ત્રિપલ તલાક આપવાં કાયદાકીય રીતે હવે ગુનો છે. છતાં દાણીલીમડાં વિસ્તારમાં પતિએ પત્નીને માર મારીને તલાક-તલાક-તલાક કહીને ઘરમાંથી કાઢી મૂકી હોવાની ઘટના પ્રકાશમાં
આવી છે.
દાણીલીમડામાં પતિએ ત્રિપલ તલાક આપતાં ફરિયાદ
મૌલવીએ ત્રિપલ તલાક ગુનો હોવા છતાં તેને યોગ્ય ગણાવ્યા
તલાકથી યુવતીની તબિયત લથડી
દાણીલીમડા વિસ્તારમાં રહેતી એક યુવતીએ દાણીલીમડા પોલીસ સ્ટેશનમાં પતિ તેમજ સાસરિયાં વિરુદ્ધમાં ફરિયાદ કરી છે કે વર્ષ ર૦૧૪માં તેનાં લગ્ન દાણીલીમડાનાં જ એક યુવાન સાથે થયાં હતાં. લગ્ન થયાં ત્યારથી જ સાસરીવાળાં યુવતીને નાની-નાની બાબતોમાં શારીરિક અને માનસિક ત્રાસ આપતાં હતાં.
પતિએ ત્રિપલ તલાક આપ્યાં
૧ર ડિસેમ્બર, ર૦૧૮ના દિવસે સાંજના સમયે યુવતીનાં પતિએ તેને માર મારીને તલાક-તલાક-તલાક કહીને કાઢી મૂકી હતી. પતિએ કાયદાનો ડર રાખ્યાં વગર તેને પત્નિને ત્રિપલ તલાક આપી કાઢી મુકી. જે તે સમયે યુવતીને માર મારતાં યુવતીની તબિયત લથડી હતીં. તેને સારવાર માટે એલજી હોસ્પિટલ ખસેડવામાં આવી હતી. ત્યારબાદ યુવતીએ તેનાં સાસરિયાં વિરુદ્ધમાં દાણીલીમડા પોલીસ સ્ટેશનમાં શારીરિક અને માનસિક ત્રાસ આપ્યાની ફરિયાદ દાખલ કરાવી હતી.
યુવતીનાં પિયરીયા સમાધાન માટે ગયા
પોલીસ ફરિયાદ બાદ યુવતી માતા સાથે પિયરમાં રહેતી હતી. જો કે ૬ ઓક્ટોબર, ર૦૧૯નાં રોજ યુવતીનાં પરિવારજનો તેનાં સાસરિયાંને સમજાવીને સમાધાન કરાવવા માટે ગયાં હતાં. જેને પગલે સાસરિયાંઓએ વિચારવાં માટે બે દિવસનો સમય માગતાં તેઓ પરત ફર્યાં હતાં.
મૌલાનાએ ત્રિપલ તલાક યોગ્ય ગણાવ્યાં
૮ ઓક્ટોબરે ફરીથી બન્ને પક્ષનાં લોકો સમાજનાં કેટલાક આગેવાનોની હાજરીમાં મળ્યાં હતાં. જ્યાં યુવતીનાં પતિએ ફરીથી તેને તલાક-તલાક-તલાક કહ્યું હતું. આ સમયે હાજર મૌલાનાએ પણ કહ્યું હતું કે યુવતીનાં પતિએ આપેલાં તલાક શિરયત મુજબ યોગ્ય છે. જોકે સમગ્ર ઘટનાની જાણ દાણીલીમડા પોલીસને કરાતાં જ પોલીસે યુવતીનાં પતિની વિરુદ્ધમાં ફરિયાદ દાખલ કરીને વધુ તપાસ શરૂ કરી છે.