આંતરાષ્ટ્રીય નાણાભંડોળ (IMF) પ્રમુખ ક્રિસ્ટાલિના જૉર્જિવાએ કહ્યું કે કોરોના વાયરસને કારણે વૈશ્વિક મંદીની શરૂઆત થઇ ચૂકી છે. તેઓએ એમ પણ કહ્યું કે 2020ની મંદી 2008માં આવેલા નાણાકીય સંકટથી પણ વધારે ગંભીર છે. તેઓએ કહ્યું કે અહીં બે સંકટ છે. આર્થિક અને સ્વાસ્થ્ય બંને ક્ષેત્રે ગંભીર સમસ્યાઓ છે.
વિશ્વ સમક્ષ આર્થિક અને સ્વાસ્થ્ય બંને ક્ષેત્રે ગંભીર સમસ્યાઓ : IMF પ્રમુખ
આજીવિકા પર સાથે મળીને કામ કરવાની જરૂર
જૉર્જિવાએ કહ્યું કે દુનિયાભરમાં કોવિડ 19થી લડાઇની વચ્ચે જીવન બચાવવા અને આજીવિકાની રક્ષા માટે સાથે મળીને કામ કરવાની જરૂરિયાત છે. વિશ્વ સ્વાસ્થ્ય સંગઠનના આંકડા અનુસાર, વર્તમાનમાં 10 લાખથી વધારે લોકો દુનિયાભરમાં કોરોના વાયરસના સંક્રમણનો શિકાર બન્યા છે. જેમાંથી 50,000થી વધારે લોકોએ જીવ ગુમાવ્યા છે.
લૉકડાઉનથી છૂટક મજૂરી કરનાર મજૂરો સામે રોજગારીનું સંકટ
ભારતમાં 21 દિવસોનું કોરોના લૉકડાઉનને કારણે આખા દેશમાં તમામ વસ્તુઓ બંધ છે. ભારત એક એવો દેશ છે કે જ્યાં પગાર આધારીત રોજગાર ઘણો ઓછો છે. અહીં છૂટક મજૂરી કરનાર મજૂરોની સંખ્યા ઘણી વધારે છે. લૉકડાઉનને કારણે ફેક્ટરી અને તમામ મેન્યુફેક્ચરિંગ યુનિટ્સ બંધ છે. લૉકડાઉનની સૌથી ખરાબ અસર આજ મજૂરો પર પડી છે. તેમની સામને ખાવાની પણ ગંભીર સમસ્યા પેદા થઇ ગઇ છે.
લૉકડાઉનમાં રાહતની અપીલ
આર્થિક ક્ષેત્રના ઘણા જાણકારો સરકારને સલાહ આપી રહ્યા છે કે લૉકડાઉનની વચ્ચે આ મજૂરોને થોડીક રાહત આપવામાં આવે. તેઓનું કહેવું છે કે જો લૉકડાઉન વધુ લાંબુ ચાલે છે તો ભારતની વસ્તીનો મોટો વર્ગ ભૂખથી મરી જશે. મનરેગા જેવી યોજનાથી પણ લાખો ગરીબ વંચિત છે. આઇએમએફે પણ કહ્યું કે લૉકડાઉનની સાથે-સાથે સરકારોએ આજીવિકા સુરક્ષિત અને સુનિશ્ચિત કરવા પર કામ કરવાની જરૂર છે.
આ તમામ પરિસ્થિતિ વચ્ચે ભારતમાં સ્થિતિ વધારે ગંભીર દેખાઇ રહી છે. તમામ રેટિંગ એજન્સીઓએ ગ્રોથ રેટનું અનુમાન ઘણું ઘટાડી દીધું છે. ફિચે નાણાકીય વર્ષ 2019-2020 માટે ગ્રોથ રેટનું અનુમાન ઘટાડીને 2 ટકા કરી દીધું છે. જ્યારે 2020-21 માટે તેને 5.6થી ઘટાડીને 5.1 કરી દીધું છે.
મુડીઝે 2.5 ટકા અનુમાન કર્યું
માર્ચમાં મુડીઝ ઇન્વેસ્ટર્સે 2020 માટેનો ગ્રોથ રેટ ઘટાડીને 2.5 ટકા કરી દીધો છે. પહેલા આ અનુમાન 5.3 ટકા હતું. બાર્કલે પણ કહ્યું કે 21 દિવસોના લૉકડાઉનથી કેલેન્ડર ઇયર 2020માં ગ્રોથ રેટ 2.5 ટકા રહેશે.
ADBનું અનુમાન 4 ટકા
એશિયન ડેવલપમેન્ટ બેન્ક (ADB) એ કહ્યું કે કોરોના વાયરસને કારણે નાણાકીય વર્ષ 2020માં ગ્રોથ રેટ 4 ટકા પર પહોંચી જશે. કોરોના મહામારીને પગલે વૈશ્વિક અર્થવ્યવસ્થાને 4.1 ટ્રિલ્યન ડોલરનું નુકશાન થવાનું અનુમાન દર્શાવાયું છે.