કોંગ્રેસે સરકાર પર વાર કરતાં કહ્યું કે વિભાગ-નિગમોમાં કાયમી ભરતી નથી કરાતી, બેરોજગારો રખડી રહ્યા છે
આઉટસોર્સિંગથી જગ્યાઓ ભરાઈ
મહત્વના પદો કોન્ટ્રાક્ટથી ભરાયા
નિગમ સહિતમાં સરકાર કોન્ટ્રાક્ટને સહારે !
આઉટસોર્સિંગ કર્મચારીઓને એજન્સીઓ પગાર ચૂકવવામાં ગલ્લા તલ્લા કરતી હોવાના અગાઉ ઘણી વખત આરોપ થઈ ચૂક્યા છે. સરકાર પોતાના તરફથી નિશ્ચિત કરેલી રકમ આપે છે પરંતુ એ રકમ જયારે કર્મચારી સુધી પહોંચે છે ત્યારે ચિત્ર કંઈક જુદુ જ હોય છે. આઉટસોર્સિંગ કર્મચારીઓનું આવુ શોષણ કરતા એજન્સીઓના પેટનું પાણી પણ હલતું નથી. માટે સરકારે આઉટસોર્સિગ કર્મચારીઓનું શોષણ બંધ થયા તે હેતુથી કર્મીઓને હવેથી બોનસ તેમજ લીવ ઓન કેશ તેમજ ડ્રેસ વોશિંગના પણ નાણાની ચૂકવણી કરવામાં આવશે તેવી અગાઉ જાહેરાત પણ કરી હતી.
આઉટસોર્સિંગથી કેટલી જગ્યાઓ ભરાયેલી?
ત્યારે આજે વિધાનસભામા રાજ્ય સરકારના મહત્વના વિભાગો આઉટસોર્સિંગથી ભરાયેલા કર્મચારીઑની વિગત રજૂ કરવામાં આવી છે. જેમાં અન્ન અને નાગરિક પુરવઠા વિભાગમાં વધુ પડતાં કર્મચારીઓ કોન્ટ્રાક્ટ પર કામ કરી રહ્યા હોવાનો ખુલાસો છે. આ વિભાગમાં 606 કર્મચારીઓ કોન્ટ્રાકટ કે આઉટસોર્સિંગથી ભરાયેલા છે જ્યારે ક્લાઈમેટ ચેન્જ વિભાગમાં 35 કર્મચારીઓ, મહિલા અને બાળ વિકાસ વિભાગમાં 14 કર્મચારીઓ, આદિજાતિ વિકાસમાં 40 કર્મચારીઓ આઉટસોર્સિંગથી ભરાયેલા છે.
'વિભાગ-નિગમોમાં કાયમી ભરતી કેમ નથી કરતી સરકાર'
વિભાગ હેઠળના બોર્ડ કોર્પોરેશનમાં 756 જગ્યાઓ કોન્ટ્રાકટ પર કર્મચારીઑને રાખી કામ ચલાવવામાં આવી રહ્યું છે. આઉટસોર્સિંગ અને ખાલી પડેલી જગ્યાને લઈ કોંગ્રેસે ગૃહમાં સરકારને વેધક સવાલ કર્યા હતા, જેમાં આરોપ કરાયો હતો કે વિભાગ-નિગમોમાં કાયમી ભરતી સરકાર દ્વારા કરાતી કરવામાં આવી નથી. બેરોજગારોને સરકારી નોકરી મળતી નથી. સરકાર માત્ર રોજગારીની વાતો કરી છે.
શિક્ષણ વિભાગમાં ઉચ્ચ અધિકારીઑની અધધ જગ્યા ખાલી
વિધાનસભામાં ધારાસભ્ય બળદેવજી ઠાકોરના પ્રશ્નમાં સરકારે શિક્ષણ વિભાગમાં ઉચ્ચ અધિકારીઓની ઘટના આંકડા રજૂ કર્યા હતા. જે મુજબ ગુજરાત શિક્ષણ સેવા વર્ગ-1,2 ની 2181 જગ્યાઓ ખાલી પડી હોવાનું બહાર આવ્યું છે, શિક્ષણ વિભાગ ઉચ્ચ અધિકારીઓ વગર ધમધમી રહ્યા છે તે આ આંકડા પરથી ચોક્કસ કહી શકાય. વર્ગ-1 ની 492 અને વર્ગ-2ની 1689 જગ્યાઓ ખાલી છે. આંકડા બહાર આવતા જગ્યાઓ ખાલી હોવાથી શિક્ષણ પર અસર થતી હોવાના કોંગ્રસે આક્ષેપ કર્યા છે. બને એટલું જલ્દી જગ્યા ભરવા સરકારે લેખિત જવાબ પણ આપ્યો છે.
કોમ્પ્યુટર લેબનો અભાવ
તો આ તરફ ડિજિટલ ઇન્ડિયાના દાવા વચ્ચે ગુજરાતની વિકટ સ્થિતિની વાસ્તવિકતા સામે આવી છે. રાજ્યની 13 હજાર 818 પ્રાથમિક શાળાઓમાં કોમ્પ્યુટર લેબનો અભાવ હોવાનો ચોંકાવનારો ખુલાસો થયો છે. તેમાં દાહોદની 1 હજાર 24, છોટાઉદેપુરની 928 શાળાઓમાં, અમદાવાદ મનપાની 273 શાળાઓમાં, અમદાવાદ જિલ્લાની 470 પ્રાથમિક શાળાઓમાં, મહેસાણાની 991, કચ્છની 739, પાટણની 786 પ્રાથમિક શાળાઓમાં કોમ્પ્યુટર લેબનો અભાવ હોવાનું બહાર આવ્યું છે. સરકારની ડિજિટલ ગુજરાતની વાતો વચ્ચે આ આંકડો સરકારના દાવાની પોલ ખોલી રહ્યા છે.