નિવેદન / કલમ 370 હટાવાયા બાદ કાશ્મીર મુદ્દે વધ્યું ઘર્ષણ, ઇમરાન ખાને કહ્યું કે...

ઈમરાન ખાને કહ્યું કે હવે ભારતને વાતચીત માટે અપીલ નહીં કરીએ. આ સાથે જ ઈમરાન ખાને પરમાણુ યુદ્ધની ધમકી પણ આપી. અમે વારંવાર વાતચીત માટે ભારતને અપીલ કરી પણ પ્રધાનમંત્રી નરેન્દ્ર મોદી તેને નજર અંદાજ કરી રહ્યા છે. તમને જણાવી દઈએ કે કશ્મીરમાંથી 370 કલમ હટાવી લીધા બાદ પાકિસ્તાન  ઉશ્કેરાઈ ગયું છે. ત્યારથી ઈમરાન ખાન સતત નિવેદનબાજી કરી રહ્યા છે.

નોંધનીય છે કે, મોદી સરકાર દ્વારા કાશ્મીરનો વિશેષ દરજ્જો નાબૂદ કરવાનો નિર્ણય લેવામાં આવ્યો ત્યારથી જ પાકિસ્તાનના વડા પ્રધાન ઇમરાન ખાન સતત નિવેદન આપી રહ્યા છે. અમેરિકન અખબાર ધ ન્યૂયોર્ક ટાઇમ્સને આપેલા ઇન્ટરવ્યુમાં ઇમરાને કહ્યું, "હવે તેની સાથે વાત કરવાનો કોઈ ફાયદો નથી. દુર્ભાગ્યવશ, હવે જ્યારે હું પાછળ જોઉં છું ત્યારે લાગે છે કે તેમણે શાંતિ અને વાતચીતની તમામ કોશિશને તુષ્ટિકરણની રીતે લીધા છે. 

ઇમરાન ખાને કહ્યું કે, હવે ભારતીય અધિકારીઓ સાથે વાતચીત કરવાનું યોગ્ય નથી અને અત્યાર સુધીના તમામ પ્રયાસ બેકાર સાબિત થયાં છે. ઇમરાને કહ્યું, હવે અમે વધુ કાઇ જ કરી શકીએ તેમ નથી. 

પઠાણકોટ, આંતકી હુમલા બાદ ભારતે પોતાનું સ્ટેન્ડ સ્પષ્ટ કરી દીધા છે જ્યાં સુધી પાકિસ્તાન આતંકવાદ વિરૂદ્ધ સાચી કાર્યવાહી નહીં કરે ત્યાં સુધી તેની સાથે કોઇ વાતચીત થશે નહીં જો કે, પાકિસ્તાનના પ્રધાનમંત્રી ઇમરાન ઘણી વખત વાતચીત કરવાની અપીલ કરી ચૂક્યા છે. 

ઇમરાન ખાને ફરી એકવાર પ્રધાનમંત્રી મોદીને ફાસીવાદી અને હિંદુત્વવાદી ગણાવ્યા છે અને આરોપ લગાવ્યા છે કે, કાશ્મીરમાં મુસ્લીમ આબાદીનો સફાયો કરીને હિંદુ વિસ્તારોમાં તબદીલ કરવામાં માગે છે.