ચીનથી શરુ થયેલ કોરોના વાયરસ હાલ સમગ્ર દુનિયામાં હાહાકાર મચાવે છે પરંતુ ચીન પછીનો તેનો તરતનો બીજો શિકાર દેશ એટલે કે ઇટાલીમાં કોરોનાએ મોતને કેર વર્તાવી દીધો. 28000થી વધુ મોત પછી હવે ધીમે ધીમે કોરોના વાયરસના કેસ અહીં નિયંત્રણમાં આવી રહ્યા છે અને આખરે આવતા અઠવાડિયે ઇટાલીમાં તેમના ઇતિહાસનું સૌથી લાંબું લોકડાઉન પૂર્ણ થવા જઈ રહ્યું છે.
વૈજ્ઞાનિકો ઇટાલીમાં કોરોનાનો સંક્રમણ દર લોકડાઉન હટી ગયા પછી પણ બારીકાઇથી તાપસતા રહેશે
ઇટાલી જૂન સુધીમાં 40 લાખ માસ્ક પ્રતિ દિન બનાવશે
ઈટાલીના ઇમર્જન્સી રિસ્પોન્સ કમિશનર ડોમેનિકો આરકરીએ ઇટાલીની પ્રજાને વિનંતી કરી હતી કે તેઓ લોકડાઉન હટવાની સાથે સુરક્ષાત્મક પગલાં ભરવાનું બંધ ન કરે અને કાળજી રાખે. આરકરીએ કહ્યું હતું કે સોમવારથી ફેઝ 2 શરુ થશે જે પહેલાથી પણ વધારે પડકારજનક હશે. 2 મહિનામાં 28000 હજારથી વધુ લોકોના મોતનું કારણ બનનાર કોરોના વાયરસને પગલે લાગેલું લોકડાઉન હટવાથી લોકો આખરે પાર્કમાં ફરવા માટે અથવા તેમના સગાસંબંધીઓને ઘરે જઈ શકશે. રેસ્ટોરન્ટ ફરી ખુલી શકશે અને દુકાનોમાં ધંધો રોજગાર ફરીથી શરુ કરી શકાશે.
આંકડા ફરી વધશે તો ફરીથી સ્થાનિક લોકડાઉન લાગુ થઈ શકે છે
વૈજ્ઞાનિકો ઇટાલીમાં કોરોનાનો સંક્રમણ દર લોકડાઉન હટી ગયા પછી પણ બારીકાઇથી તાપસતા રહેશે અને ઇટાલીના PM ગુસિપ્પે કોન્ટેએ કહ્યું છે કે ચોક્કસ વિસ્તારોમાં જો આંકડા ફરી જોખમી રીતે વધવા લાગશે તો ફરીથી સ્થાનિક રીતે લોકડાઉન લાગુ કરવામાં આવી શકે છે. આકરરીએ જણાવ્યું હતું કે ઇટાલીને લોકોને અત્યારે મળી રહેલી આઝાદી જો તેમણે ધ્યાન ન રાખ્યું તો છીનવાઈ શકે છે.
સરકારના પક્ષે બને એટલે કરી લીધું છે હવે પ્રજાનો વારો છે: ઇટાલીની સરકારની વિનંતી
તેમણે કહ્યું કે સોશ્યલ ડિસ્ટન્સિંગ, સ્વચ્છતા, માસ્ક, હાથ ધોવા વગેરેનું ધ્યાન હવે પ્રજા રાખશે. અમે સરકારના પક્ષે બને એટલે કરી લીધું છે હવે પ્રજાનો વારો છે. તેમણે વિનંતી કરી હતી કે હવે પોતાની સુરક્ષા ઓછી થઇ જાય તેવું બેકાળજીભર્યું વલણ ન રાખશો.આવતા અઠવાડિયે 1 લાખ 50 હજાર લોકોના લોહીનું પરીક્ષણ કરવામાં આવશે જેથી કોરોનાના સંક્રમણનું સ્પષ્ટ ચિત્ર સામે આવી શકે. આ ટેસ્ટ્સ સોમવારથી શરુ થશે.
ફક્ત 50 સેન્ટના એટલે કે આશરે 34 રૂપિયા માસ્ક દેશની 50000 દુકાનોમાં વેચવામાં આવશે. આ દુકાનોની સંખ્યા વધારીને 1 લાખ કરવાની સરકારની યોજના છે. આ ઉપરાંત સરકારે અલગ અલગ વિસ્તારોમાં સ્વચ્છતા માટે આપવા માટે 50 લાખ લાકડીવાળા પોતા ખરીદ્યા છે. ઇટાલી જૂન સુધીમાં 40 લાખ માસ્ક પ્રતિ દિન બનાવશે અને આ આંકડો ઓગસ્ટમાં વધારીને 3 કરોડ 50 લાખ માસ્ક પ્રતિદિન સુધી પહોંચાડવાનો લક્ષાંક રાખે છે.