RTO કોન્ટ્રાક્ટ પૂરો થયો હોવાની ચર્ચાએ કર્મચારીઓએ કામ બંધ કર્યું
RTOમાં અરજદારોની હેરાનગતિ યથાવત્
અમદાવાદમાં RTOમાં છેલ્લા એક સપ્તાહથી લાઇસન્સ પ્રક્રિયા ખોટકાતાં નાગરિકો ત્રાહિમામ્ પોકારી ગયા છે. અત્યંત આધારભૂત માહિતી મુજબ ખાનગી કંપનીને લાઇસન્સ કાઢવા માટે આપેલો કોન્ટ્રાક્ટ પૂરો થયો હોવાની ચર્ચાએ કર્મચારીઓએ કામ બંધ કરી દીધું છે. રોજના 400 લાઇસન્સની પ્રિન્ટિંગ અને અન્ય કામગીરી બંધ થતાં RTO દ્વારા હાલમાં ભલે કામ ચલાઉ ઉપાય હાથ ધરવામાં આવ્યા છે. પરંતુ અરજદારોની હેરાનગતિનો અંત આવ્યો નથી.
ગુજરાત રાજ્યના ટ્રાન્સપોર્ટ કમિશનર વિભાગ દ્વારા અમદાવાદ સહિત રાજ્યભરની તમામ RTOમાં લાઇસન્સ અંગેની કામગીરી કરી રહેલી ખાનગી કંપનીને 9 માર્ચ મંગળવારથી કામગીરી બંધ કરવા માટેનો આદેશ થતાં લાઇસન્સ પ્રક્રિયા અટવાઈ છે. અમદાવાદની બે સહિત રાજ્યની અંદાજે 38 RTOમાં લાઇસન્સ રિન્યૂ, નવું લાઇસન્સ, ડુપ્લિકેટ લાઇસન્સ જેવી કામગીરી દ્વારા અંદાજે 5 હજાર જેટલાં લાઇસન્સ નીકળતાં હતાં. જે એક સપ્તાહથી બંધ થતાં બેકલોગનો આંકડો ઝડપભેર વધી રહ્યો છે.
ખાનગી કંપનીના કર્મચારીઓ દ્વારા લાઇસન્સના બાયોમેટ્રિકને લગતી કામગીરી સાથે લાઇસન્સ પ્રિન્ટ અને ડિસ્પેચ કરવા તથા વેરિફિકેશન કરવાની કામગીરી કરવામાં આવતી હતી. જે માટે ખાનગી કંપનીના કર્મચારીઓ આરટીઓ ઓફિસમાં ફરજ બજાવતા હતા. હવે આ કામગીરી ખોરવાઇ ગઇ છે.
બીજી તરફ ખાનગી કંપનીના કર્મીઓ દ્વારા કામ બંધ કરાતા RTOના કર્મચારીઓને ઉમેદવારના ફોટા પાડવા કામે લગાડવામાં આવ્યા છે. જેથી તમામનો ડેટા સંગ્રહ થઈ શકે. પરંતુ RTOના સૂત્રો અનુસાર કયાં કારણોસર કામ બંધ કરવામાં આવ્યું છે. તે માહિતી તેમને નથી. ઉમેદવારને હાલમાં કોઈ મુશ્કેલી નથી. તેવો લુલો બચાવ કરવામાં આવી રહ્યો છે. પરંતુ સ્ટાફની અવેલેબિલિટી અને સંખ્યા જોતાં આઉટસોર્સિંગ સ્ટાફની તુલનાએ કામગીરી ધીમી ગતિએ ચાલી રહી હોવાની ફરિયાદો ઉમેદવારો કરી રહ્યા છે. અત્રે ઉલ્લેખનીય છે કે, કોરોનાની મહામારીના કારણે લાંબો સમય કચેરી પણ બંધ રહી હતી.
હાલમાં લાઈસન્સ રિન્યુઅલ, ડુપ્લિકેટ લાઈસન્સ, એડ્રેસ ચેન્જ અને RC બનાવવા માટે પણ લોકોને RTO ઓફિસ જવું ન પડે, લોકો ઘરે બેસીને જ ડોક્યૂમેન્ટ્સ અપલોડ કરી શકે. ઓનલાઈન સિસ્ટમ બાદ ફક્ત ડ્રાઈવિંગ ટેસ્ટ અને ફિટનેસ માટે જ લોકોએ RTO ઓફિસ આવવાનું રહેતેવી વ્યવસ્થા અમલી છે પરંતુ વારંવાર સર્વર ધીમું પડી જવાની સમસ્યા યથાવત હોવાના કારણે અરજદારોની પરેશાની પણ યથાવત્ છે.