ક્રાઈમ / અમદાવાદમાં ક્યાંથી આવ્યો નશાનો સામાન, નારોલ પોલીસે એક જ રાત્રમાં ઝડપ્યો 110 કિલો ગાંજો

• અમદાવાદના લાંભા 3 રસ્તા પાસેથી નશાનો સામાન ઝડપાયો
• ત્રણ આરોપી સાથે પોલીસે 110 કિલો ગાંજાનો જથ્થો ઝડપ્યો
• ઓટો રિક્ષામાં અંકલેશ્વરથી આવ્યો હતો ગાંજાનો મોટો જથ્થો

અમદાવાદમાં ફરી એક વાર નશાનો સામાન ઝડપાયો છે. એક બે કિલો નહીં 110 કિલોથી પણ વધુ છે. નારોલ પોલીસે લાંભા 3 રસ્તાથી રિક્ષામાં લઈ જવાતા 110 કિલો ગાંજા સાથે રાણીપના 3 શખ્સોની ધરપકડ કરી છે. આરોપીઓની પોલીસે પૂછપરછ દ્વારા ગાંજાનો આટલો મોટ જથ્થો મંગાવનાર અને આપનારની શોધખોળ શરૂ કરી છે.

અમદાવાદ પોલીસે કિરીટ પંચાલ, ચીમન સોલંકી અને કૃષ્ણરાજ પુરોહિતની ધરપકડ કરી છે. આ ત્રણેય શખ્સો રિક્ષામાં નડિયાદથી અમદાવાદમાં ગાંજો લઈને આવતા હતા અને પોલીસના હાથે ઝડપાઈ ગયા છે. આરોપીઓ પાસેથી પોલીસે 110 કિલોથી વધુ ગાંજાનો જથ્થો કબ્જે કર્યો છે.

અમદાવાદ નારોલ પોલીસે લાંભા ત્રણ રસ્તા પર પેટ્રોલીંગમાં હતી. તે દરમિયાન બાતમી મળી હતી કે, એક રિક્ષા લાંભાથી નારોલ તરફ આવી રહી છે. જેમાં નશાનો સામાન મોટી માત્રામાં છે. પોલીસે બાતમીના આધારે રિક્ષા રોકી તેમાં તપાસ કરતા ગાંજાનો જથ્થો મળી આવ્યો હતો. પોલીસે ઓટો રિક્ષા અને ચાર મોબાઇલ ફોન સહિત કુલ 11 લાખ 63 હજાર 110નો મુદ્દામાલ કબજે કર્યો છે.

પોલીસની પ્રાથમિક પૂછપરછમાં સામે આવ્યું કે, આરોપીઓ અંકલેશ્વરથી આ ગાંજાનો જથ્થો અમદાવાદમાં લાવ્યા હતા. ત્યારે મોટા પ્રમાણમાં ગાંજાનો જથ્થો ઝડપાતા હાલ તો પોલીસે ગાંજો આપનાર અને મંગાવનાર બંને શખ્સોને ઝડપી પાડવા માટે આરોપીઓને કોર્ટમાં રજૂ કરી રિમાન્ડ મેળવવા તજવીજ હાથ ધરી છે.