તમારા કામનું / ઈમરજન્સીમાં કાઢવા હોય PF ના પૈસા, તો જાણી લો આ પ્રોસેસ, 3 દિવસમાં થઈ જશે કામ

• પ્રોવિડન્ટ ફંડ નોકરિયાત લોકો માટે મદદરૂપ
• ઘરબેઠા ઉપાડી શકો છો તમારું PF 
• ઓનલાઈન પ્રોસેસથી પૈસા મળશે 72 કલાકમાં

પ્રોવિડન્ટ ફંડ ખાનગી ક્ષેત્રમાં કામ કરતા લોકો માટે ખૂબ જ મહત્વપૂર્ણ બચત છે. આ ફંડમાં જમા રકમથી નોકરિયાત લોકોને મુશ્કેલ સમયમાં ઘણી રાહત મળે છે. કોવિડ મહામારી દરમિયાન પીએફ નોકરિયાત લોકો માટે ખૂબ મદદરૂપ સાબિત થઈ. નોકરીયાત લોકોના પગારનો એક ભાગ પીએફ ફંડમાં જમા થાય છે. આ ફંડમાં જમા રકમ પર સરકાર વ્યાજ દર ચૂકવે છે.

તમે ઘરે બેઠા પૈસા ઉપાડી શકો છો
તમે બેંક ખાતાની જેમ પીએફ ખાતામાંથી પૈસા ઉપાડી શકતા નથી. ઇપીએફઓ કેટલીક શરતો સાથે પીએફ ખાતામાંથી પૈસા ઉપાડવાની મંજૂરી આપે છે. જો કે, તમે ઘરે બેઠા સરળતાથી પીએફના પૈસા ઉપાડી શકો છો. ઇપીએફઓના જણાવ્યા અનુસાર તમે માત્ર 72 કલાકમાં ઓનલાઇન પૈસા ઉપાડી શકો છો.

પૈસા ઉપાડવાના નિયમો
કોવિડ રોગચાળા દરમિયાન પીએફ ખાતામાંથી પૈસા ઉપાડવાના નિયમોમાં ફેરફાર કરવામાં આવ્યો હતો. આ પહેલા પીએફ એકાઉન્ટમાંથી પૈસા રિટાયરમેન્ટ બાદ જ કે ઘર ખરીદવા અને બાળકોના ભણતર જેવી જરૂરિયાતો માટે જ ઉપાડી શકાતા હતા. કોરોના મહામારીના કારણે લોકોને પડી રહેલી આર્થિક સમસ્યાઓને જોતા ઈપીએફઓએ વિશેષ છૂટ આપી હતી. આવી પરિસ્થિતિમાં કોઈપણ વ્યક્તિ તેમના પીએફ ખાતામાંથી પૈસા ઉપાડી શકે છે, પરંતુ ઉપાડની રકમ પણ નક્કી કરવામાં આવી છે.

તમને કેટલા દિવસમાં પૈસા મળે છે?
કોઈપણ ખાતાધારક પીએફ ખાતામાં કુલ થાપણના 75 ટકા અથવા ત્રણ મહિનાના બેઝિક પગાર અને મોંઘવારી ભથ્થાની બરાબર સરળતાથી ઉપાડી  શકે છે. આમાં જે ઓછું હોય, તેટલા વધુ પૈસા ઉપાડી શકાય છે. જે લોકો ઓનલાઇન ક્લેમ કરે છે તેમને આ પૈસા બેંક ખાતામાં ત્રણ દિવસમાં મળી જાય છે. સાથે જ ઓફલાઈન ક્લેમ કરનારાઓને 20 દિવસ સુધી રાહ જોવી પડી શકે છે.

કેવી રીતે તમે પીએફ એકાઉન્ટમાંથી ઓનલાઇન પૈસા ઉપાડી શકો છો

• સૌથી પહેલા EPFOના મેમ્બર પોર્ટલ પર જાવ.
• મેનુમાં સર્વિસના વિકલ્પ પર ક્લિક કરો.
• તમારે ફોર એમ્પ્લોઇઝ પર ક્લિક કરવાનું રહેશે.
• આ પછી એક નવું પેજ ખુલશે. ત્યાં Member UAN/Online Service (OCS/OTCP)ની પસંદગી કરો.
• આ પછી લોગિન પેજ ખુલશે.
• UAN અને પાસવર્ડની મદદથી લોગિન કરો.
• નવા પેજ પર ઓનલાઇન સર્વિસ પર જાઓ. ડ્રોપ ડાઉન મેનુમાંથી CLAIM (FORM-31, 19 & 10C) પસંદ કરો.
• હવે એક નવું પેજ ખુલશે, જ્યાં તમારે બેંક એકાઉન્ટ નંબર વેરીફાઇ કરવાના રહેશે.
• વેરિફિકેશન બાદ Certificate of Undertaking ખુલશે, જેને સ્વીકારવું પડશે.
• Proceed for Online Claim ઓપ્શન પર ક્લિક કરો.
• હવે એક ફોર્મ ખુલશે. I want to apply for ની સામે ડ્રોપડાઉનથી PF ADVANCE (FORM - 31) પસંદ કરો.
• અહીં તમને પૈસા ઉપાડવાનું કારણ અને જરૂરી રકમ પૂછવામાં આવશે.
• ચેકબોક્સને માર્ક કરતાની સાથે જ પ્રક્રિયા પૂર્ણ થઈ જાય છે.

આ બધી પ્રક્રિયા પૂરી થયા પછી તમારો ક્લેમ ચેકિંગ માટે જાય છે અને ચેક થયા પછી તમારા ખાતામાં ક્લેમના પૈસા જમા કરવામાં આવે છે. જો ક્લેમ પાસ થઇ જાય છે તો 3 દિવસની અંદર જ તમારા ખાતામાં પૈસા આવી જાય છે.