આગાહી / રાજ્યમાં બપોરે ગરમી તો સાંજે ઠંડીની હવામાન વિભાગની આગાહી, જાણો હજુ આટલા દિવસ બેવડી ઋતુનો થશે અનુભવ

• રાજ્યમાં બેવડી ઋતુનો થશે અહેસાસ
• ફેબ્રુઆરીમાં ઠંડીનું પ્રમાણ સામાન્ય રહેશે
• દરિયાકાંઠા વિસ્તારોમાં 15થી 20 કિમીની ઝડપે પવન ફુંકાશે

4 દિવસ વાતાવરણ સામાન્ય રહેશે

અમદાવાદ સહિત સમગ્ર રાજ્યમાં છેલ્લા ત્રણ દિવસથી લઘુત્તમ તાપમાનમાં વધારો થતાં ઠંડીના પ્રમાણમાં ઘટાડો થયો નોંધાયો છે. આમ વાતાવરણમાં લઘુત્તમ તાપમાન એકાએક ઉચકતાં દિવસે ગરમી અને રાત્રે ઠંડીનો અહેસાસ વર્તાવવા માંડ્યો છે.બીજી તરફ આવા વાતાવરણના કારણે વાહકજન્ય બિમારીઓ થવાની શક્યતાઓ વધી છે. જ્યારે ઠંડીમાં ઘટાડો થવાથી ઘર વિહોણા, દર્દીઓ અને સિનિયર સિટીઝનોએ હાશકારો અનુભવ્યો હતો.

હાલ રાજ્યમાં બેવડી ઋતુનો અહેસાસ વર્તાય છે  

હવામાન ખાતાના વિભાગે જણાવ્યા અનુસાર હજુ આગામી ચાર દિવસ દરમિયાન તાપમાનમાં ફેરફાર થવાની શક્યતાઓ નહીંવત હોવાનું જણાવાયુ છે. બીજી બાજુ ફેબ્રુઆરી માસ દરમિયાન ઠંડીનું પ્રમાણ સામાન્ય રહેશે. ઉલ્લેખનીય છે કે, હાલ અમદાવાદ સહિત સમગ્ર રાજ્યમાં ઉત્તરીય દિશામાં ફૂંકાતા પવનોને કારણે બેવડી ઋતુની અસર રહેશે. જેને પગલે અમદાવાદ,ગાંધીનગર સહિત શહેરોમાં રાત્રિનું લઘુત્તમ તાપમાન 15 ડિગ્રી સુધી રહેશે. જેને લઈને સવારે ઠંડી અને બપોરે ગરમીનો અનુભવ થશે. તેમજ દરિયાકાંઠા વિસ્તારોમાં 15થી 20 કિમીની ઝડપે પવન ફુંકાશે.