વડાપ્રધાનના સંસદીય ક્ષેત્ર બનારસથી દેશમાં પહેલીવાર શહેરી પબ્લિક ટ્રાન્સપોર્ટના રુપમાં રોપ-વેની શરુઆત કરવાની તૈયારીઓ થઇ રહી છે. શહેરી વિકાસ મંત્રાલયે રોપ-વેના રુટ અને ડિઝાઇન માટે કંપની નક્કી કરી લીધી છે. ગલીઓ અને સાંકડા રસ્તાઓવાળી જુની કાશી એટલે કે, પક્કા મહાલનો વિસ્તાર રોપ-વે સુવિધા સાથે જોડાશે. વડાપ્રધાન મોદીના બીજા કાર્યકાળમાં તમામ પરિયોજનાઓ સાથે બનારસ ખાસ કરીને જુના કાશીને જામ મુક્ત કરવા પર સૌથી વધુ ભાર અપાઇ રહ્યો છે.
બનારસ: શહેરી વિકાસ મંત્રાલયે રોપ-વેના રુટ અને ડિઝાઇન માટે કંપની નક્કી કરી
રોપ-વે પ્રોજેક્ટ માત્ર 50થી 60 કરોડ જ્યારે, મેટ્રોમાં 350 કરોડનો ખર્ચ આવે છે
જામમાંથી છુટકારો મેળવવા માટે કંપ્રહેંસિવ મોબિલિટી પ્લાન તૈયાર કરાયો છે. રેલ ઇંડિયા ટેકનિકલ એન્ડ ઇકોનોમિકસ સર્વિસીઝ દ્વારા મેટ્રોની શક્યતાઓને ખુબ જ ખર્ચાળ અને નિર્માણમાં ટેકનીકલ સમસ્યાઓ ગણાવતા હવે લાઇટ મેટ્રો, ગંગામાં ફેરી સર્વિસ, ઇલેક્ટિક બસો સાથે રોપ વેને પબ્લિક ટ્રાન્સપોર્ટ સુવિધામાં સામેલ કરાયો છે.
માર્ચ સુધી રિપોર્ટ તૈયાર કરવા સમય અપાયો
એક કિલોમીટર માટે 60 કરોડનો ખર્ચ આવશે. શહેરી વિકાસ મંત્રાલયે જુના કાશી સાથે બનારસ શહેરના બાકી હિસ્સાઓમાં રોપ-વે સંચાલન માટે રુટ અને ડિઝાઇન તૈયાર કરવાની જવાબદારી રોપ-વે નિર્માણમાં એક્સપર્ટ વેપ્કાસ કંપનીને સોંપી છે. વેપ્કાસની ટીમે બનારસ પહોંચીને સર્વે શરુ કરી દીધો છે. માર્ચ સુધી રિપોર્ટ તૈયાર કરવાની સમય સીમા નક્કી કરી દેવાઇ છે. રિપોર્ટને મંજુરી મળતા જ રોપ-વે સુવિધા પર કામ શરુ થઇ જશે.
નિષ્ણાંતોના જણાવ્યા મુજબ રોપ-વે પ્રોજેક્ટ મેટ્રો કરતા અનેક ગણો સસ્તો હશે. જ્યાં સુધી મેટ્રો માટે એક કિલોમીટર નિર્માણ પર 350 કરોડનો ખર્ચ આવે છે, ત્યાં રોપવે અને કેબલ કારમાં તે માત્ર 50થી 60 કરોડ હશે.
ત્રણ રુટ પર સર્વે થશે
રોપ-વે માટે જુની કાશીના એક બાજુ રાજઘાટથી મછોદરી, વિશ્વેશ્વરગંજ, મેદાગીન, ચોક, ગોદોલિયા, સોનારપુરા થઇને બીજી બાજુ અસ્સી અને આગળ BHU સુધી પહેલો રુટ સંભવિત છે. BHU થી કેન્ટ રેલ્વે સ્ટેશન થઇને મલદહિયા, લહુરાબીર અને મેદાગિન સુધી બીજા રુટ તથા કચેરીથી ગોદોલિયા સુધી ત્રીજો રુટ પ્રસ્તાવિત છે.
રાજઘાટ બનશે કેન્દ્ર
રાજઘાટ પુલ પાસે ખિડકિયા ઘાટ પર પરિવહન સંગમ સ્થળ બનાવવાની રુપરેખા પણ તૈયાર કરાઇ છે. પ્રસ્તાવિત સંગમ સ્થળ વારાણસી-ચંદોલી જીટી રોડ, આઉટર રિંગ રોડ ફેઝ-3 અને શહેરમાં જવાના મુખ્ય માર્ગ અને કેન્દ્ર સરકારના ડ્રીમ પ્રોજેક્ટ વારાણસી-હલ્દિયા ગંગા વોટર ટ્રાન્સપોર્ટેશન સાથે જોડાયેલું છે. થોડે દુર અપગ્રેડ થઇ રહેલુ કાશી રેલ્વે સ્ટેશન છે. ઇંટર મોડલ બસ સ્ટેન્ડનો અહીંથી જ રોપ વેનો એક રુટ શરુ કરવાનો પ્રસ્તાવ છે.