કાર્યવાહિ / અમદાવાદમાં બેફામ વ્હીકલ પાર્ક કરનારા સાવધાન: AMC એક્શનમાં, રિવરફ્રન્ટ રોડ પર એકસાથે 24 ફોર વ્હીલર્સને મારી દેવાયાં ‘તાળાં’

• શહેરમાં આડેધડ વાહન પાર્ક કરનાર સામે AMC ની લાલ આંખ
• તંત્રએ ડ્રાઈવ યોજી આડેધડ પાર્ક થયેલાં ર૪ ફોર ‌વ્હીલરને તાળાં મારી દીધા
• કસૂરવાર વાહનચાલકો પાસેથી રૂ. ૧ર હજારનો વહીવટીચાર્જ પણ વસૂલ્યો

શહેરમાં દિન-પ્રતિદિન ટ્રાફિક જામની સમસ્યા વકરતી જાય છે. જાહેર રોડ પરનાં દબાણથી તે સાંકડા બનતા હોઈ વાહનો સરળતાથી અવરજવર કરી શકતાં નથી. આમાં કેટલાક બેજવાબદાર નાગરિકો આડેધડ રીતે પોતાનાં વાહન પાર્ક કરીને ટ્રાફિકને બાધારૂપ બને છે, જોકે મ્યુનિ. સત્તાવાળાઓએ આડેધડ વાહન પાર્ક કરતા ચાલકો સામે લાલ આંખ કરી છે, જેના કારણે આવા લોકોએ સાવધાન થઈ જવાની જરૂર છે. ગઈ કાલે ઈન્કમટેક્સબ્રિજથી રિવરફ્રન્ટ એપ્રોચવાળા રોડ પર તંત્રએ ડ્રાઈવ યોજી આ પ્રકારે પાર્ક થયેલાં ર૪ ફોર ‌વ્હીલરને તાળાં મારી દેતાં તેના ચાલકો દોડતા થઈ ગયા હતા. 

રોડ પર બેફામ રીતે પાર્ક કરતાં વાહનો સામે કડક પગલાં લેવાયા
અમદાવાદમાં મ્યુનિ. કોર્પોરેશનના સત્તાવાળાઓ ટ્રાફિકની સમસ્યાના નિરાકરણ માટે ‌છેલ્લા કેટલાક સમયથી રોડ પર બેફામ રીતે પાર્ક કરતાં વાહનો સામે કડક પગલાં લઈ રહ્યાં છે. ઘણા વાહનચાલકો રોડ પરની અવરજવરને ધ્યાનમાં રાખ્યા વગર પોતાનાં વાહન પાર્ક કરીને જતા રહે છે. રોડને રોકી નાખે તે રીતે પાર્ક કરવાની સમસ્યા હવે ગંભીર બનતી જાય છે. આવા બેજવાબદાર વાહનચાલકોથી અન્ય સેંકડો લોકો પરેશાનીમાં મુકાઈ જાય છે.

આડેધડ પાર્ક કરાતાં વાહનો અને દબાણ સામે તંત્ર એક્શન મોડમાં
ખાસ કરીને પશ્ચિમ ઝોનમાં આડેધડ પાર્ક કરાતાં વાહનો અને દબાણ સામે તંત્ર એક્શન મોડમાં આવ્યું છે. સ્ટેડિયમ વોર્ડના ઈન્કમટેક્સબ્રિજથી રિવરફ્રન્ટ એપ્રોચવાળા જાહેર રોડ પર સત્તાધીશોએ ડ્રાઈવ કરી કુલ ર૪ ફોર વ્હીલરને તાળાં મારી દીધાં હતાં.  તંત્રએ આ ડ્રાઈવ હેઠળ કસૂરવાર વાહનચાલકો પાસેથી રૂ. ૧ર હજારનો વહીવટીચાર્જ પણ વસૂલ્યો હતો.

ફોર વ્હીકલ તેમજ ટ્રાફિકને નડતરરૂપ શેડ દૂર કરી રોડ ખુલ્લો કર્યો
આ ઉપરાંત નવરંગપુરા વોર્ડના પાંજરાપોળ ચાર રસ્તાથી આઈઆઈએમ ચાર રસ્તા સુધી મ્યુ‌નિ. તંત્રે ટ્રા‌ફિક પોલીસ સાથે સંકલનમાં રહી એક ફોર વ્હીલર સહિત ૧૦પ પરચૂરણ માલસામાન જપ્ત કર્યો હતો તેમજ નારણપુરા વોર્ડમાં એઈસીબ્રિજ નીચેથી વાળીનાથચોક, હેલ્મેટબ્રિજ સુધીના રોડ અને ફૂટપાથ પરથી ચાર લારી, ૧૦ પરચૂરણ માલસામાન, બે થ્રી વ્હીલર અને ટ્રાફિકને નડતરરૂપ એક શેડ દૂર કરી રોડ ખુલ્લો કર્યો હતો.