પિટલમાં અફરાતફરીનો માહોલ સર્જાયો હતો. સમગ્ર ઘટનાનો વીડિયો સામે આવતા ચકચાર મચી છે. 

દર્દીનુ મૃત્યુ થતા સગાસંબધીઓએ મચાવ્યો હોબાળો
જૂનાગઢ સિવિલ હોસ્પિટલમાં સારવાર લઈ રહેલા દર્દીનું મૃત્યુ થતાં પરિવાર હોસ્પિટલ પર દોષનો ટોપલો નાખી રહ્યો હતો અને હોસ્પિટલ સ્ટાફ સાથે ગેરવર્તન કરી રહ્યો હતો. મામલાને શાંત પાડવા માટે સિક્યુરીટી ગાર્ડ દર્દીઓના સગાને રોકી રહ્યો હતો. અચાનક જ દર્દીના સગાઓએ લોખંડના સ્ટેન્ડ લઈને સિક્યુરીટી ગાર્ડને ફરી વળ્યા હતા. તેમજ માથાના ભાગે અને શરીર પર લોખંડના સ્ટેન્ડના ફટકા માર્યા હતા જે વાયરલ વીડિયોમાં સ્પષ્ટ જોઈ શકાય છે. સિક્યુરીટી ગાર્ડ પોતાનો બચાવ કરતાં લોખંડના સ્ટેન્ડથી બચાવ કરી રહ્યો છે પરંતુ મોટી સંખ્યામાં દર્દીના સગા સિક્યુરીટી ગાર્ડને ફરી વળ્યા હતા અને ઢોર માર માર્યો હતો. 

ગાર્ડને સારવાર માટે દાખલ કરાયો
દર્દીના સગાઓએ અચાનક જ ગાર્ડ પર લોખંડના સ્ટેન્ડ વડે કરેલા હુમલામાં સિક્યુરિટી ગાર્ડ ગંભીર રીતે ધવાયો હતો. જે બાદ ગાર્ડને તાત્કાલિક હોસ્પિટલમાં ખસેડવામાં આવ્યો હતો. સૂત્રો દ્વારા મળતી માહિતી મુજબ ડોકટરોનું કહેવું છે કે ગાર્ડને લોખંડના સ્ટેન્ડનો માર ઊંડે સુધી વાગ્યો છે. તેમજ શરીરના અન્ય ભાગમાં પણ મોટી ઈજાઓ થઈ છે. જે કારણે ગાર્ડને હોસ્પિટલમાં દાખલ કરવામાં આવ્યો છે. 

પોલીસે વઘુ તપાસ હાથ ધરી
સમગ્ર ઘટનાનો વીડિયો સામે આવતા હોસ્પિટલ સ્ટાફ અને ગાર્ડ દ્વારા પોલીસને પણ સમગ્ર ઘટના અંગે જાણ કરવામાં આવી હતી. પોલીસ ઘટના સ્થળે તુરંત દોડી આવી હતી અને સમગ્ર મામલે તપાસ આરંભી હતી. તેમજ મૃતક દર્દીના સગાઓને પકડવા ચક્રો પણ ગતિમાન કર્યા છે. બીજી તરફ મારામારી અંગે હોસ્પિટલ સ્ટાફ ત્યાં હાજર લોકો અને ગાર્ડનું સ્ટેટમેન્ટ પણ પોલીસ લીધું છે.અવાર નવાર હોસ્પિટલ સ્ટાફ દર્દીઑના સગા સાથે ઘર્ષણના બનાવો બની રહ્યા છે. જેના પર રોક લાવવી જરૂરી છે. વીડિયો પરથી સ્પષ્ટ જોઈ શકાય છે કે હુમલો જીવલેણ હતો.