કલંકિત ઘટના / દાહોદમાં દુષ્કર્મ બાદ 'તુ મને કેમ બોલાવતી નથી' કહીને નરાધમે યુવતીને છરીના ઘા માર્યા

• દાહોદમાં દુષ્કર્મ બાદ યુવતીની હત્યાનો પ્રયાસ 
• 'મને બોલાવતી કેમ નથી'કહી યુવક તૂટી પડ્યો 
• યુવક ફરાર,યુવતી હોસ્પિટલમાં, પોલીસ તપાસમાં 

રાજ્યમાં બે-બે મોટા કેસમાં આરોપીઓને મહિનાની અંદર જ દૃષ્ટાંત રૂપ ચૂકાદા અને સજા છતાં દુષ્કર્મ અને હત્યાના પ્રયાસની ઘટનાઓ અટકતી નથી. વડોદરામાં નવસારીની યુવતી પર થયેલી હીચકારી ઘટના બાદ, યુવતીએ ટ્રેનમાં આત્મહત્યા કરી કે હત્યા તેની કોઈ મજબૂત કડી સુધી પોલીસ પહોચી શકી નથી.ઘટનાને બે મહિના થવા આવ્યા છતાં હજુ તલસ્પર્શી તપાસ ચાલી રહી છે.ત્યાં જ આદિવાસી વિસ્તાર દાહોદના એક ગામમાં એક તરફી પ્રેમમાં વિકૃત થયેલા શખ્સે એક યુવતી પર દુષ્કર્મ  આચરી હિચકારી હત્યાનો પ્રયાસ પણ કર્યો હતો. 

દાહોદના સીંગેડી ગામે દુષ્કર્મ બાદ યુવતીની હત્યાનો પ્રયાસ કરવામાં આવ્યો હતો. જેમાં આ ગામના જ શખ્સે યુવતીને ખેતરમાં લઈ જઈને દુષ્કર્મ આચર્યુ હતું. તેમજ દુષ્કર્મ બાદ શખ્સે યુવતી પર અનેક છરીના ઘા માર્યા હતાં. "તુ મને કેમ બોલાવતી નથી" તેમ કહીને આ શખ્સે હત્યાનો પ્રયાસ કર્યો હતો. આ કરતૂત બાદ આરોપી શખ્સ માના કોળી પટેલ ફરાર થઇ ગયો છે. તેમજ ઈજાગ્રસ્ત યુવતીને દાહોદમાં સારવાર માટે ખસેડવામાં આવી છે. આ સમગ્ર મામલે પોલીસે  ગુનો નોંધીને કાર્યવાહી હાથધરી છે.