જવાબદાર કોણ? / ભાજપ નેતાના સંબંધી હોય એટલે નિયમો માનવાના નહીં, ચમારા ગામે લગ્નમાં ગાઈડલાઈની ઐસીતૈસી

• કોરોના મહામારી વચ્ચે પણ ધામધૂમથી લગ્ન
• ચમારા ગામમાં લગ્નના વરઘોડાનો વીડિયો વાઈરલ
• ભાજપ અગ્રણી રાજુ પઢીયારના ભત્રીજાના લગ્ન

આંકલાવ તાલુકાના ચમારા ગામમાં લગ્નના વરઘોડાનો વિડિયો વાઇરલ થયો છે. આ ચમારાના સરપંચ અને ભાજપના અગ્રણી રાજુ પઢીયારના ભત્રીજાના લગ્ન હતાં. આ લગ્નમાં ડીજેના તાલ સાથે તલવારો લઈ યુવાનો ઝૂમતા નજરે પડ્યા છે. કોરોનાકાળમાં ભાજપના નેતાઓને ગાઇડલાઇનના પાલનનો ખ્યાલ નથી કે નેતાઓને કોઈ કાયદો લાગુ પડતો નથી તેવા સવાલો ઉઠ્યા હતાં.

સળગતા સવાલ

• ભાજપ નેતાના સંબંધી હોય એટલે નિયમોનું પાલન નહીં કરવાનું?
• કોરોનાના ડર અને ગાઇડલાઇનને નેવે મુકી દેવાઇ?
• ગુજરાતના કેટલાયે લોકો સારવાર માટે કરગરી રહ્યાં છે 
• કોરોના ગાઇડલાઇનને ભૂલી બેદરકારી દાખનારા લોકો સામે પગલા કેમ નહીં?
• લગ્ન પ્રસંગોના નિયમો ભાજપના સગાઓને લાગુ ન પડે?
• શું લાગવગ અને ઓળખાણ હોય એટલે કંઇ પણ કરવાનો પરવાનો મળી જાય?
• શું પોલીસ આ પ્રકારના જલસાઓને અટકાવી ન શકે?
• સોશિયલ મીડિયામાં વાયરલ થયા બાદ હવે પોલીસ કાર્યવાહી કરશે?

ગુજરાતમાં કોરોનાની સ્થિતિ

ગાંધીનગરમાં કોર કમિટી અને ટાસ્ક ફોર્સની બેઠકમાં કોરોનાની ત્રીજી લહેર આવવાની સંભાવના પણ દર્શાવવામાં આવી છે. તજજ્ઞો કોરોનાની ત્રીજી લહેરની સંભાવના વ્યક્ત કરી રહ્યાં છે. આજની બેઠક બાદ જણાવ્યું કે, ત્રીજી લહેરને પહોંચી વળવા તૈયારીઓ શરૂ કરી છે. કોવિડ ટાસ્કફોર્સના તજજ્ઞોએ તમામ બાબતે ચર્ચા કરી હતી. સાથે કહ્યું કે, બીજી લહેરના અનુભવના આધારે તૈયારીઓ શરૂ કરી હતી. ટેસ્ટિંગ વધારવા, કોવિડ પ્રોટોકોલનું પાલન કરવુ જરૂરી રહેશે. અને ત્રીજી લહેરમાં ઇન્ફ્રાસ્ટ્રક્ચર અને સ્ટાફની તૈયારીને લઇને પ્લાન કરીશું. તેવું પણ તજજ્ઞોએ જણાવ્યું હતું. 

સરકારની કોર કમિટી અને ટાસ્ક ફોર્સ વચ્ચેની બેઠક અંગે અગ્ર સચિવ જયંતિ રવિએ કહ્યું કે, ગામડાઓમાં બેડ વધારવા, વેક્સિનેશન, સારવારની સુવિધાઓ વધારવાની કામગીરી કરવામાં આવશે. સાથે આજની બેઠકમાં ચર્ચા કરાયેલા મુદ્દા પર 3 દિવસમાં વિસ્તૃત પ્લાનિંગ કરવામાં આવશે. સાથે જયંતિ રવિએ કહ્યું કે, મારું ગામ કોરોના મુક્ત અભિયાન દ્વારા ગામડાઓમાં કોરોનાના સંક્રમણ ઘટાડવા માટે કાર્યરત છે. કોર કમિટી અને ટાસ્ક ફોર્સની સંયુક્ત બેઠકમાં તજજ્ઞોના મંતવ્યો પણ લેવામાં આવ્યા હતા.