સિયાચિન / કડકડતી ઠંડીમાં આ જવાનોને ખાવાની અને પહેરવાની જરૂરી ચીજવસ્તુઓ મળતી નથી

• સેનાના જવાનો અપૂરતી માત્રામાં ખોરાક મેળવે છે 
• કડકડતી ઠંડી સામે જુના ફેસ માસ્ક, જેકેટ અને ખરાબ ગુણવત્તાના બૂટ મળે છે

CAGના રક્ષા સેવા અને સેનાના એક રિપોર્ટ ઉપરથી tribune india ન્યુઝ એજન્સી વડે બનાવાયેલ એક અહેવાલમાં ચિંતાજનક બાબતો સામે આવી છે. તેમાં લખ્યું છે કે સિયાચિન અને લદાખ જેવી મુશ્કેલ પોસ્ટ ઉપર તહેનાત જવાનોને તેમને જરૂરી ખોરાક અને સગવડો મળતી નથી.

આ જવાનોને આહાર પૂરતો મળી રહ્યો નથી. પૂરતા પ્રમાણમાં તેમને અનાજ મળતું નથી. ખાવામાં જેટલી કેલરી અને ઉર્જાની જરૂરિયાત હોય તે મળતી નથી. બરફ આચ્છાદિત વિસ્તારોમાં ચાલવા માટે વિશેષ પ્રકારના બુટ પણ તેમની પાસે નથી. આ ઉપરાંત ભારે હિમવર્ષા સમયે પહેરવા પડતા 'સ્નો ગોગલ્સ' પણ તેમની પાસે નથી.

ઉંચાઈ પર રહેવા માટે જવાનોને વધુ એનર્જીની જરૂર પડે છે જેની સામે જવાનોના આહારની ગુણવત્તા અને પ્રમાણ એટલે કે કવોન્ટિટી અને ક્વોલિટી બંનેમાં ઘટાડો નોંધાયો છે. જવાનોના ખાવાનો કેલરીમાં 82% સુધીનો ઘટાડો નોંધાયો છે. 

સ્નો ગોગલ્સમાં 62% થી 98%ની કમી નોંધાઈ છે જેથી હિમવર્ષા દરમિયાન પણ જવાનોના ચહેરા ખુલ્લા રહે છે. બરફમાં ચાલવા જવાનોએ વર્ષો જુના મલ્ટી પર્પઝ બૂટ પહેરવા પડે છે. 

સૂત્રોની માહિતી પ્રમાણે જવાનોને જુના ફેસ માસ્ક, જુના જેકેટ અને જૂની સ્લીપિંગ બેગ્સ આપીને સારી ગુણવત્તાના ઉત્પાદનોથી દૂર રાખવામાં આવે છે. નવેમ્બર 2015 થી સપ્ટેમ્બર 2016ની વચ્ચે જવાનોને 
નવા બૂટ મળ્યા નહોતા.

નોંધનીય છે કે સેનાના રિસર્ચ એન્ડ ડેવલપમેન્ટમાં વ્યવસ્થિત કામ ન થતું હોવાથી સેનાએ આયાત ઉપર નિર્ભર રહેવું પડે છે. CAGનો આ રિપોર્ટ રાજ્યસભામાં મુકાઈ ગયો છે પરંતુ લોકસભામાં હજી તે મુકાયો નથી.