અમેરિકાના રાષ્ટ્રપતિ ડોનાલ્ડ ટ્રમ્પે 200 થી વધુ ચાઇનીઝ સોફ્ટવેર એપ્લિકેશનો પર પ્રતિબંધ મૂકવાના ભારતના નિર્ણયને ટાંકીને અલી પે અને વી ચેટ પે સહિત આઠ ચાઇનીઝ એપ્લિકેશનો સાથેની લેવડ દેવડ પર પ્રતિબંધ મૂક્યો હતો.
અમેરિકન પ્રમુખે કારોબારી આદેશ પર કર્યા હસ્તાક્ષર
ચીનની બે એપ્લિકેશન પર પ્રતિબંધ લાદી દીધો
ભારતની કાર્યવાહીને ટાંકીને કરી આ કાર્યવાહી
ટ્રમ્પે યુ.એસ.ની રાષ્ટ્રીય સુરક્ષા માટે આ અંગેના વહીવટી હુકમ પર હસ્તાક્ષર કર્યા. ટ્રમ્પે તેના આદેશમાં કહ્યું હતું કે ચીનમાં બનાવેલ અને નિયંત્રિત એપ્લિકેશનોની વ્યાપક વપરાશને લીધે રાષ્ટ્રીય કટોકટીઓનો સામનો કરવા માટે આ પગલાની જરૂર છે.
આઠ ચીની એપ્સ પરના પ્રતિબંધને ટ્રમ્પે મંજૂરી આપી
આઠ ચીની એપ્સ પર પ્રતિબંધ મૂકવામાં આવ્યો છે જેમાં અલીપે, કેમસ્કેનર, ક્યૂક્યૂ, વિમિટ, વીચેટ પે અને ડબલ્યુપીએસ ઓફિસનો સમાવેશ છે. આ પ્રતિબંધો મંગળવારથી 45 દિવસમાં અમલમાં આવશે.
ટ્રમ્પે મંગળવારે કહ્યું હતું કે ચીન દ્વારા વિકસિત અથવા નિયંત્રિત કેટલાક મોબાઇલ અને ડેસ્કટોપ એપ્લિકેશનો અને અન્ય સોફ્ટવેર રાષ્ટ્રીય સુરક્ષા, વિદેશી નીતિ અને અમેરિકન અર્થતંત્ર માટે જોખમરૂપ છે.
ટ્રમ્પે પોતાના આ આદેશમાં કહ્યું છે કે આ સમયે આ ચીની સોફ્ટવેર એપ્લિકેશનો દ્વારા ઉભા થતા જોખમોને પહોંચી વળવા કાર્યવાહી કરવાની જરૂર છે. ટ્રમ્પે આ અગાઉ ઓગસ્ટમાં ચીનની બે એપ્લિકેશન ટિકટોક અને વીચેટ પર પ્રતિબંધ મૂક્યો હતો.
ચીની આર્મી અને ચીની કમ્યુનિસ્ટ પાર્ટી દ્વારા ડેટાની તફડંચી
ટ્રમ્પે કહ્યું કે ભારતે 200 થી વધુ ચાઇનીઝ સોફ્ટવેર એપ્લિકેશનોના ઉપયોગ પર પ્રતિબંધ મૂક્યો છે. અમારું માનવું છે કે ચીન સાથે સંકળાયેલ ઘણી સોફ્ટવેર એપ્લિકેશનો આપમેળે લાખો યુ.એસ. વપરાશકર્તાઓની સંવેદનશીલ માહિતી પ્રાપ્ત કરી શકે છે, અને આ ડેટા ચીની સૈન્ય અને કમ્યુનિસ્ટ પાર્ટી સુધી પહોંચી શકે છે.