હવામાન / આકરી ગરમી સહન કરવા તૈયાર રહેજો: હવે ગુજરાતમાં ગરમીનો પારો 40 ડિગ્રીની આસપાસ રમતો થઈ જશે, જાણો આગાહી

• ઠંડા પવનોનું જોર ઘટતાં અમદાવાદીઓએ રાહત અનુભવી
• આજે સવારે અમદાવાદમાં 13.5 ડિગ્રી તાપમાન નોંધાયું 
• માર્ચ મહિનામાં ગરમીનો પારો 40 ડિગ્રીની આસપાસ થઈ જશે 

અમદાવાદમાં ગઈ કાલે ઉત્તરની દિશા ધરાવતા ઠંડા પવનના જોરથી લોકો ધ્રુજી ઊઠ્યા હતા. જોકે આજે સવારે આ ઠંડા પવનનું જોર ખાસ્સું એવું ઓછું થયું હતું, જેના કારણે લોકોએ રાહત અનુભવી હતી. આજે સવારે અમદાવાદમાં 13.5 ડિગ્રી સેલ્સિયસ લઘુતમ તાપમાન નોંધાયું હતું કે જે સામાન્ય તાપમાન જેટલું જ હતું. જ્યારે ગઈ કાલે 31.3 ડિગ્રી સેલ્સિયસ મહત્તમ તાપમાન નોંધાયું હતું કે જે સામાન્ય તાપમાન કરતાં એક ડિગ્રી વધુ હતું. ગઈ કાલે બપોરના સમયગાળામાં ગરમીના પ્રકોપથી લોકો ત્રાસી ઊઠ્યા હતા. માર્ચ મહિનામાં ગરમીનો પારો 40 ડિગ્રીની આસપાસ રમતો થઈ જશે તેવી પણ શક્યતા છે.

આ શિયાળામાં જેવી રીતે કાતિલ ઠંડીએ લોકોને કંપાવ્યા હતા તેવી રીતે આવનારો ઉનાળો લોકોને ઉગ્ર ગરમીના તાપથી દઝાડશે તેવી પણ ચર્ચા ઊઠી છે. કેટલાક હવામાન નિષ્ણાતોએ પણ આ વખતે ઉનાળો આકરો રહેશે તેવી શક્યતા દર્શાવી છે, જોકે ઠંડીનો એકાદ રાઉન્ડ હજુ આવે તેવી સંભાવના પણ આ હવામાન નિષ્ણાતો વ્યક્ત કરી રહ્યા છે.  અમદાવાદમાં ટ્રિપલ સિઝનનો માહોલ સર્જાતા અનેક ઘરમાં લોકો વાઈરલ ઈન્ફેક્શનથી બીમાર પડ્યા છે. ખાનગી દવાખાનાં આવા દર્દીઓથી ઊભરાઈ રહ્યાં છે. બાળકો પણ શરદી, ખાંસીનો ભોગ બની રહ્યાં છે. 

આ દરમિયાન આગામી દિવસોમાં અમદાવાદના લઘુતમ તાપમાનમાં પણ વધારો થવાની વકી છે. તા.19 ફેબ્રુઆરી સુધીમાં ઠંડીનો પારો ઊંચકાઈને 17-18 ડિગ્રીએ જઈ પહોંચશે એટલે સવારે લોકોને નહીં ઠંડી, નહીં ગરમી જેવો અનુભવ થશે, જ્યારે મહત્તમ તાપમાન 35 ડિગ્રીની આસપાસ રહેશે તેમ સ્થાનિક હવામાન વિભાગનાં સૂત્રો જણાવે છે.

રાજ્યનાં અન્ય પ્રમુખ શહેરોની ઠંડીની વિગત તપાસતાં અમરેલી 12.8, વડોદરા 11.4, ભાવનગર 14.5, ભૂજ 15.3, દમણ 14.4, ડીસા 12.8, દીવ 11.7, દ્વારકા 17.8, ગાંધીનગર 13.8, જૂનાગઢ 15, નલિયા 8.8, ઓખા 19.8, પાટણ 13.4, પોરબંદર 14.5, રાજકોટ 14, સુરત 17.8 અને વેરાવળમાં 17.2 ડિગ્રી ઠંડી નોંધાઈ હતી. ગઈ કાલે રાજ્યનાં મોટા ભાગનાં શહેરોમાં ગરમીનો પારો 30  ડિગ્રીની ઉપર ચઢ્યો હતો, જ્યારે વેરાવળમાં સૌથી વધુ 34.8ડિગ્રી ગરમી નોંધાઈ હતી.