કૌભાંડ / ભરૂચના જાસૂસીકાંડ મામલે લેવાયા એક્શન: 2 પોલીસકર્મીઓ તથા 2 બુટલેગરો વિરુદ્ધ હાથ ધરાઇ કાર્યવાહી

• ભરૂચ જાસૂસીકાંડ મામલે ગુનો દાખલ
• 2 પોલીસકર્મીઓ અને 2 બુટલેગરો વિરુદ્ધ ગુનો દાખલ
• PI આનંદ ચૌધરીએ દાખલ કરી ફરિયાદ

ગુજરાત પોલીસના જાસૂસીકાંડને લઈને મોટા સમાચાર સામે આવ્યા છે. બુટલેગરો માટે પોલીસ અધિકારીઓની જાસૂસી કરવા મામલે 2 પોલીસકર્મચારી વિરુદ્ધ આકરી કાર્યવાહી કરવામાં આવી છે. શહેરના બી ડિવિઝન પોલીસ સ્ટેશનમાં 2 પોલીસ કર્મચારીઓ અને 2 બુટલેગરો વિરુદ્ધ ગુનો દાખલ કરવામાં આવ્યો છે. SOGના PI આનંદ ચૌધરીએ આ મામલે દાખલ કરી છે. 

જાસૂસીનો થયો હતો પર્દાફાશ
ભરૂચ ક્રાઇમ બ્રાન્ચના ટેક્નિકલ સર્વેલન્સ સ્કોડના પોલીસકર્મીઓ અશોક સોલંકી અને મયુર ખુમાણ બુટલેગરો માટે પોલીસ અધિકારીઓની જાસૂસી કરી રહ્યા હોવાની ઘટનાનો ભરૂચ એસપી ડો. લીના પાટીલની તપાસમાં પર્દાફાશ થયો હતો. આ બે પોલીસકર્મીઓ સસ્પેન્ડ કરી દેવાયા હતા. જેમની સામે હવે ગુનો દાખલ કરવામાં આવ્યો છે.

 
શું છે સમગ્ર મામલો?
ભરૂચ સહિત આસપાસના વિસ્તારોમાંથી બુટલેગરોની જે બાતમી મળતી હતી, તે લાંબા સમયથી નિષ્ફળ જઈ રહી હતી. નિષ્ફળતા પાછળનું શોધવા માટે પોલીસે તખ્તો તૈયાર કર્યો હતો. આ દરમિયાન ચોંકાવનારો ખુલાસો થયો હતો. તપાસમાં ભરૂચ ક્રાઇમ બ્રાન્ચના ટેક્નિકલ સર્વેલન્સ ટીમના કોન્સ્ટેબલ મયુર ખુમાણ, અશોક સોલંકી ગુજરાત પોલીસના અધિકારીઓ અને કર્મચારીઓની જાસૂસી કરી રહ્યા હોવાનો ઘટસ્ફોટ થયો હતો. 

મામલો સામે આવતા કરાયા હતા સસ્પેન્ડ
ટેક્નિકલ સર્વેલન્સ ટીમના કોન્સ્ટેબલ મયુર ખુમાણ અને અશોક સોલંકી ગુજરાતના મોટા અધિકારીઓ સહિત ભરૂચની આજુબાજુના પોલીસકર્મીઓની જાસૂસી કરતા હતા અને બૂટલેગરોને આ માહિતી પહોંચાડતા હતા. આ મામલો સામે આવ્યા તેઓનો સસ્પેન્ડ કરી દેવામાં આવ્યા હતા અને તેમની સામે ખાતકીય તપાસ કરવામાં આવી હતી.

બે બુટલેગરો સામે પણ ફરિયાદ
જેમાં સામે આવ્યું હતું કે, આ કર્મીઓએ સ્ટેટ મોનીટરીંગ સેલ અને ભરૂચ પોલીસના ક્રાઇમ બ્રાન્ચ તેમજ સ્પેશિયલ ઓપરેશન ગ્રુપના અધિકારીઓ અને કોન્સ્ટેબલની જાસૂસી કરી હતી. બુટલેગરોનો દારૂ ન પકડાય તે માટે પોલીસકર્મીઓ અને પોલીસ અધિકારીઓના લોકેશન બુટલેગર નયન કાયસ્થ ઉર્ફે બોબડો અને પરેશ ઉર્ફે ચકાને જણાવી દેવાતા હતા. હાલ આ બુટલેગરો સામે પણ ફરિયાદ દાખલ કરવામાં આવી છે.