ભાવનગરમાં નવા બનેલા રોડ ખોદીને મુકી દેવાયા છે. વધુમાં સ્ટોર્મ લાઇનના ખુલ્લા બોક્સના કારણે વાહન ચાલકો અકસ્માતે પડતા હોવાની સ્થિતિ વચ્ચે પણ તંત્ર કુંભકર્ણની નિંદ્રામાંથી જાગતું નથી.
ભાવનગરમાં અધૂરા વિકાસ કામોને પગલે પ્રજા પરેશાન
અનેક અકસ્માતો છતાં તમાશો જોતું તંત્ર
મેયરના વોર્ડમાં જ અધૂરા કામો
ભાવનગર મહાનગરપાલિકામાં અંધેરી નગરી અને ગંડું રાજા જેવો વહીવટ ચાલતો હોવાની રાવ ઉઠી છે.ભાવનગર શહેરમાં અનેક વિસ્તારોમાં નવા રસ્તાઓનું નિર્માણ કાર્ય હાથ ધરવામાં આવી રહ્યું છે જે આવકારદાયક છે પરંતુ અધૂરા કામોના લીધે મનપાનું તંત્ર વાગોવાઈ જાય છે ભાવનગર શહેરમાં ભરત નગર, ટોપ થ્રિ સર્કલ અને ચિત્રા ફુલસર વોર્ડમાં રોડના કામો ધકેલ પંચા દોઢસોની જેમ ચાલી રહ્યા છે. જ્યા નવા બનેલા ફોર ટ્રેક રોડની વચ્ચે જે ડિવાઈડર બનાવવા જોઈએ તે કામ હજુ પુરા થયા નથી. બીજીબાજુ કેટલાક સ્થળોએ સ્ટોર્મ વોટર લાઈન માટેના બોક્સ પણ ખુલ્લા પડ્યા છે. ચિત્રા ફુલસર વોર્ડ કે જે મેયરનો વોર્ડ છે ત્યાં હજુ સુધી આ સ્ટોર્મ વોટર લાઇનના બોક્સનું કામ પૂરૂ નહીં થતા અકસ્માતના બનાવો બની રહ્યા છે.
છેલ્લા બે ત્રણ વર્ષથી અધૂરા છોડી દેવાયા કામો
વેરો ઉઘરાવવામાં પાછી પાણી ન કરતું ભાવનગર પાલીકા સવલતો પુરી પાડવામાં સંપૂર્ણપણે નિષ્ફળ ગઈ હોય તેવું લાગી રહ્યું છે શહેરના વિવિધ રોડ રસ્તાઓના કામ છેલ્લા બે ત્રણ વર્ષથી અધૂરા છોડી દેવાયા છે જેના કારણે રોજ બેરોજ અકસ્માતો બને છે. થોડા દિવસ પહેલા જ અધૂરા રોડ રસ્તાને કારણે યુવાનનું મોત પણ થયું હતું છતાં પણ મહાનગરપાલિકાનું તંત્ર શીખ લેવાની બદલે સબસલામતના દાવા કરી રહી છે.
ખાતમુહૂર્ત કરાયા બાદ કાચબા ગતિએ ચાલતા કામો
ભાવનગર શહેરમાં રસ્તાના કામો પૂરજોશમાં નેતાઓના હાથે ખાતમુહૂર્ત કરવામાં આવે છે પરંતુ પૂર્ણ થતા નથી. જેના કારણે શહેરીજનોને પારાવાર મુશ્કેલી ભોગવી પડી રહી છે જોકે આ અંગે કોંગ્રેસ દ્વારા પણ મનપાના શાસકોને જગાડવા માટે આંદોલનો પણ કરાયા છે પરંતુ ઘોર નિંદ્રામાં સૂતેલ તંત્રના કાને વાત પડતી નથી.