વિધાનસભા ચૂંટણી પહેલા ખરીદ-વેચાણ સંઘ તથા પક્ષ પલટાના મૌસમની શરૂઆત થઈ ગઈ છે. ત્યારે ગુજરાતની સરહદે આવેલા દાદરા નગર હવેલીના રાજકારણમાં ખળભળાટ મચ્યો છે. જિલ્લા પંચાયતમાં સત્તાધારી પક્ષે સામૂહિક પક્ષ પલટો કરી લેતા 3 બેઠક પર કબજો ધરાવતી ભાજપ હવે કિંગ મેકર બની ગઈ છે.
ભાજપ હવે જિલ્લા પંચાયતનો સત્તાપક્ષ
મહત્વનું છે કે મોહન ડેલકરના સમર્થકો અને JDUનું ગઠબંધન સત્તા પર હતું ડેલકર-JDUના નિશાનથી ચૂંટાયેલા 17 માંથી 15 સભ્યોએ એક સામટે દલ બદલ કરી ભાજપમાં જોડાઈ ગયા છે. જિલ્લા પંચાયતની 20 બેઠકો માંથી 17 પર JDU ગઠબંધનને પરચમ લહેરાવ્યો હતો. ચૂંટણીમાં માત્ર 3 બેઠકો પર ભાજપના સભ્યોની જીત થઈ હતી. ત્યારે હવે માત્ર 3 સભ્યો ધરાવતી ભાજપ હવે જિલ્લા પંચાયતનો સત્તાપક્ષ બની છે. જેડીયુ ગઠબંધનના સભ્યોએ કલેકટરને મળીને લેખિતમાં જાણ કરી છે.
પક્ષપલટાથી ભાજપનું સંખ્યાબળ 3 થી વધીને 18 થયું
મહત્વનું છે કે સંઘપ્રદેશ દાદરા નગર હવેલીની જિલ્લા પંચાયત ચુંટણીમાં ભાજપ-કોંગ્રેસ સિવાય ત્રીજા પક્ષ તરીકે જનતાદળ યુનાઇટેડે પણ ઝંપલાવ્યું હતું, જેને દાદરાનગર હવેલીના ડેલકર અને દમણમાંથી યુથ એક્શન ફોર્સે સમર્થન કર્યું હતું. જે બાદ ચૂંટણી પરિણામ આવતા કુલ 20 બેઠકો માંથી 17 બેઠકો ડેલકર-જેડીયું જુથને ગઈ હતી. પણ 15 સભ્યોએ પક્ષ પલટો કરતાં હવે ભાજપ સાથે મળી 18ના સંખ્યાબળ સાથે ભાજપ સમર્થિત જિલ્લા પંચાયતની રચના થશે. અંદર ખાને સોગઠાં ગોઠવી ભાજપે ખેલ પાડ્યો હોવાની વાતો વહેતી થઈ છે.