અમદાવાદમાં લૂંટનો એક અજબ ગજબ કિસ્સો આવ્યો સામે, પ્રભજોત સિંઘ નામનો યુવક મહિલાને પ્રેમ જાળમાં ફસાવી તેની સાથે લગ્ન કરે છે અને દાગીના સહિત રૂપિયા સાથે થઈ જાય છે છૂમંતર
અમદાવાદમાં લૂંટેરા દુલ્હા !
લગ્ન પહેલા 3 યુવતીઓને ફસાવી
ફરાર પ્રભજોત સિંઘની પંજાબમાં તપાસ થશે
લૂંટેરી દુલ્હનના અનેક કિસ્સા અત્યાર સુધી તમે સાંભળ્યા હશે. પણ લગ્ન કર્યા બાદ ગણતરીના દિવસોમાં મહિલા દાગીના કે રૂપિયા લઈને પતિ ફરાર થયા ગયા હોવાનું કદાચ સાંભળ્યું હશે નહીં. આવો જ એક વિચિત્ર કિસ્સો સેટેલાઈટની મહિલા સાથે બન્યો. આરોપી પ્રભજોત સિંઘ પહેલા મહિલાને પ્રેમ જાળમાં ફસાવી તેની સાથે લગ્ન કરે છે. જરૂરિયાતનું નાટક કરીને રૂપિયા લઈ છૂમંતર થઈ જાય છે. પ્રભજોત સિંઘએ પ્રથમ મહિલા સાથે લગ્નનું નાટક કયું હોય તેવું નથી.
અગાઉ પણ અનેક મહિલા સાથે આવી છેતરપીંડી કરી હોવાનો ફરિયાદમાં મહિલાએ આક્ષેપ કર્યો છે. ફરિયાદીએ અગાઉના પતિ સાથે છૂટાછેડા લીધા બાદ તે સેટેલાઈટ વિસ્તારમાં PGમાં રહેવા માટે વર્ષ 2008થી આવી હતી. આ દરમિયાન તેનો સંપર્ક પ્રભજોત સિંઘ સાથે થયો અને ત્રણેક મહિના સુધી વાતચીત કર્યા બાદ બંને વચ્ચે પ્રેમ સંબંધ બંધાયો હતો. જેથી પ્રભજોત સિંઘ એ મહિલાને પોતે કુવારો હોવાનું જણાવીને તેની સાથે લગ્ન કરવાની તૈયારી બતાવતા બંને સહમત થયા હતાં. અને જૂન 2015માં આર્ય સમાજમાં તેઓએ લગ્ન કર્યા હતાં.
આ લગ્ન બાદ પણ આરોપી મહિલાને તેના ઘરે લઈને જતો ન હતો. પીજીમાં રાખી પૈસા ન હોવાનું બહાનું કરતો. જેથી મહિલાએ તેની બચતના 35 હજાર આપતા તેઓ મકાન ભાડે રાખીને રહેવા લાગ્યા હતા. પણ આરોપી મહિલાને ઘર ખર્ચના રૂપિયા આપવાને બદલે મહિલાના પૈસે મોજશોખ કરતો હતો. અને મહિલા કઈ બોલે તો તેની સાથે મારઝૂડ કરી છોડી દેવાની ધમકી આપતો હતો. પણ મહિલાને પ્રભજોત સિંઘના વર્તનથી શંકા જતા મહિલાને જાણવા મળ્યું કે આરોપીએ અગાઉ પણ અન્ય બે યુવતી સાથે પોતે કુવારો હોવાનું કહીને લગ્ન કર્યા હતા અને રૂપિયા પણ પડાવી ચુક્યો છે. હાલ ભાડે રાખેલ મકાન છોડી આરોપી પ્રભજોત સિંઘ ફરાર થઈ ગયો છે. સેટેલાઈટ પોલીસે મહિલાની ફરિયાદ આધારે વિવિધ દિશામાં આરોપીને ઝડપવા તપાસ હાથ ધરી છે.