ખુલ્લી ચેલેન્જ / 'તાકાત હોય તો ઈ-મેમો મોકલી બતાવો' : નંબર પ્લેટ વાળવી-તોડવી તો જૂનું થઇ ગયું, વાહનચાલકોએ શોધી કાઢ્યો નવો ઉપાય

• તાકાત હોય તો ઈ-મેમો મોકલીને બતાવો  
• નંબર પ્લેટ વાળી દેવાનો ટ્રેન્ડ ગાયબ 
• મહિલાઓ પોતાની નંબર પ્લેટ પર્સથી ઢાંકી દે છે 

પોલીસ ગમે તેવા કડક નિયમો અને કાયદા બનાવે, પરંતુ અમદાવાદીઓ એટલા બધા સ્માર્ટ બની ગયા છે કે ગમે તેવા નિયમોથી છટકવા માટેના ઘરગથ્થુ ઉપાય શોધી કાઢે છે. પોલીસ દ્વારા ઘરે મોકલાતા ઈ-મેમોને અમદાવાદીઓએ માથાનો દુખાવો માની લીધા છે. જેના કારણે હવે તેમણે એવા ઉપાયો શોધી લીધા છે કે ઈ-મેમો ઘરે આવવાનો કોઇ ચાન્સ જ નથી રહ્યો. હાલ કેટલાક ઓવરસ્માર્ટ અમદાવાદીઓ પોતાના વાહનની નંબર પ્લેટ પરથી અક્ષર કાઢી નાખે છે. આવા વાહનચાલકોને જ્યારે ટ્રાફિક પોલીસ પકડે ત્યારે તેમના વિરુદ્ધ કાર્યવાહી થાય છે, બાકી ઈ-મેમો આવતો નથી. આમ ઈ-મેમોથી બચવા માટે વાહનચાલકોએ નંબર પ્લેટ વાળીને ઘરગથ્થુ ઉપાય શોધી લીધો છે.

તાકાત હોય તો ઈ-મેમો મોકલીને બતાવો વાહનચાલકોની ખુલ્લી ચેલેન્જ 

શહેરનાં તમામ જંક્શનને સીસીટીવીથી સજ્જ કરવામાં આવ્યાં છે, જેથી કોઈ પણ વાહનચાલક ટ્રાફિકના નિયમોનો ભંગ કરે તો સીધો ઈ-મેમો તેના ઘરે પહોંચી જાય. ઈ-મેમોથી બચવા અમદાવાદીઓએ નવો કીમિયો અજમાવ્યો છે, જેના કારણે પોલીસ અને સીસીટીવી બંને લાચાર બન્યાં છે. આમ, જોવા જઈએ તો વાહનચાલકોનો નવો કીમિયો પોલીસને ખુલ્લી ચેલેન્જ ફેંકી રહ્યો છે કે તાકાત હોય તો ઈ-મેમો મોકલીને બતાવો. ઈ-મેમોથી બચવા વાહનચાલકો પોતાનાં વાહનોની નંબર પ્લેટના અક્ષર કાઢી નાખે છે. વાહનચાલકોના આ ઉપાયથી સીસીટીવી કેમેરામાં નંબર પ્લેટ કેપ્ચર થતી નથી. 

નંબર પ્લેટ વાળી દેવાનો ટ્રેન્ડ ગાયબ 

ઈ-મેમોથી બચવા માટે પહેલાં વાહનચાલકો નંબર પ્લેટ વાળી દેતા હતા તો કેટલાક વાહનચાલકો નંબર પ્લેટને અડધી તોડી પણ નાખતા હતા. આ સિવાય નંબર પ્લેટને કોઈ ને કોઈ રીતે કપડાથી ઢાંકી દેતા હતા. આવી અનેક ઘટનાઓ સામે આવતાં પોલીસે લાલ આંખ કરી હતી અને રોડ પર આ પ્રકારે દેખાતા વાહનચાલકો વિરુદ્ધ કાર્યવાહી કરી હતી. જો કોઈ નંબર પ્લેટ વળેલી જોવામાં આવે તો પોલીસ તેના વિરુદ્ધ કાર્યવાહી કરે છે ત્યારે હવે આ ટ્રેન્ડ જૂનો થઇ જતાં વાહનચાલકો અપગ્રેડ થયા છે અને નંબર પ્લેટ પરથી અક્ષર કાઢી રહ્યા છે. 

મહિલાઓ પોતાની નંબર પ્લેટ પર્સથી ઢાંકી દે છે

માત્ર પુરુષ વાહનચાલકો જ નહીં પણ મહિલા વાહનચાલકો પણ ઈ-મેમાેથી બચવા નંબર પ્લેટને પોતાના પર્સથી ઢાંકી દે છે, પરંતુ આવા વાહનચાલકો સામે પોલીસ દ્વારા કોઈ કાર્યવાહી કરવામાં આવતી નથી. અમદાવાદમાં જાહેર રસ્તા પર ટ્રાફિક વિભાગ દ્વારા સીસીટીવી લગાવવામાં આવ્યા છે, પરંતુ વાહનચાલકોના કીમિયા સામે ટ્રાફિક વિભાગ લાચાર બન્યો છે ત્યારે આવા વાહનચાલકોને દંડવા ટ્રાફિક વિભાગે કેવાં પગલાં ભરવાં તે જોવું રહ્યું.

અક્ષર કાઢી નાખનાર ચાલકો વિરુદ્ધ ડ્રાઇવ શરૂ કરવામાં આવશે

ટ્રાફિકના એસીપી આકાશ પટેલે જણાવ્યું છે કે કેટલાક વાહનચાલકો પોતાના ઈ-મેમોથી બચવા માટે નંબર પ્લેટને કાઢી નાખે છે, વાળી દે છે અથવા તો તોડી નાખે છે, પરંતુ અક્ષર કાઢી નાખવાના કિસ્સા સામે આવતાં હવે તેમના વિરુદ્ધ સ્પેશિયલ ડ્રાઇવનું આયોજન કરવામાં આવશે. 

પોલીસ કર્મચારીઓ તો નંબર પ્લેટ જ નથી લગાવતા 

પોલીસની વરદી પહેરો એટલે તમને કાયદા-કાનૂન નથી લાગુ પડતા તેવું કેટલાક પોલીસ કર્મચારીઓ વિચારી રહ્યા છે અને નિયમોની ઐસીતૈસી કરે છે. પોલીસ કર્મચારીઓની કારમાં મોટા ભાગે બ્લેક ફિલ્મ જોવા મળે છે, જેના ઉપર હજુ સુધી કોઈ કાર્યવાહી થઈ નથી ત્યારે હવે તેમનાં વાહનોમાં નંબર પ્લેટ પણ હોતી નથી. ઈ-મેમોથી બચવા માટે પોલીસ પોતાનાં વાહનો ઉપર નંબર પ્લેટ લગાવતા નથી. હજારો કિલોમીટર વાહન ચાલી ગયું હોવા છતાં પણ વાહનચાલકો નંબર પ્લેટ લગાવતા નથી.