એક્ઝિક્યુટિવ યુવતીએ ઓનલાઇન પાંચ હજારનું કરિયાણું મંગાવ્યું હતું. જોકે કરિયાણું ન આવતાં ગૂગલ પરથી કસ્ટમર કેર નંબર સર્ચ કરી ફોન કરતાં તેને 49 હજાર ગુમાવવાનો વારો આવ્યો છે.
કસ્ટમર કેરમાં ફોન કરીને ફરિયાદ નોંધાવી અને થઈ છેતરપિંડી
ડિજિટલ પેમેન્ટનું પ્રમાણ વધવાની સાથે-સાથે ઓનલાઇન ઠગાઈના કિસ્સા પણ વધી રહ્યા છે. ઓનલાઇન ફ્રોડ કરનારા લાલચ આપી હજારો રૂપિયાની ઠગાઈ કરી જાય છે. આવો જ એક કિસ્સો નારોલમાં રહેતી એક એક્ઝિક્યુટિવ યુવતી સાથે બન્યો છે. એક્ઝિક્યુટિવ યુવતીએ ઓનલાઇન પાંચ હજારનું કરિયાણું મંગાવ્યું હતું. જોકે કરિયાણું ન આવતાં ગૂગલ પરથી કસ્ટમર કેર નંબર સર્ચ કરી ફોન કરતાં તેને 49 હજાર ગુમાવવાનો વારો આવ્યો છે.
નારોલના આકૃતિ આંગન ફ્લેટમાં રહેતી યુવતીએ અજાણ્યા ગઠિયા વિરુદ્ધ ફરિયાદ નોંધાવી છે. યુવતી પીપલજ ખાતે નામી કંપનીમાં એક્સપોર્ટ એક્ઝિક્યુટિવ તરીકે ફરજ બજાવે છે. અનામિકા રાતે ઘરે હાજર હતી ત્યારે ગ્રોફર નામની એપ્લિકેશનથી રૂ. 5623 રૂપિયાનાં કરિયાણાનો સામાન ગૂગલ પેથી ઓનલાઇન ઓર્ડર કર્યો હતો.
જોકે ચાર દિવસ બાદ આ એપ્લિકેશનમાં યુવતીએ જોયું તો, ઓર્ડર ડિલિવર થઈ ગયો હોવાનું બતાવાયું હતું. જોકે યુવતીને કોઈ સામાન મળ્યો ન હતો. તેથી યુવતીએ ગૂગલ પર સર્ચ કરતાં તેને કસ્ટમર કેરનો નંબર મળ્યો હતો.
સર્ચ દરમિયાન જેન્સે નામના યુવકનો નંબર મળ્યો હતો. યુવતીએ જેન્સેને ફોન કરતાં તેણે કહ્યું કે, અમારા સિનિયર એક્ઝિક્યુટિવ તમારી સાથે વાત કરશે. થોડી વાર બાદ જેન્સે નામના યુવકે યુવતીને ફોન કરીને કહ્યું કે, સર્વરમાં એરરના કારણે તમારો ઓર્ડર ડિલિવર બતાવે છે. પરંતુ ઓર્ડર કેન્સલ થયો છે. જેથી તમે રૂપિયા ભર્યા છે તે તમને રીફન્ડ જોઈતા હોય તો એક લિંક આવશે. તેમાં વિગતો ભરી દેશો. ત્યાર બાદ યુવતીએ વિગતો ભરી દીધી હતી. યુવકે એનિડેસ્ક નામની એપ્લિકેશન ડાઉનલોડ કરાવીને ઓટીપી નંબર મેળવી લીધો હતો.
યુવતીએ બે વાર ઓટીપી નંબર યુવકને આપી દેતાં તેના ખાતામાંથી બે વાર 49 હજાર રૂપિયા ઉપડી ગયા હતા. યુવતીએ તાત્કાલિક સાયબર ક્રાઇમ પોલીસ સ્ટેશનમાં અજાણ્યા યુવક વિરુદ્ધ ફરિયાદ નોંધાવતાં પોલીસે ગુનો નોંધી તપાસ હાથ ધરી છે.