આગાહી / ભારે વરસાદ પર કેન્દ્રનું અલર્ટ : ગુજરાતમાં આ તારીખે મેઘરાજા બોલાવશે ધડબડાટી

• કેટલાય રાજ્યોમાં ભારે વરસાદનું અલર્ટ 
• IMDએ જાહેર કરી ચેતવણી, થઈ જાઓ સાવધાન 
• નદીઓનું જળસ્તર વધશે તેનું પણ અલર્ટ જાહેર 

ભારતીય મોસમ વિભાગ દ્વારા 18 સપ્ટેમ્બરે દેશભરનાં કેટલાય રાજ્યોમાં ધોધમાર વરસાદનું અલર્ટ આપવામાં આવ્યું છે. IMDએ કહ્યું કે ઓડિશાનાં સમુદ્રી તટ પર પેદા થયેલા ડિપ્રેશનનાં કારણે ભારતનાં 13 રાજ્યોમાં વરસાદ થશે. 

ગુજરાતમાં મેઘરાજાની ધડબડાટી 
IMD અનુસાર કોંકણ, મહારાષ્ટ્ર, ગુજરાત, રાજસ્થાન, દિલ્હી, મધ્ય પ્રદેશ અને ઉત્તર પ્રદેશમાં આગામી ત્રણથી ચાર દિવસમાં ધોધમાર વરસાદ થઈ શકે છે. લૉ પ્રેશરનાં કારણે ડિપ્રેશન મધ્ય પ્રદેશ થઈને ગુજરાત તરફ ફંટાઈ રહ્યું છે. બીજી તરફ છેલ્લા ચાર પાંચ દિવસથી ઓડિશામાં વરસાદ વરસી રહ્યો છે જેના કનરે પૂર જેવી પરિસ્થિતિનું નિર્માણ થયું છે. ઓડિશામાં વરસાદનાં કારણે ચાર લોકોનાં મોત થયા છે. 

નદીઓ માટે અલર્ટ જાહેર 
ભારે વરસાદને જોતાં સેન્ટ્રલ વોટર કમિશન દ્વારા પણ અલર્ટ જાહેર કરવામાં આવ્યું છે. કમિશને કહ્યું છે કે વરસાદનાં કારણે નદીઓનું સ્તર વધી શકે છે અને નદીકિનારે વસતા લોકોએ સુરક્ષિત સ્થાન પર પહોંચી જવું. 

સૌરાષ્ટ્રમાં સટાસટી 
ગુજરાતમાં છેલ્લા ત્રણ દિવસથી મેઘતાંડવનાં કારણે જામનગર, જુનાગઢ અને રાજકોટમાં પરિસ્થિતિ અત્યંત ભયજનક છે. સૌરાષ્ટ્રમાં વરસાદનાં કારણે લોકોનાં જનજીવનમાં ખૂબ જ નુકસાન થયું છે જ્યારે ખેતરોમાં પણ પાણી ભરાઈ ગયા છે. આ સિવાય રસ્તાઓ તથા પુલ પણ ભારે વરસાદનાં ધોવાઈ ગયા હોવાની ઘટનાઓ સામે આવી છે. કેટલાય તાલુકામાં 20 ઈંચ વરસાદનાં કારણે પરિસ્થિતિ વિકટ બની હતી અને મુખ્યમંત્રીએ પણ અસરગ્રસ્ત વિસ્તારોની મુલાકાત લીધી હતી. મુખ્યમંત્રી પટેલે નુકસાનને લઈને સર્વે કરવા માટે આદેશ આપ્યા છે.