કલાકોથી આમ તેમ આંટા મારતી સુંદર યુવતીનો ચહેરો જોઈએ એક સજ્જન માણસ તેના ચહેરા પરથી તેની પરેશાનને કળી ગયો. તેની પાસે જઈ યુવતીની સાથે વાત કરી તેની હકિકત જાણી તે સ્તબ્ધ થઈ ગયો અંતે તેણે તેને મહિલા હેલ્પલાઈન 181ની મદદ માંગવાની સલાહ આપતા પોતાનો મોબાઈલ આપ્યો. યુવતીએ મહિલા હેલ્પલાઈન અભયમ્ 181ને ફોન કર્યો. મદદે આવનાર કાઉન્સિલર યુવતીની વ્યથા સાંભળી હચમચી ઉઠ્યા. જાણો એવું તો શું થયું હતું યુવતી સાથે કે તેને લગ્નના 16 દિવસમાં જ સાસરી ગૃહેથી ભાગી હેલ્પલાઈનની મદદ માંગવી પડી.
16 દિવસમાં જ સાસરી ગૃહેથી ભાગી હેલ્પલાઈનની મદદ માંગવી પડી
પૈસાની લાલચમાં યુવતીની મરજી વિરુદ્ધ મૌલિક સાથે લગ્ન કરાવ્યા હતા
અંતે મોનિકાને સખી વન સ્ટોપ સેન્ટરમાં મુકવામાં આવી
મૂળ લખનૌની ગ્રેજ્યુએટ થયેલી 26 વર્ષીય મોનિકાના લગ્ન અમદાવાદના વટવામાં રહેતા તેનાથી બે ગણી ઉંમરના આધેડ વયના મૌલિક(50) સાથે થયા હતા. જ્યારે મહિલા હેલ્પલાઈનના કાઉન્સિલર અંજના બહેન તેની મદદે પહોંચ્યા ત્યારે તેણે પોતાની વ્યથા ઠાલવતા કહ્યું હતું કે, છોકરીઓની સંખ્યા ઓછી હોવાથી મૌલિકને લગ્ન માટે યુવતી મળતી નહોતી. જેથી મૌલિકે કોઈના દ્વારા મારા માતા પિતાનો સંપર્ક કર્યો હતો. અમારી આર્થિક સ્થિતિ સારી ન હોવાથી મારા માતા પિતાએ મૌલિક પાસેથી અંદાજે દોઢથી 2 લાખ રુપિયા લઈ મને વેચી દીધી હતી. પરિવારે પૈસાની લાલચમાં મારી મરજી વિરુદ્ધ મૌલિક સાથે લગ્ન કરાવ્યા હતા. લગ્નને 16 દિવસ થયા છે.’
તેણે અંજનાબહેનને જણાવ્યું કે મૌલિક રોજ તેની સાથે શારીરિક સંબંધ બનાવવા જબરજસ્તી કરતો હતો. જો મોનિકા ના પાડે તો તને પ્રાઈવેટ પાર્ટ્સમાં સળીયા વડે મારઝૂડ કરતો હતો. રોજ શરીરને એક એક ભાગમાં સળીયાથી મારઝૂડ કરી અધમૂવી કરી દેતો હતો. મોનિકાને શરીરના એવા ગુપ્ત ભાગોમાં માર મારતો જેથી તે કોઈને બતાવી પણ નહોંતી શકતી. ચાલી પણ નહોંતી શકતી. કેદ કરીને રાખતો હતો. ગઈ કાલે મોકો જોઈ મોનિકા ઘરેથી ભાગી ગઈ હતી. કાઉન્સિલર બહેને તેને સાંત્વના આપી હતી. તેમજ મોનિકાને ડર હતો કે તે માતા પિતા પાસે પાછી જશે તો તે પાછા તેને અહીં મોકલી દેશે અથવા બીજા કોઈને વેચી દેશે. તેથી તેણે પિયર જવાની ના પાડી હતી. અંતે મોનિકાને સખી વન સ્ટોપ સેન્ટરમાં મુકવામાં આવી છે.
(પાત્રોના નામ બદલેલ છે) સ્ટોરી : ધર્મિષ્ઠા પટેલ, મુંબઈ