સુવિદ્યા / અમદાવાદમાં નિકોલથી થલતેજ સુધી ટુંક સમયમાં જ દોડતી થઇ જશે મેટ્રો!, ટ્રેકનું કરાયું ટેસ્ટિંગ

• અમદાવાદમાં મેટ્રો ટ્રેનનું ટ્રેક ટેસ્ટિંગ શરૂ
• લોકોમોટિવ વ્હીકલથી કરાયું ટેસ્ટિંગ
• મેટ્રોનો ફેઝ-1  શરૂ કરવા કવાયત

ટ્રેનને લોકોમોટિવ વ્હીકલની મદદથી ખેંચી કરાયું ટેસ્ટિંગ

અમદાવાદ મેટ્રો ટ્રેન પ્રોજેક્ટની ફેઝ-1ની કામગીરી હવે પૂર્ણતાના આરે છે. જેના ભાગરૂપે આજે વસ્ત્રાલના એપરેલ પાર્ક ખાતેના ડેપોથી ત્રણ કોચની એક મેટ્રો ટ્રેન એપરલ પાર્કથી મેટ્રો ટ્રેનને 
લોકોમોટિવ વ્હિકલની મદદથી 6.5 કિમિ લાંબી કાંકરિયા અંડરગ્રાઉન્ડ શાહપુર ટનલથી સ્ટેડિયમ સુધી ખેંચી ટેસ્ટિંગ કરાયું હતું. તેમજ સાબરમતી નદીના બ્રીજ ઉપરથી ચલાવી ઈન્કમટેક્ષ ખાતે જૂની હાઈકોર્ટ સુધી દોડાવવામાં આવી હતી.આગામી સમયે થલતેજ સુધીના સમગ્ર ટ્રેકનું પણ ટેસ્ટિંગ કરાશે.

ચૂંટણી પૂર્વે અમદાવાદ મેટ્રો ટ્રેનના ફેઝ-1ને શરૂ કરવાનું આયોજન

આ અંગે સૂત્રોના જણાવ્યા અનુસાર જૂની હાઇકોર્ટથી થલતેજ સ્ટેશન સુધી ટ્રેનના ટેસ્ટિંગની કામગીરી શરૂ કરવામાં આવશે. ટ્રેન ના ટ્રેક અને ટ્રેનની ટેસ્ટિંગની કામગીરી આગામી દિવસોમાં કરવામાં આવશે, જેના ભાગરૂપે આજે ટનલમાંથી આ ટ્રેનને ચલાવી અને જૂની હાઈકોર્ટ સુધી પહોંચાડવામાં આવી હતી. મહત્વનું છે કે, મેટ્રો ટ્રેન શરૂ થાય તે પહેલા અને ધ્યાનમાં રાખી અને તમામ પાસાઓની તપાસ કરવામાં આવતી હોય છે.

પ્રથમ ફેજમાં 40 કિમિનો મેટ્રો રૂટ

ઉલ્લેખનીય છે કે, મેટ્રો રેલના ફેઝ-1ને ગુજરાત મેટ્રો રેલ કોર્પોરેશન લિમિટેડ દ્વારા ઓગસ્ટ 2022માં શરૂ કરવામાં આવશે તેમ જણાવ્યું છે. જેની પૂરજોશમાં કામગીરી ચાલી રહી છે. મહત્વનું છે કે, મેટ્રો ટ્રેના પ્રથમ ફેઝમાં  40 કિલોમીટરના રૂટમાં 32 સ્ટેશન આવે છે, જેમાંથી નિકોલથી થલતેજ સુધીના રૂટનું મોટાભાગનું કામ પૂર્ણ થયું છે.