આપણે બધાં શરીરને બહારથી સ્વચ્છ રાખીએ છીએ પરંતુ શું આપણે ક્યારેય એવું વિચારીએ છીએ કે શરીરને અંદરથી પણ સફાઈની જરૂર પડે છે. જી હાં, શરીરમાં રહેલાં ટોક્સિન્સ એટલે કે હાનિકારક તત્વોને બહાર કાઢવા માટે શરીરની આંતરિક સફાઈ એટલે કે ડિટોક્સીફિકેશન બહુ જ જરૂરી છે. હવે સરળતાથી શરીરને અંદરથી કઈ રીતે સાફ રાખી શકાય તે વિશે આજે અમે તમને જણાવીશું.
આપણાં શરીરમાં ડિટોક્સિફિકેશનનું કામ શરીરના મુખ્ય અવયવો લિવર, કિડની, આંતરડા, ગોલબ્લેડર, ફેફસાં, ત્વચા તથા લોહી સતત કરતા રહે છે.
ડિટોક્સિફિકેશનનો મુખ્ય હેતુ ખોરાકમાંથી સેચુરેટેડ ફેટ, શુગર, સોલ્ટ, કેફીન અને આલ્કોહોલનું પ્રમાણ ઘટાડી ફિઝિકલ એક્ટિવિટી સાથે ખોરાકમાં ફાયબર, પાણી, ફળ અને શાકભાજીનું પ્રમાણ વધારવાનું છે.
જે લોકો વધુ પ્રમાણમાં જંક ફૂડ, ફાસ્ટફૂડ અને બહારનો ખોરાક આરોગે છે તેમણે દર અઠવાડિયે એકવાર અવશ્ય ડિટોક્સીફિકેશન કરવું જોઈએ.
આ રીતે કરો બોડીને ડિટોક્સ
પહેલી વાર ડિટોક્સિફિકેશન કરનારે ઓછામાં ઓછું બેથી ત્રણ દિવસ ડિટોક્સ ડાયટ ફોલો કરવું જોઈએ
બોડીને ડિટોક્સ કરવા માટે અઠવાડિયામાં એક દિવસ માત્ર ફ્રૂટ્સ તથા ફ્રૂટ અને વેજિટેબલ જ્યૂસનું જ સેવન કરવું.
ડિટોક્સીફિકેશનનો મુખ્ય હેતુ શરીરને હળવું કરવું અને પાચનક્રિયાને આરામ આપી શરીરની સંપૂર્ણ સિસ્ટમને આરામ આપવો છે. જેથી આ સમય દરમિયાન કોઈપણ પ્રકારનાં અનાજ, કઠોળ તથા દૂધ અને દૂધની બનાવટથી દૂર રહેવું.
આ સાથે જ ડિટોક્સીફિકેશન દરમિયાન પૂરતા પ્રમાણમાં પાણી પીવું. તેની સાથે જ જવનું પાણી, ગ્રીન ટી, લીંબુ પાણી વગેરેનું સેવન કરવું.
ભૂખ લાગે ત્યારે ભોજનમાં આખા ફળ, ફળોનો રસ તથા ગાજર, કાકડી, ટમેટાંનું સલાડ પણ ખાઈ શકાય છે.
આ પ્રકારનો ખોરાક શરીરને અંદરથી સાફ કરી તેને હળવું બનાવે છે. એસિડિટી અને ગેસની સમસ્યાઓમાંથી છુટકારો મળે છે અને રોગો સામે પણ શરીરને રક્ષણ પ્રદાન કરે છે.