પેપર ફૂટ્યાના બે મહિના બાદ આજે ફરી જુનિયર ક્લાર્કની પરીક્ષા યોજાઈ રહી છે. પરીક્ષાર્થીઓ આ વખતે ભગવાનને એ જ પ્રાર્થના કરી રહ્યાં છે કે, આજે ફરી પેપર ન ફૂટે.
આજે 32 જિલ્લામાં જુનિયર ક્લાર્કની પરીક્ષા
આજે બપોરે 12.30 વાગ્યે પરીક્ષા યોજાશે
ઉમેદવારોનું વોર્ન કેમેરાથી કરાશે ચેકિંગ
રાજ્યભરમાં આજે જુનિયર ક્લાર્કની પરીક્ષા યોજાવા જઈ રહી છે. રાજ્યના 32 જિલ્લામાં યોજાનારી પરીક્ષાને લઈને ગુજરાત પંચાયત સેવા પસંદગી મંડળે જડબેસલાક તૈયારી કરી છે. આજે રાજ્યના 32 જિલ્લાના 3 હજાર કેન્દ્ર પર 9.53 લાખ જેટલા ઉમેદવારો પરીક્ષા આપશે. આ માટે દરેક પરીક્ષા કેન્દ્ર પર પોલીસનો ચૂસ્ત બંદોબસ્ત ગોઠવી દેવામાં આવ્યો છે. જુનિયર ક્લાર્કની પરીક્ષા આજે બપોરે સાડા બાર વાગ્યે યોજાશે. પરંતુ ઉમેદવારોએ પોણા બાર સુધી પરીક્ષા કેન્દ્રની અંદર પહોંચી જવું પડશે. પરીક્ષા કેન્દ્રો ખાતે ઉમેદવારોનું વોર્ન કેમેરાથી ચેકિંગ કરાશે.
ઉમેદવારોની સુવિધા માટે ST વિભાગે મૂકી એક્સ્ટ્રા બસ
આજે એસ.ટી વિભાગ દ્વારા પણ 6 હજાર બસ પરીક્ષાર્થીઓ માટે દોડાવવામાં આવી રહી છે. જ્યારે રેલવે દ્વારા પણ ‘પરીક્ષા સ્પેશિયલ ટ્રેન’ દોડાવવામાં આવી છે. પરીક્ષાર્થીઓ ગત રાતે જ પરીક્ષા કેન્દ્ર પર પહોંચવા માટે રવાના થયા હતા. આજે દરેક કેન્દ્ર પર બોડી વોર્ન કેમેરાથી ચેકિંગ કરવામાં આવશે, કોઈપણ ‘ડમી ઉમેદવાર’ કેન્દ્રમાં પ્રવેશવાનો પ્રયત્ન કરશે તો તે ગેટ પર જ પકડાઈ જશે. ડમી ઉમેદવાર સામે નવા કાયદા મુજબ પગલા લેવાશે. સાથે વર્ગ ખંડથી લઈને પરીક્ષા કેન્દ્રના પરિસર અને લોબીમાં સીસીટીવી કેમેરાથી નજર રખાશે. રાજ્યમાં 500થી વધુ ફ્લાઈંગ સ્કવોર્ડ અલર્ટ રહેશે.
ઉમેદવારોના જિલ્લાની ફેરબદલી
ગત વખતે આ પરીક્ષાનું પેપર લીક થતાં વહીવટી તંત્રએ આ વખતે ઉમેદવારોના પરીક્ષા કેન્દ્રની જિલ્લા ફેરબદલી કરી નાખી છે. ઉમેદવારો પાન, ઓળખકાર્ડ, કોલ લેટર સિવાય કોઈ પણ વસ્તુ વર્ગખંડમાં નહીં લઇ જઈ શકે. સાથે જ નિરીક્ષક પણ કેન્દ્ર ખાતે મોબાઇલ ફોનનો ઉપયોગ નહીં કરી શકે. ઉમેદવારોએ બુટ-ચંપલ પણ વર્ગ ખંડની બહાર કાઢવા પડશે. સરકારે પ્રથમ વખત પરીક્ષાર્થી ઉમેદવારોને કેન્દ્રો સુધી પહોંચવા માટે 254 રૂપિયા મુસાફરી ભથ્થું આપ્યું છે.
29 જાન્યુઆરી ફૂટ્યું હતું પેપર
અત્રે ઉલ્લેખનીય છે કે, આ પહેલા જુનિયર ક્લાર્કની પરીક્ષાનું આયોજન તારીખ 29-1-2023ને રવિવારના રોજ કરવામાં આવ્યું હતું. જોકે, પરીક્ષાની આગલી રાત્રે એક શખ્સ પેપર સાથે ઝડપાતા જુનિયપ ક્લાર્કની પરીક્ષા રદ્દ કરવામાં આવી હતી. પેપર ફૂટતા 9.53 લાખથી વધુ ઉમેદવારોની બે વર્ષની મહેનત પણ પાણી ફરી વળ્યું હતું. ઠેર-ઠેર ચક્કાજામ કરીને ઉમેદવારોએ રોષ વ્યક્ત કર્યો હતો. હજુ પણ સરકારી પરીક્ષાની તૈયારી કરતા ઉમેદવારો 29 જાન્યુઆરીનો દિવસ ભૂલ્યા નથી. કારણ કે, એ દિવસે પેપર ફૂટતા ઉમેદવારોએ રઝળવું પડ્યું હતું. ગુજરાત ATSએ આરોપીઓને પકડવા ચક્રો ગતિમાન કર્યા હતા. આ મામલે 15 આરોપીઓની ધરપકડ કરી હતી. તેમજ તાજેતરમાં ATSએ 30 ઓરાપી ઉમેદવારની ધરપકડ કરી હતી.
આ પહેલા પણ લીક થઈ ચૂક્યા છે પેપર
પેપર ફૂટવાની ઘટના કંઈ પહેલીવાર બની હોય તેવું નથી. ગુજરાતમાં આ પહેલા 13 વખત પેપર લીક થઈ ચૂક્યા છે. સરકાર દર વખતે દાખલો બેસાડે તેવી તપાસના દાવા કરે છે, પણ તેમ છતાં કોઈ અસર થતી નથી અને ફરીથી પેપર લીક થઈ જાય છે. જોકે, આ વખતે તો સરકારે પેપર લીકની ઘટના રોકવા માટે કડક કાયદો બનાવ્યો છે. ે