રાજ્યમાં છેલ્લા ઘણા સમયથી તમામ મહાનગરોમાં ડ્રગ્સનું દૂષણ મોટાપાયે વધતું જઈ રહ્યું છે.આથી ગુજરાત પોલીસ અને DRI દ્વારા ડ્રગ્સ અને તેના સપ્લાયરને ઝડપી લેવા માટે ખાસ કવાયત હાથ ધરવામાં આવી છે. જેની વચ્ચે ગુજરાત ATSએ છેલ્લા એક વર્ષમાં અંદાજે 1 હજાર કરોડના ડ્રગ્સના જથ્થાને જપ્ત કર્યો છે. ઉલ્લેખનીય છે કે, 1600 કિમીનો લાંબો દરિયાકિનારો અને યુવાઓની વધુ સંખ્યાને કારણે ગુજરાત ડ્રગ્સ માફિયા માટે પસંદગીનું કેન્દ્ર બન્યું છે.
રાજ્યમાં દર વર્ષે ઓપીડી વગર 5000 લોકો નિદાન માટે આવે છે
રાજકોટ, અમદાવાદ, સુરત, વડોદરા અને સાબરકાંઠામાં સ્થિત વ્યસનમુક્તિ કેન્દ્રો અનુસાર દર વર્ષે રાજ્યમાં ઓપીડી વગર એટલે કે ભરતી થયા વગર 5000 લોકો નિદાન માટે આવે છે. જ્યારે વર્ષે 700થી વધુ બંધાણીઓ ડ્રગ્સની આદત છોડવા માટે 20 દિવસ સુધી વ્યસનમુક્તિ કેન્દ્રોમાં દાખલ થયા છે. બીજી તરફ નશો કરનારી મહિલાઓની સંખ્યા પણ તેજીથી વધી રહી છે. છેલ્લાં ત્રણ વર્ષમાં મહિલાઓમાં નશાખોરીનું પ્રમાણ 30 ટકા વધ્યું છે.
ડ્રગ્સની લતને પૂરી કરવા માટે યુવાનો પેડલર માર્ગ અપનાવે છે
વડોદરા સ્થિત એક વ્યસનમુક્તિ કેન્દ્રના જણાવ્યા અનુસાર, કોવિડના સમયમાં અંદાજે 500થી વધુ લોકો સાથે અમે ટેલિફોનિક પરામર્શ કર્યો છે. આ લોકોને ડ્રગ્સ ના મળવાથી વિથડ્રોવલ સિન્ડ્રોમથી પીડાઇ રહ્યા છે. લતને પૂરી કરવા માટે યુવાઓ ડ્રગ પેડલર બનવા સુધીનો માર્ગ પણ અપનાવતા હોય છે.
રાજ્યમાં વ્યસનમુક્તિ કેન્દ્રનું સંચાલન કરતી સંસ્થાના સભ્યોના જણાવ્યા અનુસાર, રાજ્યમાં દારૂબંધી છતાં શરાબ પીતા લોકોની સંખ્યા વધુ છે. પરંતુ છેલ્લાં 5 વર્ષમાં શરાબનું સેવન કરવાનું ચલણ બદલાયું છે અને હવે એમડી, કોકેન, હેરોઇન જેવી ડ્રગ્સનું સેવન કરતા નશાખોરોની સંખ્યા સતત વધી રહી છે. તેમાં બેગણી વૃદ્વિ થઇ રહી છે. ખાસ કરીને 18-25 વર્ષની વયના યુવાનો તેનો પહેલો શિકાર બને છે. યુવાઓમાં શોખથી શરૂ થતું આ વ્યસન બાદમાં લતમાં પરિવર્તિત થાય છે. ડ્રગ્સના માત્ર એક વ્યસનને કારણે અનેક પરિવારો વેરવિખેર થયા હોવાના કિસ્સા સામે આવ્યા છે.