હવામાન વિભાગ / ઉત્તર ભારતમાં ઠંડીનો પ્રકોપ યથાવત્, જમ્મૂ-કાશ્મીર-હિમાચલ પ્રદેશ અને ઉત્તરાખંડમાં ભારે હિમવર્ષા

• હિમાચલ પ્રદેશ અને ઉત્તરાખંડમાં થઈ ભારે હિમવર્ષા
• જમ્મૂ-કશ્મીરમાં સતત બે દિવસથી ભારે હિમવર્ષા
• ઉત્તરભારતમાં થયેલી હિમવર્ષાની અસર થઈ શકે છે ગુજરાત પર

જમ્મૂ-કાશ્મીર, હિમાચલ પ્રદેશ અને ઉત્તરાખંડમાં હવામાન વિભાગ દ્વારા આગામી 24 કલાક ભારે વરસાદની સાથે હિમવર્ષાની ચેતાવણી આપી છે. છેલ્લા 48 કલાકથી કેટલાંક વિસ્તારોમાં સતત હિમવર્ષા જોવા મળી રહી છે. 

હવામાન વિભાગના જણાવ્યા અનુસાર ઉત્તરભારતમાં થઇ રહેલી હિમવર્ષાની અસર રાજસ્થાન, ગુજરાત સહિત અનેક રાજ્યોમાં જોવા મળશે.જેને લઇને રાજ્યોના તાપમાનમાં ઘટાડો જોવા મળશે.  આવનારા કેટલાક દિવસોમાં ગુજરાત, રાજસ્થાન સહિત અનેક રાજ્યોમાં ઠંડીનું વધવાનું અનુમાન લગાવામાં આવ્યું છે. 

જમ્મૂ-કાશ્મીરમાં સતત બે દિવસથી ભારે હિમવર્ષા
જમ્મૂ-કશ્મીરમાં સતત બે દિવસથી થઈ રહેલી ભારે હિમવર્ષાના કારણે જનજીવન અસ્તવ્યસ્ત થઈ ગયું છે. જમ્મૂ-કશ્મીરમાં તાપમાનમાં 10 ડિગ્રી સુધીનો ઘટાડો થયો છે. જેના કારણે લોકોને ભારે મુશ્કેલીનો સામનો કરવો પડી રહ્યો છે. હિમવર્ષાના કારણે તમામ ફ્લાઈટો રદ કરવામાં આવી છે.

જ્યારે બીજી તરફ જમ્મૂ-શ્રીનગર હાઈ-વે પર વાહનવ્યવહાર બંધ થઈ ગયો છે. હિમવર્ષાના કારણે આહલાદક દ્રશ્યો પણ સર્જાયા છે. પહાડોથી લઈને મકાનો અને વૃક્ષો પર બરફની ચાદર છવાઈ ગઈ છે. જ્યાં નજર નાખો ત્યાં બરફ જ બરફ દેખાઈ રહ્યો છે.  હવામાન વિભાગે હજુ પણ હિમવર્ષા અને વરસાદની આગાહી કરી છે.